Read Dii 2 NÁN KORÍŃTI VɄ 5 Bible Online

2 NÁN KORÍŃTI VɄ 5 - Dii bible

2 NÁN KORÍŃTI VɄ 5

¹Fó̧ó̧ baa ví hágá yɛlı̵́ man kan díŋ babbı̵́, née né; ba gaa ví kóó u̵u̵ tá̧á̧ díŋ baa ví hágá yɛ ú̵ si̧', Tayɨɨ yo̧o̧ lig tóó 'yɛ́d ba ví dɨ be"ı̵́, lig ı̵́ ku̵u̵ yo̧o̧n kan nag né, ka dɨ mbaalı̵́ káákáá má nɔ.

²Kaa dɨ ví mbaalı̵́ díŋ yɛlı̵́ yɛ tée, ba dɨ ví ndɛlı̵́, moo ba hí̧í̧ ví dɔ́lı̵́ lig ı̵́ be"ı̵́ yȩlȩ́.

³Aa dɔ́ ví fó̧ó̧ 'maŋ yȩlȩ́ tée, báń duu mbaan ví sı̵́ gɔ́ŋ́ fó̧ó̧ leená né,

⁴moo kaa dɨ ví lá mbaalı̵́ díŋ ı̵́ hágá yɛlı̵́ yɛ, ba dɨ ví lá ndɛlı̵́ kɔ́ ı̵́ kaa gaŋ ví hȩn gané ka zi̧i̧ na'a yɛ wɔgɔ. Moo yȩ́ńne, ba sɛ́n ví mbaalı̵́ fó̧ó̧ leená né, a̧máa ba hí̧í̧ ví dɔ́lı̵́ lig ı̵́ káákáálı̵́, moo díŋ baa ví ka mbaa nɔmná yɛ, a tii mbaa hȩn ı̵́ vágád káákááɨ.

⁵Tayɨɨ mbɔ́g ba ví moo dɔ́lı̵́ lig ı̵́ yo̧go̧ yȩlȩ́, dəŋ pú̵ ba ví yigid woo 'ya̧'a̧ yɛ nɔ.

⁶Moo woo nɔ ba mbí ví nɔ́ɔ́ zá̧ga̧ 'waapád. A̧máa ba gaa ví kaa mbaa ví kan fó̧ó̧ ı̵́ yɛ yɛ, ba ɗiin ví kan ı̵́ 'yɛ́lı̵́ ú̵,

⁷moo ba ho̧n ví hȩn kaa 'yɛ́n ví zó̧ó̧ wu̵lı̵́ yȩ né.

⁸Ba mbí ví nɔ́ɔ́, moo ba hí̧í̧ ví fó̧ó̧ ı̵́ yɛ gbɔlı̵́, há̧á̧ bi la mbaa ı̵́ 'yɛ́lı̵́ woolı̵́.

⁹Moo woo nɔ, kóó aa mbaa ví kan fó̧ó̧ ı̵́ yɛ, kóó aa mbaa ví kan ı̵́ 'yɛ́lı̵́ ú̵ si̧', ba hí̧í̧ bi to̧n ví kan Tayɨɨ ú̵,

¹⁰moo ya baa ví 'waapád, báń dii ví tíŋ́ Krístu woolı̵́ ya moo sə̧"ȩ́lȩ́. Kóó nɔ́nná wú̵ń nuŋ hȩn sú̵ú̵lı̵́ woo yúú ba'ad ka kɔ́ hágá yɛlı̵́ máalȩ́, kóó hȩn du̵u̵, kóó hȩn ɓı̵́d á̧ḿ.

¹¹Vɔ́ ndɔg ı̵́ 'yɛ́lı̵́ Tayɨɨ sú̵'ú̵, ma vɔ́ hí̧í̧ bi woo nán tóó vu̵ yaan woolı̵́ á̧ḿ. Tayɨɨ gaa vɔ́ 'waa sú̵'ú̵. Mí taa ví gaa vɔ́ 'waa zó̧ó̧ víílí á̧ḿ.

¹²Vɔ́ń duu dəm fó̧ó̧ vóó né, a̧máa vɔ́ hí̧í̧ bi pú̵ ví moo tóó i dəm vɔ́ wu̵lı̵́, tée víń nuŋ ya̧g hí̧í̧lí̧ woo yúú hȩn nán ku̵u̵ ho̧ kan nɔ́ɔ́ yȩlȩ́, ku̵u̵ na' yúú wu̵lı̵́ yȩlȩ́ á̧ḿ, moo hȩn woo zó̧ó̧ voolı̵́ pɛ́lı̵́.

¹³Tow oo mbaa ya̧ŋná tée, vɔ́ mbaad Tayɨɨɨ, a̧máa tow oo mbaa kɛbná tée, vɔ́ mbaad víw.

¹⁴Moo hí̧í̧lí̧ Krístu woo wu̵ pin vɔ́, moo vɔ́ gaa nán dágá wu̵ nɔɔ moo nán voo 'waapád. Moo yɛ tú' nán 'waapád vu̵ nɔɔ sú̵'ú̵.

¹⁵Yesu nɔɔ moo nán voo 'waapád, moo nán ku̵u̵ mbaa zá̧a̧d yɛ u̵u̵ duu mbaa sı̵́ dáńná sá. Ʉu̵ mbaa moo ı̵́ ka nɔɔ, ka duu níḿ nɔmmé moo voo yȩ woo nɔ.

¹⁶Moo woo nɔ, báń duu taan ví moo yúú nán tóó voolı̵́ kɔ́ ı̵́ nánán ku̵u̵ taan máa wɔgɔ né. Kóó ká aa taa ví moo ı̵́ yo̧go̧ yúú Krístu woolı̵́ ú̵ si̧', 'ya̧'a̧ yɛ ba duu taanɔ ví sı̵́ ı̵́ yo̧go̧ né.

¹⁷Moo woo nɔ, nán a sú̵gú̵n kan Krístu tée, mbaa sı̵́ nán 'maŋŋɔ́. Hȩn see vu̵ ya̧a̧ 'waa sú̵'ú̵, a̧máa hȩn 'waapád vu̵ tii sı̵́ hȩn 'maŋŋɔ́.

¹⁸Tayɨɨ wu̵ kɔ́ hȩn woo 'waapád, mbɔ́g moo to̧o̧g kan ba ví yúú Krístu woolı̵́. Wu̵ pú̵ vɔ́ ba'ad, moo oo pa̧ŋ nán tóó u̵u̵ ya to̧n kan bi á̧ḿ,

¹⁹moo Tayɨɨ duu to̧n kan nánán vu̵ yúú Krístu woolı̵́, bi duu ho̧n sı̵́ hȩn kɔ́lı̵́ sɔnné voo né, ma 'yɛ́d vɔ́ moo to̧o̧g yɛ ya̧gá̧.

²⁰Moo woo nɔ ma, vɔ́ mbaa waa ba'ad Krístu woo vu̵. Tayɨɨ wu̵ 'yɛ́ moo woo ya̧g vóólı̵́. Vɔ́ dȩn ví nag kan yɛ́g Krístu woo, i to̧n kan Tayɨɨ la ú̵!

²¹Krístu ká kɔ́n woo hȩn ɓı̵́d né sá̧ḿ, a̧máa Tayɨɨ tiiwu̵ hȩn ɓı̵́d moo baa ví nu, moo aa tii ví nán to̧o̧g bii vu̵ moo woolı̵́.