Read Dii 2 NÁN KORÍŃTI VɄ 6 Bible Online

2 NÁN KORÍŃTI VɄ 6 - Dii bible

2 NÁN KORÍŃTI VɄ 6

¹Kóó kɔ́ ba'ad kan Tayɨɨ yɛ, vɔ́ hí̧í̧ bi o̧d ví, i fȩȩ zó̧ó̧ nán Tayɨɨ woo 'yɛ́ zó̧ó̧ víílí té' sá!

²Debtere o̧: “Sey ka to̧o̧n máa, mí kim moo; mí maam zá̧ga̧ hȩn sənnélȩ́.” 'Ya̧'a̧ yɛ máa, zá̧ga̧ du̵u̵ɨ; zá̧ga̧ hȩn sənné wu̵ ɓəə yɛ nɔ!

³Moo woo nɔ, vɔ́ vi̧i̧n nán tóó vu̵ zó̧ó̧ né sá̧ḿ, moo ka vu̵n ká̧ŋ́ yúú ya̧g ba'ad vóólı̵́ yɛlı̵́.

⁴A̧máa vɔ́ mbaa mbaalı̵́ nán ba'ad Tayɨɨ woo vu̵ yu̵. Vɔ́ ma' zó̧ó̧ ya hȩn ndɔ́gɔné vu̵lı̵́, kan hȩn gíḿ vu̵, kan ya zó̧ó̧ ndɔ́gɔné vu̵lı̵́ á̧ḿ.

⁵Ká vu̵ gbɔ́ vɔ́; vu̵ tú̵' vɔ́; dúú vu̵ duun vɔ́ kan moo; ba'ad vu̵ mba vɔ́ kɛb; nəm ɓu̵u̵n wu̵lı̵́ né; hȩn lálı̵́ gee á̧ḿ.

⁶Vɔ́ kɔ́ hȩn maa du̵u̵ mɛ́ń; vɔ́ gaa hȩn; vɔ́ ma' zó̧ó̧; vɔ́ kɔ́ zó̧ó̧ nán. Yigid Tayɨɨ woo maa vɔ́; vɔ́ hí̧í̧ nán vu̵ kan zó̧ó̧ vóó 'waapád.

⁷Vɔ́ moo moo yȩ́ń; vɔ́ kɔ́ ba'ad kan néélȩ́ Tayɨɨ woo. Vɔ́ dii kan moo yȩ́ń Tayɨɨ woo kɔ́ ı̵́ go̧ŋ sɨɨ kan táa wɔgɔ.

⁸Nán tóó vu̵ na' vɔ́, tóó vu̵ ɓéé vɔ́, tóó vu̵ o̧ moo ɓı̵́d yúú vóólı̵́, tóó vu̵ o̧ moo to̧o̧. Nán vu̵ ho̧ vɔ́ kɔ́ ı̵́ nán vbád vu̵ wɔgɔ, a̧máa vɔ́ nán yȩ́ń vu̵ yu̵!

⁹Nán vu̵ mbaa kɔ́ ı̵́ ku̵u̵ gaan vɔ́ né wɔgɔ, a̧máa vu̵ gaa vɔ́ gínú! Vu̵ baa ho̧ vɔ́ vóó nɔmná, a̧máa vɔ́ mbaa vóó zá̧a̧dná. Nán vu̵ si̧'i̧d vɔ́, a̧máa vu̵ nɔɔn vɔ́ né.

¹⁰Vu̵ vi̧i̧ vɔ́ zó̧ó̧, a̧máa vɔ́ mbaa vóó sey 'waapád kan zó̧ó̧ dȩ"ȩ́. Vu̵ ho̧ vɔ́ vóó nán gíḿ vu̵, a̧máa nán ɓu̵u̵lı̵́ na'a vu̵ nuŋ hȩn naa yúú vóólı̵́. Vɔ́ mbaa kɔ́ ı̵́ nán hȩn nagá pɛ́lı̵́ vu̵ wɔgɔ, a̧máa vɔ́ dɨ vóó kan hȩn 'waapáddú̵.

¹¹Dan kirtȩ́n ı̵́ Koríńtilí vu̵, vɔ́ tu̵'u̵ zó̧ó̧ vóó, vɔ́ o̧d ví moo 'waapád.

¹²Vɔ́ hí̧í̧ ví kan zó̧ó̧ vóó 'waapád, a̧máa ı̵́ víí, ví hí̧i̧n vɔ́ ı̵́ yo̧go̧ né.

¹³Mí o̧d ví moo yɛ kɔ́ ı̵́ waa ba'a ka o̧d waa woo vu̵ máa wɔgɔ. I tú'ud vɔ́ hí̧í̧lí̧ víí kɔ́ ı̵́ kóó tú'ud ví yɛ wɔgɔ á̧ḿ.

¹⁴I sú̵g kɔ́ ba'ad kan nán gaa Tayɨɨ sá vu̵ sá. Dəŋ née nán to̧o̧g Tayɨɨ woo wú̵ń dɔ́ń kan nán maag Tayɨɨ woo vu̵lá? Ya túlí dəŋ née ka sú̵g mbaa kan ya dimmá?

¹⁵Dəŋ née Krístu wú̵ń to̧n kan Seeɗánná? Tóó tée, hȩn a su̵gu̵n nán zó̧ó̧ 'yɛ́lı̵́ vu̵ kan nán ku̵u̵ 'yɛ́n zó̧ó̧ voo Tayɨɨ woolı̵́ né máa, wu̵ ȩná?

¹⁶Dəŋ née lig hȩn ha"ı̵́ Tayɨɨ woo wú̵ń mbaa hȩn dágá kan lig hȩn ha"ı̵́ nán gaa Tayɨɨ sá voolá? Moo ba ví baa lig hȩn ha"ı̵́ Tayɨɨ ı̵́ zá̧a̧d woo nɔ kɔ́ ı̵́ Tayɨɨ aga ka o̧ wɔgɔ, o̧: “Míń mbaa voolı̵́ sa̧a̧mé, míń 'yȩm kan vu̵. Míń mbaa Tayɨɨ voo, vú̵ń mbaa zig míí vu̵ á̧ḿ.”

¹⁷Moo woo nɔ ı̵́ 'yɛ́lı̵́ Tayɨɨ o̧: “I kéé vu̵ gbɔ, i hı̵́'ı̵́n kan vu̵ ú̵! I za' hȩn zó̧ó̧ fá̧á̧lȩ́ míí yȩ vu̵ sá, tée míń fȩȩ ví ya míílí̧.

¹⁸Míń mbaa Ba' víí. Ví á̧ḿ, víń mbaa waa míí vu̵.” Ɨ́ 'yɛ́lı̵́ ka mba hȩn 'waapád yȩ o̧ ı̵́ yo̧go̧.