Read Dii 2 NÁN KORÍŃTI VɄ 2 Bible Online

2 NÁN KORÍŃTI VɄ 2 - Dii bible

2 NÁN KORÍŃTI VɄ 2

¹Moo woo nɔ mí mbɔ́g moo zó̧ó̧ míílí̧, bi la duu vi̧i̧n ví zó̧ó̧ kaa víílí né,

²moo a̧n la vi̧i̧ ví zó̧ó̧ tée, nóo wú̵ń dȩ'ȩn zó̧ó̧lá? Nán mín vi̧i̧wo̧ zó̧ó̧ pee nɔ náa?

³Moo woo nɔ ma, ká mí bíńda ɗerwəl yȩ, moo a̧n ya̧ la tée, nán ku̵u̵ maa a̧n dȩ' zó̧ó̧ yúú voolı̵́ máa, u̵u̵ vi̧i̧n zó̧ó̧ sá. Mí 'yɛ́ zó̧ó̧ dɨ víílí 'waapád, mí gaa zó̧ó̧ a dȩ'ȩn tée, wú̵ń dȩ' ví á̧ḿ.

⁴Ká mí bíńda ví moo yȩ kan zó̧ó̧ ndɔ́gɔné, kan zó̧ó̧ ví̧i̧ní á̧ḿ; mí bíńda kan mɛmɛ́ḿ nɔ́lȩ́ á̧ḿ ɓu̵u̵lı̵́ na'a, moo bi vi̧i̧n ví zó̧ó̧ȩ né, a̧máa moo i gaa ba mín hí̧í̧ bi 'yɛ́nné má nɔ.

⁵Nán a pa̧ŋ zó̧ó̧ vi̧i̧ní yaan tée, vi̧i̧n míw né, a̧máa vi̧i̧ víw 'waapád (tée ba dáb ví moo leená té' sá, a̧máa séý vi̧i̧ nán tóó vu̵ yu̵ sa̧a̧m víílí).

⁶Hȩn séené nán ɓu̵u̵lı̵́ na'a víílí sa̧a̧mé ku̵u̵ sée nán yȩ[1] yȩ, maawo̧ sú̵'ú̵.

⁷Tée i kéé moo woo gbɔ, i ka̧"o̧ zó̧ó̧ la ú̵, moo zó̧ó̧ ví̧i̧ní gbo̧o̧ kan tiddu̵ ú̵.

⁸Moo woo nɔ, mí o̧d ví i kɔ́ddu̵ víí zó̧ó̧ nánne,

⁹moo ká mí bíńda ví moo bi gu̵g ví, tow i dɨn tɔ́g kilí yúú hȩn 'waapáddı̵́ ú̵ tɛ́ nɔ.

¹⁰I kéé hȩn ɓı̵́d nán tóó woo gbɔ tée, mí kéé gbɔ sú̵'ú̵ á̧ḿ. Tow a̧n kéé hȩn ɓı̵́d nán tóó woo gbɔ tée, mí kéé gbɔ moo víí nu tíŋ́ Krístu woolı̵́ á̧ḿ.

¹¹Ba tu̵'u̵ hi̧naa gbɔd ví Seeɗán a mba ba ví sá, moo ba gaa ví moo taalı̵́ Seeɗán woo kan hȩn sóoné woo ú̵.

¹²Sey ká káń ya̧ kaa Trowáddı̵́, moo moo to̧o̧ 'maŋ Krístu woo palı̵́ wu̵lı̵́ máa, mí ho̧ ı̵́ 'yɛ́lı̵́ tu̵'u̵ hi̧naa gbɔn moo ba'ad kɔ́lı̵́ wu̵lı̵́.

¹³A̧máa kóó ı̵́ yo̧go̧ si̧', mí gbɔ́ dam, moo mí maan dan kirtȩ́n Tíd wu̵lı̵́ né. Moo woo nɔ, kóó vá'án kan nán Trowáddı̵́ vu̵ máa, mí daa laa hág Masedo̧wá̧nné.

¹⁴A̧máa ba dȩn ví Tayɨɨ nag, moo wu̵ baa pa̧ŋ ba ví laan tíŋ́ nánán voolı̵́, ma ba bee ví yéé tuu, ba zig ví hȩn yúú sú̵ggı̵́ baa ví kan Krístu yɛlı̵́. Wu̵ kɔ́ ba moo ví, moo nán u̵u̵ ki sa̧g Krístu woo ya 'waapád.

¹⁵Ba mbaa ví kɔ́ ı̵́ hȩn ha"ı̵́ sa̧g to̧o̧ Krístu woo wɔgɔ sa̧a̧m nán u̵u̵ sə́d máa voolı̵́, kan nán ı̵́ u̵u̵ ti máa vu̵ á̧ḿ.

¹⁶Ba sa̧'a̧d ví nán tóó vu̵ voo kɔ́ ı̵́ sa̧g nɔm wɔgɔ, vú̵ń nɔɔ; a̧máa ba sa̧'a̧d ví nán tóó vu̵ voo kɔ́ ı̵́ sa̧g vágád wɔgɔ, vú̵ń nuŋ vágád. Nóo dɨ kan néélȩ́ kɔ́ ba'ad ı̵́ yo̧go̧lá?

¹⁷Ɨ́ vóó, vɔ́ kɔ́n kɔ́ ı̵́ nán tóó ku̵u̵ ya̧a̧n moo Tayɨɨ woo kɔ́ ı̵́ ya̧g sɔ́g wɔgɔ né, a̧máa vɔ́ moo moo Tayɨɨ woo kan zó̧ó̧ vóó 'waapád, kan yɛ́g Krístu woo kɔ́ ı̵́ waa ba'ad tíŋ́ Tayɨɨ woolı̵́ wɔgɔ.