Read Dii 2 NÁN KORÍŃTI VɄ 4 Bible Online

2 NÁN KORÍŃTI VɄ 4 - Dii bible

2 NÁN KORÍŃTI VɄ 4

¹Tayɨɨ pú̵ vɔ́ ba'ad yɛ kan zó̧ó̧ nán woo nɔ; moo woo nɔ vɔ́ mbí nɔ́ɔ́ wu̵lı̵́.

²A̧máa vɔ́ sɛ́n hȩn sȩ́ḿ kɔ́lı̵́ ya yú̵ggı̵́ vu̵lı̵́ né. Vɔ́ kɔ́n ba'ad hȩn sóoné vu̵ né, vɔ́ 'yɨgɨn moo Tayɨɨ woo né á̧ḿ. A̧máa vɔ́ tú' də́ń moo yȩ́ń dȩ"ȩ́ na'a, vɔ́ tú'ud nánán vu̵ zó̧ó̧ voo tíŋ́ Tayɨɨ woolı̵́, u̵u̵ ki gaa ba vɔ́n nán yȩ́ń vu̵ yu̵.

³Tow moo to̧o̧ 'maŋ kóó tú' yɛ, a mbaan nán tóó vu̵ dȩ"ȩ́ na'a né tée, mbaad nán ı̵́ ku̵u̵ ti máa vu̵ yu̵.

⁴Tayɨɨ ı̵́ hágá yɛlı̵́ yɛ há' nán vu̵ zó̧ó̧ voo 'yɛ́lı̵́ Tayɨɨ woolı̵́, moo na"ȩ́ moo to̧o̧ 'maŋ yúú Krístu woolı̵́ yɛ a tú mbaad vu̵ la kə́lə́ŋ́ sá; a̧máa Krístu mbaa kɔ́ ı̵́ fóto Tayɨɨ woo wɔgɔ.

⁵Vɔ́ tú'un vóó moo yúú vóólı̵́ né, a̧máa vɔ́ pa moo o̧ Yesu Krístu ba wu̵ ı̵́ 'yɛ́lı̵́ baa ví. Ɨ́ vóó máa, vɔ́ nán ba'ad víí nu moo Yesu woolı̵́.

⁶Tayɨɨ ká o̧: “Ya a tú la ya dimmí!” wu̵ kɔ́ ma, ya túlí tú zó̧ó̧ baa vílí á̧ḿ yɔ, moo aa ho̧ gaa ví na"ȩ́ Tayɨɨ woo ya̧g túń Krístu woolı̵́.

⁷Ɨ́ kóó nuŋ vóó hȩn naa yɛ, mbaalı̵́ vóó dɨ ı̵́ gbág hád wɔgɔ, née né, moo oo gaa néélȩ́ gbo̧o̧ yȩ ba yaa Tayɨɨ woolı̵́, ba hȩn vóó nɔ pɛ́lı̵́.

⁸Vɔ́ nuŋ hȩn ndɔ́gɔné ɓu̵u̵lı̵́ na'a, a̧máa hȩn tóó há'an vɔ́ né. Vɔ́ gbɔ́ dammɔ́, a̧máa zó̧ó̧ 'yɛ́lı̵́ dɨlı̵́.

⁹Vu̵ duun vɔ́ kan moo, a̧máa Tayɨɨ kéé vɔ́ gbɔn né. Vu̵ sa̧ŋ vɔ́ zu̵u̵ hágá, a̧máa vu̵ nɔɔn vɔ́ né.

¹⁰Vɔ́ gaŋ hȩn ndɔ́gɔné Yesu woo mbaan fó̧ó̧ vóólı̵́, moo nán u̵u̵ ho̧ mbaalı̵́ Yesu woo fó̧ó̧ vóólı̵́ á̧ḿ.

¹¹Ma vɔ́ mbaa vóó kan vágád, a̧máa vɔ́ mbaa bə́' kan nɔm sey 'waapád moo Yesu woolı̵́, moo nán u̵u̵ ho̧ mbaalı̵́ Yesu woo fó̧ó̧ vóó ku̵u̵ mbaa nɔmná yȩlȩ́.

¹²Máa nɔm wu̵ kɔ́ woo ba'ad vóólı̵́, a̧máa ví nuŋ víí vágád ı̵́ káákááɨ.

¹³Vɔ́ nuŋ yigid ka tú'ud vɔ́ moo zó̧ó̧ 'yɛ́lı̵́ kɔ́ ı̵́ debtere ka o̧ wɔgɔ, o̧: “Mí 'yɛ́ zó̧ó̧ míí Tayɨɨ woolı̵́, ma mí moo moo;” vɔ́ 'yɛ́ zó̧ó̧ vóó woolı̵́ á̧ḿ, ma vɔ́ moo moo.

¹⁴Ba gaa ví Tayɨɨ wu̵ nim ı̵́ 'yɛ́lı̵́ baa ví Yesu Krístu nɔmmé, ma wú̵ń nim ba ví á̧ḿ kɔ́ ı̵́ ka nim Yesu yȩ wɔgɔ. Báń sú̵g dii ví tíŋ́ woolı̵́ á̧ḿ.

¹⁵Hȩn yȩ vu̵ kɔ́y moo víí nu, moo nán ɓu̵u̵lı̵́ na'a u̵u̵ nuŋ zó̧ó̧ nán Tayɨɨ woolı̵́, u̵u̵ dȩnnɔ nag, u̵u̵ duu dȩnnɔ nag tóó, moo Tayɨɨ a nuŋ na"ȩ́ wu̵lı̵́.

¹⁶Moo woo nɔ, ba gbɔn ví nɔ́ɔ́ mbílí né, kóó fó̧ó̧ yo̧go̧ baa ví a dɨ 'wáané ú̵ si̧'; a̧máa zó̧ó̧ baa ví máa nuŋ néélȩ́ 'maŋná zá̧ga̧ 'waapád.

¹⁷Hȩn ndɔ́gɔné máa waaná' kaa dɨ ví nuní yɛ, wu̵ dɨd ba ví na"ȩ́ gbo̧o̧ mbɔ́ggı̵́, moo aa mbaa ví kannɔ káákáá,

¹⁸moo ba 'yɛ́ ví nɔ́ɔ́ yúú hȩn nán ku̵u̵ ho̧n né máalȩ́; hȩn nán ku̵u̵ ho̧ máa, ba 'yɛ́n ví nɔ́ɔ́ wu̵lı̵́ né, moo hȩn nán ku̵u̵ ho̧ kan nɔ́ɔ́ máa, mbaa ɗiin woo né, a̧máa hȩn kaa ho̧n kan nɔ́ɔ́ né máa, wu̵ mbaa ɗii káákáá.