Read Dii 2 NÁN KORÍŃTI VɄ 13 Bible Online

2 NÁN KORÍŃTI VɄ 13 - Dii bible

2 NÁN KORÍŃTI VɄ 13

¹Míń dɨ laalı̵́ víílí do' ta̧a̧nɔ́ woo wu̵ yɛ nɔ. Debtere Múúsa woo o̧: “Kóó dom woo ȩná, u̵u̵ 'yɛ́ nán ya̧g du̵lı̵́ vu̵ wu̵lı̵́ idú, tóó tée ta̧a̧nɔ́.”

²Ká káń laa víílí do' idú woo máa, mí o̧d ví sú̵'ú̵. A̧máa káń 'ya̧'a̧ yɛ víílí pɛ́lı̵́ yȩ, mí duu faa o̧d ı̵́ kú̵u̵ kɔ́ hȩn ɓı̵́d yȩ vu̵, kan nán tóó vu̵ á̧ḿ. Tow a̧n duu laa víílí tée, míń duu ma'an zó̧ó̧ kan vu̵ né.

³I hí̧í̧ Krístu a wu̵ moo moo ya̧g míílí̧, ma bi ki gaa tée, víń ki ú. Krístu mbaan woo sɔmlɔ́gɔdná víílí ní, a̧máa tú' néélȩ́ woo víílí sa̧a̧mé sú̵'ú̵.

⁴Vu̵ ga"u̵ la' vbagadı̵́, moo ka kan néélȩ́ pɛ́lı̵́ yȩ nɔ, a̧máa duu mbaa zá̧a̧dná kan néélȩ́ Tayɨɨ woo nɔ. Vɔ́ á̧ḿ, vɔ́ sú̵g kan Krístu á̧ḿ, vɔ́ 'yɛ́n néélȩ́ né, a̧máa vɔ́ń duu sú̵g mbaa zá̧a̧d kannɔ kan néélȩ́ Tayɨɨ woo ka tú' víílí yȩ nɔ.

⁵Aga i gu̵g zó̧ó̧ víí ho̧ la ú̵! Ví 'yɛ́ zó̧ó̧ víí vu̵ Yesu woolı̵́ áa? I taa ho̧ ó̧! Ví gaa Yesu Krístu ba dɨ biilí ú náa? Tóó tée, aga ví gaa ba bin kɔ́ hȩn sɔddú̵.

⁶A̧máa mí taa ví gaa ba vɔ́n kɔ́ vóó sɔn né.

⁷Vɔ́ ɓá' Tayɨɨ moo i kɔ́ hȩn ɓı̵́d tóó sá! A̧máa vɔ́ o̧n moo bi nugun moo to̧o̧ȩ né. Vɔ́ hí̧í̧ i kɔ́ hȩn ka maa kɔ́lı̵́ má nɔ, kóó oo mbaa vóó kɔ́ ı̵́ nán ku̵u̵ kɔ́ hȩn sɔd máa vu̵ wɔgɔ si̧'.

⁸Vɔ́ kɔ́n ya̧g kan moo yȩ́ń Tayɨɨ woo né, a̧máa vɔ́ kɔ́d də́ń wu̵ yu̵ ba'ad kəd.

⁹Sey kóó 'yɛ́n vóó néélȩ́ né yɛ, i mbaa víí néélȩ́ na'a, tée zó̧ó̧ vóó dȩ' sú̵'ú̵. Moo woo nɔ vɔ́ vi Tayɨɨ i mbaa néélȩ́ na'a kɔ́ ı̵́ Tayɨɨ ka hí̧í̧ wɔgɔ.

¹⁰Mí bíńda ví ɗerwəl yɛ moo woo nɔ, sey káń sa̧a̧m víílí pɛ́lı̵́ yȩ nɔ, moo sey a̧n laa víílí tée, míń duu kɔ́n sı̵́ hȩn kɔɔgná kan néélȩ́ ı̵́ 'yɛ́lı̵́ ka pú̵n mí yɛ né. Mí nuŋ néélȩ́ yɛ moo nán sú̵ggı̵́ u̵u̵ nuŋ néélȩ́ wu̵lı̵́, a̧máa moo hȩn tunníi pɛ́lı̵́.

¹¹Dan kirtȩ́n vu̵, i mbaa nánná! I mbaa kɔ́ ı̵́ Tayɨɨ ka hí̧í̧ wɔgɔ. I zígín zó̧ó̧ víílí sa̧a̧mé. Zó̧ó̧ víí a dágá, moo a sá. Tée Tayɨɨ ı̵́ zó̧ó̧ nán, ı̵́ ká̧'a̧d pú̵lı̵́ yȩ, wú̵ń mbaa kan ví.

¹²I vá'án ya víílí kɔ́ ı̵́ dag sá̧ŋ́ vu̵ wɔgɔ, i ka pí̧í̧n ya zó̧ó̧lȩ́. Nán Tayɨɨ woo vu̵ 'waapád vu̵ vá' ví wu̵lı̵́ á̧ḿ.

¹³Ɨ́ 'yɛ́lı̵́ baa ví Yesu Krístu a bag ví hȩn; Tayɨɨ a kɔ́d ví zó̧ó̧ nán; yigid Tayɨɨ woo a mbaa kan ví 'waapád.