Read Dii 2 NÁN KORÍŃTI VɄ 8 Bible Online

2 NÁN KORÍŃTI VɄ 8 - Dii bible

2 NÁN KORÍŃTI VɄ 8

¹Dan kirtȩ́n vu̵, vɔ́ hí̧í̧ bi o̧d ví hȩn Tayɨɨ ka tú' zó̧ó̧ nán woo nán sú̵ggı̵́ hág Masedo̧wá̧nné voolı̵́ má nɔ.

²Vu̵ duun vu̵ kan moo du̵u̵n də́ń né, a̧máa kóó u̵u̵ mbaa gíḿná dam pɛ́lı̵́ ú̵ si̧', zó̧ó̧ dȩ' vu̵ dȩ"ȩ́ gbo̧o̧ mɛ́ń. Vu̵ hí̧í̧ hȩn pú̵lı̵́ kan zó̧ó̧ voo 'waapád.

³Mí o̧d ví vu̵ pú̵ hȩn ka maa pú̵lı̵́ má nɔ, ma vu̵ duu pú̵ mba hȩn á̧ḿ. Aga

⁴vu̵u̵ 'máá vɔ́, moo vu̵ hí̧í̧ bi su̵g hȩn ba'ad dɔg nán Tayɨɨ woo ı̵́ hág Yúúdalı̵́ vu̵ yu̵.

⁵Vu̵ pú̵ hȩn mba hȩn ı̵́ kóó taa máa á̧ḿ. Vu̵ dəŋ pú̵ ı̵́ 'yɛ́lı̵́ baa ví fó̧ó̧ voo, ma vu̵ duu pú̵ hȩn nagá voo vu̵ kɔ́ ı̵́ Tayɨɨ ka hí̧í̧ wɔgɔ á̧ḿ.

⁶Moo woo nɔ ma, vɔ́ ba' Tíd laan víílí, moo a laan tíŋ́ kan ba'ad du̵u̵ woo yȩ kɔ́lı̵́ kɔ́ ı̵́ ka dəŋ kɔ́lı̵́ yȩ wɔgɔ.

⁷Ví dɨ kan hȩn 'waapáddú̵; zó̧ó̧ 'yɛ́lı̵́ dɨlı̵́, kan moo moolȩ́, kan moo gaalı̵́, kan zó̧ó̧ pilí ɓu̵u̵lı̵́ na'a, kan hí̧í̧lí̧ máa kíí hí̧í̧ vɔ́ yȩ á̧ḿ. Moo woo nɔ, vɔ́ hí̧í̧ i tú' hȩn naa víí vu̵ yúú ba'ad du̵u̵ yȩlȩ́ á̧ḿ.

⁸Mí pan ví mooɨ né, a̧máa nán tóó ku̵u̵ pi zó̧ó̧ yȩ, mí hí̧í̧ bi ho̧ zó̧ó̧ nán víí yȩ yȩ́ń woo nɔ á̧ḿ,

⁹moo ví gaa zó̧ó̧ nán ı̵́ 'yɛ́lı̵́ baa ví Yesu Krístu woo ú̵. Ká nán naaɨ, a̧máa tii nán gíḿ, moo i nuŋ naa yúú gíḿ woo yȩlȩ́.

¹⁰Mí taa míí ba'ad yȩ ban fȩn víw. Ká vee ví dəŋ ba'ad yȩ hí̧í̧lí̧ sú̵'ú̵, ma ví kɔ́.

¹¹'Ya̧'a̧ yɛ máa, i laan tíŋ́ kan kɔ́lı̵́ woo, a sí̧' la gbug kan hȩn kíí dɨ kannɔ kɔ́ ı̵́ kíí hí̧í̧ tíŋ́ yȩ wɔgɔ.

¹²Nán a pú̵ kan zó̧ó̧ woo 'waapád tée, Tayɨɨ fȩȩ hȩn woo ka dɨ kannɔ, ma ka ha'adu̵ yȩ sú̵'ú̵, a̧máa Tayɨɨ duu vin hȩn ı̵́ nán ka 'yɛ́n né máa né.

