Read Dii 2 NÁN KORÍŃTI VɄ 7 Bible Online

2 NÁN KORÍŃTI VɄ 7 - Dii bible

2 NÁN KORÍŃTI VɄ 7

¹Dan gboo vu̵, Tayɨɨ ká tad ba ví ya̧g yȩ vu̵ sú̵'ú̵. Moo woo nɔ ba tɛ ví hȩn ka vi̧i̧ fó̧ó̧ baa ví, kan zó̧ó̧ baa ví á̧ḿ yȩ vu̵ gbɔ. Ba ndɔg ví Tayɨɨ, ba sȩn ví fó̧ó̧ moo mbaalı̵́ kɔ́ ı̵́ ka hí̧í̧ wɔgɔ kəd.

²I tú'ud vɔ́ hí̧í̧lí̧ víí ú! Vɔ́ kɔ́n nán tóó hȩn kə̧ə̧g né, vɔ́ tun hȩn nán tóó woo né, vɔ́ ɓɛ hȩn nán tóó woo ha'an ı̵́ vóólı̵́ né á̧ḿ.

³Mí o̧n ví moo yɛ moo bi sə̧'ə̧n ví mooɨ né. Ká mí o̧d ví sı̵́ tíŋ́ŋɔ́, vɔ́ hí̧í̧ ví dɨ zó̧ó̧lȩ́, a moo nɔmme tée, ba sú̵g nɔɔ ví á̧ḿ, tóó tée, ba sú̵g mbaa ví zá̧a̧dná á̧ḿ.

⁴Mí 'yɛ́ zó̧ó̧ míí 'waapád dɨ víílí; mí dəm fó̧ó̧ míí yúú víílí á̧ḿ. Mí nuŋ zó̧ó̧ ziginí wu̵lı̵́. Kóó oo nuŋ hȩn ndɔ́gɔné nɛ́nná si̧', zó̧ó̧ míí dȩ' á̧ḿ.

⁵Sey kóó ya̧ hág Masedo̧wá̧nné máa, vɔ́ nugun ya wə̧m waaná' aga né sá̧ḿ. Hȩn vu̵ mba vɔ́ kɛb ya 'waapád. Vɔ́ bágán fó̧ó̧ kan vu̵, máa dú̵ú̵ dɨ zó̧ó̧ vóólı̵́ á̧ḿ.

⁶A̧máa Tayɨɨ wu̵ zigid nán daga ku̵u̵ mba vu̵ máa zó̧ó̧ voo. Sey Tíd ka ya̧ ya máa, vɔ́ nuŋ zó̧ó̧ ziginí wu̵lı̵́ ú̵ á̧ḿ.

⁷Vɔ́ nugun zó̧ó̧ ziginí moo yaalı̵́ woo nɔ dágá né, a̧máa moo ka o̧d vɔ́ ba vínnɔ zigid bi zó̧ó̧ á̧ḿ má nɔ. Pá'ad vɔ́ ba vín hí̧í̧ bi ho̧n á̧ḿ, zó̧ó̧ ba ví̧i̧ ví moo míílí̧, ba vín hí̧í̧ bi sɨɨnɔ́. Moo woo nɔ, zó̧ó̧ míí duu dȩ' mba hȩn á̧ḿ.

⁸Moo woo nɔ, kóó a̧n vi̧i̧ ví zó̧ó̧ kan ɗerwəl míí yȩ ó̧ si̧', mí gbɔ́n dam né. Ká mí gbɔ́ dammɔ́, moo mí ho̧ ɗerwəl woo vi̧i̧ ví zó̧ó̧ waaná"ó̧.

⁹A̧máa 'ya̧'a̧ yɛ zó̧ó̧ dȩ'ȩn sú̵'ú̵. Zó̧ó̧ dȩ'ȩn mí moo zó̧ó̧ víí ka ví̧i̧n má nɔ né, a̧máa moo zó̧ó̧ ví̧i̧ní víí yȩ kɔ́, ví tii zó̧ó̧ víí, moo zó̧ó̧ ví̧i̧ ví kɔ́ ı̵́ Tayɨɨ ka hí̧í̧ wɔgɔ; hȩn tóó lı̵́n ví yúú vóólı̵́ né.

¹⁰Zó̧ó̧ ví̧i̧ní ka yaa kɔ́ ı̵́ Tayɨɨ ka hí̧í̧ wɔgɔ máa, wu̵ pa̧ŋ zó̧ó̧ tiiní yaan, wu̵ səd nán vu̵. Hȩn woo ba gbɔ́n dam wu̵lı̵́ né á̧ḿ. A̧máa zó̧ó̧ ví̧i̧ní ı̵́ hágá yɛlı̵́ wu̵ yaan kan nɔm.

¹¹A̧máa zó̧ó̧ ví̧i̧ní víí Tayɨɨ ka hí̧í̧wo̧ sú̵'ú̵ yȩ, kɔ́ ví pi zó̧ó̧, ví kpad ya̧g, ví kɔ́ zó̧ó̧ yȩ́ȩ́, ví kɔ́ dú̵ú̵, ví tú' bin hí̧í̧ bi ho̧nnɔ́, ví duu faa zó̧ó̧ pi, ví sə̧' moo dȩ"ȩ́ na'a á̧ḿ. Máa hȩn yȩ vu̵ tú' moo nán yȩ woo ba kan ví sı̵́ né.

¹²Ká mí bíńda ví ɗerwəl yȩ moo nán ka kɔ́n hȩn kə̧ə̧g yȩ woo nɔ né, a̧máa mí bíńda moo nán ku̵u̵ kɔ́ddu̵ hȩn kə̧ə̧g yȩ woo nɔ né á̧ḿ; ma mí bíńda moo zó̧ó̧ pilí víí yúú vóólı̵́ yȩ a kiy sa̧a̧m víílí, kan tíŋ́ Tayɨɨ woolı̵́ á̧ḿ.

¹³Moo woo nɔ ma, vɔ́ nuŋ zó̧ó̧ ziginí wu̵lı̵́. A̧máa vɔ́ nugun zó̧ó̧ ziginí moo vóó nɔ dágá né. Vɔ́ dȩ' zó̧ó̧ yúú zó̧ó̧ dȩ"ȩ́ Tíd woo ka nuŋ zó̧ó̧ ka̧"ȩ́ nag víílí yȩlȩ́ á̧ḿ.

¹⁴Dəmné máa ká mí dəm ví, káń pá'ad Tíd moo víí máa, Tíd ho̧ ba moo yȩ́ńne á̧ḿ. Hȩn káń o̧ yúú víílí tíŋ́ Tíd woolı̵́ máa, Tíd nuŋ ba moo yȩ́ńne gínú kɔ́ ı̵́ kóó baa o̧d ví moo yȩ́ń yúú hȩn 'waapáddı̵́ máa wɔgɔ.

¹⁵Tíd 'yɛ́ zó̧ó̧ woo dɨ sı̵́ víílí á̧ḿ, moo kíí tu̵u̵ fȩȩnɔ, kíí kiddu̵ tɔ́g á̧ḿ 'waapád má nɔ. Hȩn kíí kɔ́d Tíd yȩ, zán né sá̧ḿ!

¹⁶Zó̧ó̧ dȩ'ȩn moo mí 'yɛ́ zó̧ó̧ míí dɨ víílí yúú hȩn kɔ́lı̵́ víí 'waapád yȩlȩ́.