Read Dii 2 NÁN KORÍŃTI VɄ 3 Bible Online

2 NÁN KORÍŃTI VɄ 3 - Dii bible

2 NÁN KORÍŃTI VɄ 3

¹Vɔ́ń duu dəm fó̧ó̧ vóó áa? Tóó tée, maa ba vɔ́n ɓɛ ɗerwəl ya̧g du̵lı̵́ kɔ́ ı̵́ nán tóó vu̵ wɔgɔ laan víílí áa? Tóó tée, vɔ́ń nuŋ vííláa?

²Víi ɗerwəl vóó, kóó bíńda zó̧ó̧ vóólı̵́ máa. Nán 'waapád vu̵ záŋ́ga, vu̵ gaa sú̵'ú̵.

³Vu̵ gaa ba vínnɔ ɗerwəl Krístu ba ka bíńda máa, vɔ́ ba' wu̵ yu̵ tú'ud nán vu̵. Krístu bíńda kan bíggi né, a̧máa kan yigid Tayɨɨ ı̵́ vágád woo nɔ; Krístu bíńda aluwa 'yɛgɛlı̵́ né, a̧máa bíńda dɨ zó̧ó̧ nán voolı̵́.

⁴Vɔ́ gaa hȩn yȩ yúú zó̧ó̧ 'yɛ́lı̵́ vóó Tayɨɨ woolı̵́ kan yɛ́g Krístu woo nɔ.

⁵Vɔ́ o̧ aga vóo kɔ́n ba'ad yȩ kan néélȩ́ dáń vóó né, a̧máa néélȩ́ vóó yaa Tayɨɨ woolı̵́.

⁶Wu̵ pú̵ vɔ́ néélȩ́ mbaalı̵́ nán ba'ad yúú ya̧g talı̵́ 'maŋŋı̵́; vu̵ mbɔ́gɔn ya̧g talı̵́ 'maŋ yȩ kan hȩn bindigoɨ né, a̧máa vu̵ mbɔ́ggu̵ kan yigid Tayɨɨ woo nɔ, moo bindi nɔɔ woo nɔmme, a̧máa yigid Tayɨɨ woo máa, pú̵ woo nánán vu̵ vágádɨ.

⁷Dooká ku̵u̵ bíńda vu̵ 'yɛgɛlı̵́ yȩ, tú' woo ba'ad nán u̵u̵ nɔɔ yúú woolı̵́ má nɔ. Kóó ı̵́ yo̧go̧ si̧', ba'ad yȩ kɔ́y kan túlí gbo̧o̧, ma nán Izraɛ́l vu̵ ndɔg ya̧g túń Múúsa woo ho̧lȩ́, moo ka gáá na'a má nɔ, a̧máa gáálı̵́ yȩ mbaa né, 'wáa wu̵lı̵́.

⁸A̧máa ba'ad ı̵́ yigid Tayɨɨ woo wu̵ hȩn gbo̧o̧ mban náa?

⁹Ba'ad a sə̧'ə̧d nán vu̵ moo nɔm máa, Tayɨɨ ba 'yɛ́gɛ hȩn gbo̧o̧ gu̵y, dan tóó ı̵́ ka mbɔ́g moo to̧o̧g kan Tayɨɨ má naa?

¹⁰Na"ȩ́ ı̵́ tíŋ́ ka gáá na'a Múúsa woolı̵́ yȩ, man kan ı̵́ yɛ né sá̧ḿ, moo na"ȩ́ ı̵́ yɛ wu̵ gáá mbaga.

¹¹Dɨ ı̵́ yo̧go̧, hȩn ı̵́ ka mbaa bá' waaná' máa, Tayɨɨ ba 'yɛ́gɛ hȩn gbo̧o̧ gu̵y, dan tóó ı̵́ a dɨ mbaalı̵́ káákáá má naa?

¹²Kóó 'yɛ́ zó̧ó̧ vóó dɨ hȩn ı̵́ yo̧go̧ yȩlȩ́ máa, vɔ́ nda doo du̵u̵lı̵́ na'a á̧ḿ.

¹³Vɔ́ kɔ́n vóó kɔ́ ı̵́ Múúsa ka wáá ya̧g túń woo moo nán Izraɛ́l u̵u̵ ho̧ na"ȩ́ ka gáá, a dɨ 'wáané yȩ wɔgɔ sá.

¹⁴A̧máa nán Izraɛ́l vu̵ ŋgó̧ó̧ tɔ́g! Há̧á̧ ya̧ zá̧ga̧ ɓəə yɔ, ku̵u̵ záŋ́ga debtere ya̧g talı̵́ seelı̵́ máa, mbaad vu̵ kɔ́ ı̵́ Múúsa ka wáá ya̧g túń woo máa wɔgɔ; vu̵ kin ba sí̧'i̧n dɨ yúú Krístu woolı̵́ né.

¹⁵Moo yȩ́ńne, há̧á̧ 'ya̧'a̧ yɛ, ku̵u̵ záŋ́ga debtere Múúsa woo tée, hȩn woo big vu̵ la zó̧ó̧lȩ́ kɔ́ ı̵́ sa̧a̧m yúú wáálı̵́ wɔgɔ.

¹⁶A̧máa “Nán ı̵́ u̵u̵ yaa ı̵́ 'yɛ́lı̵́ woolı̵́ tée, hȩn woo wú̵ń kúú la,” kɔ́ ı̵́ ku̵u̵ bíńda debterelı̵́ wɔgɔ.

¹⁷Sey ku̵u̵ bíńda “ı̵́ 'yɛ́lı̵́” yɛlı̵́ yɛ, tú' yigid Tayɨɨ woo nɔ. Ma ya yigid woo ka dɨ mbaalı̵́ máa, nán vu̵ mbaa wu̵lı̵́ kan yúú voo nɔ.

¹⁸A̧máa ı̵́ kaa wáan ví yúú ní, kaa ho̧ ví ı̵́ 'yɛ́lı̵́ la kə́ńtə́ŋ́ yɛ, ba tú' ví na"ȩ́ woo, ma ba tii mbaa ví sı̵́ kɔ́ ı̵́ wu̵ wɔgɔ á̧ḿmɔ́. Ba nuŋ ví na"ȩ́ laa tíŋ́ tíŋ́. Ba'ad yigid ı̵́ 'yɛ́lı̵́ woo wu̵ yȩ nɔ.