¹³Mí o̧n ví moo yɛ moo i pú̵ nán tóó vu̵ hȩn tée, i mbaan víí gíḿná né, a̧máa moo hȩn a man ví kííd.

¹⁴'Ya̧'a̧ yɛ máa, ví dɨ kan hȩn ɓu̵u̵lı̵́ na'a hágá yɛlı̵́ sú̵'ú̵, tée i pú̵ da ba ví kirtȩ́n ı̵́ hág Yúúdalı̵́ ku̵u̵ mbaa gíḿná yȩ vu̵ á̧ḿ. Sey tóólı̵́ tée vú̵ńnɔ 'yɛ́ hȩn ɓu̵u̵lı̵́ na'a mba ví, tée vú̵ń duu vȩ' pú̵ ví, moo hȩn a man kííd

¹⁵kɔ́ ı̵́ debtere ka o̧ wɔgɔ, o̧: “Nán ı̵́ ka su̵g hȩn na'a máa, ka gú̵g tée, hi̧' kée né, a̧máa nán ı̵́ ka su̵g waaná' máa, ka gú̵g tée, hi̧' á̧ḿ.”

¹⁶Vɔ́ dȩn Tayɨɨ nag, ka kɔ́ zó̧ó̧ Tíd woo ka pi, ka hí̧í̧ ví á̧ḿ yȩ nɔ.

¹⁷Tíd ki moo vóó kóó o̧ddu̵ a laa víílí yȩ ó̧. A̧máa zó̧ó̧ woo ká pi moo laalı̵́ víílí á̧ḿ.

¹⁸Vu̵ sú̵g laa kan da ba ví kirtȩ́n ı̵́ nán sú̵ggı̵́ 'waapád ku̵u̵ dəmmɔ yúú moo to̧o̧ 'maŋ palı̵́ woolı̵́ yȩ nɔ.

¹⁹Vɔ́ ba'anɔ moo woo nɔ dágá né, a̧máa nán sú̵ggı̵́ vu̵u̵ yeewu̵, moo a maa vɔ́ hȩn pú̵lı̵́ zó̧ó̧ nán, nán ku̵u̵ su̵g yȩ pa̧née. Ɨ́ 'yɛ́lı̵́ baa ví wú̵ń nuŋ na"ȩ́ wu̵lı̵́; báń tú' ví zó̧ó̧ pilí baa ví yúú woolı̵́ á̧ḿ.

²⁰Vɔ́ gág moo nán tóó a ká̧ŋ́ yúú ba'ad kóó dɨ kɔ́lı̵́ yúú hȩn pú̵lı̵́ gbo̧o̧ yɛlı̵́ sá,

²¹moo vɔ́ soo hȩn a to̧o̧d ı̵́ 'yɛ́lı̵́ Yesu, kan nánán vu̵ á̧ḿ má nɔ.

²²Vɔ́ su̵g ba' vu̵ kan da ba ví kirtȩ́n tóó kóó gu̵ggu̵ ho̧ yúú hȩn kə́dkə́d vu̵lı̵́, kóó gaa ba dɨ kan zó̧ó̧ pilí ú má nɔ. Wu̵ pi zó̧ó̧ mba 'ya̧'a̧ yɛ á̧ḿ, moo ka 'yɛ́ zó̧ó̧ woo ɓu̵u̵lı̵́ na'a yúú víílí yȩlȩ́.

²³Tíd woo máa dan 'yȩ́ȩm, dan ba'ad kɔ́lı̵́ moo víí nu á̧ḿ. Da vɔ́ 'yȩ́ȩm tóó yȩ vu̵, nán sú̵ggı̵́ vu̵u̵ ba' vu̵, moo Krístu a nuŋ na"ȩ́ moo voo á̧ḿ.

²⁴Tée i tú'ud vu̵ hí̧í̧lí̧ ı̵́ moo yȩ́ńne, moo há̧á̧ nán sú̵ggı̵́ u̵u̵ gaa ba vɔ́n dəm ví yagalı̵́.