Read Dii 2 NÁN KORÍŃTI VɄ 9 Bible Online

2 NÁN KORÍŃTI VɄ 9 - Dii bible

2 NÁN KORÍŃTI VɄ 9

¹Maan ba mín duu bíńda ví ɗerwəl yúú hȩn pú̵lı̵́ kíí ba'ad nán Tayɨɨ woo vu̵ hág Yúúdalı̵́ yȩlȩ́ né,

²moo mí gaa zó̧ó̧ pilí víí yúú woolı̵́ ú̵, ma mí baa dəm ví nán Masedo̧wá̧n voolı̵́ tíŋ́, mí o̧: “Da ba ví kirtȩ́n ı̵́ hág Akáyyı̵́ vu̵ mbɔ́g moo yȩ 'waa sı̵́ voo ká vee ú̵.” Zó̧ó̧ pilí víí wu̵ pú̵ nán ɓu̵u̵lı̵́ na'a vu̵ néélȩ́ ma, vu̵ hí̧í̧ bi kɔ́ á̧ḿ.

³A̧máa mí ba' da ba ví kirtȩ́n yȩ vu̵ laa víílí, moo i mbɔ́g hȩn laa vɔ́ ú̵, moo hȩn dəmné vóó yúú víílí yɛ a mbaa hȩn lee sá.

⁴Tow nán Masedo̧wá̧n tóó u̵u̵ laa kan mí, ma u̵u̵ ho̧ vín mbɔ́gɔ ná hȩn yȩ vu̵ né tée, sȩ́ḿ kan kɔ́n, kan tiid ví hȩn sȩ́ḿ á̧ḿ.

⁵Moo woo nɔ mí o̧d da ba ví kirtȩ́n yɛ vu̵ u̵u̵ ɓə́ə́ la laan víílí pi nu, moo u̵u̵ mbɔ́g hȩn kíí ta ya̧g wu̵lı̵́ yȩ laan mí ú̧, moo a mbaa hȩn pú̵lı̵́ kan zó̧ó̧ to̧o̧ȩ; hȩn kɔɔg a sá.

⁶A̧máa mí hí̧í̧ i gaa nán ka ba hȩn waaná' tée, wú̵ń nuŋ waaná' á̧ḿ. Ɨ́ ka ba ɓu̵u̵lı̵́ na'a tée, wú̵ń nuŋ ɓu̵u̵lı̵́ na'a á̧ḿ.

⁷Moo woo nɔ kóó nɔ́nná a pú̵ hȩn ka taa bi pú̵ zó̧ó̧ woolı̵́ má nɔ. A̧máa kan kɔɔg, kan zó̧ó̧ ví̧i̧níi pɛ́lı̵́, moo Tayɨɨ hí̧í̧ nán ka pú̵ kan zó̧ó̧ dȩ"ȩ́ má nɔ.

⁸Tayɨɨ a hí̧í̧ tée, wú̵ń bag ví hȩn; víń nuŋ hȩn kə́dkə́d ɓu̵u̵lı̵́ na'a, moo i nuŋ hȩn ka maa ví 'waapád sey 'waapád, wú̵ń mba á̧ḿ, tée víń kɔ́ hȩn du̵u̵ ɓu̵u̵lı̵́ na'a á̧ḿ

⁹kɔ́ ı̵́ debtere ka o̧ wɔgɔ, o̧: “Yȩ' hȩn woo pú̵ nán gíḿ vu̵ yu̵, pú̵ hȩn kan zó̧ó̧ nán woo gbɔn né sá̧ḿ.”

¹⁰Tayɨɨ wu̵ pú̵ nán hȩn á̧á̧, ma ba; wu̵ pú̵ nán beréd, ma lá. Wú̵ń pú̵ ví hȩn á̧á̧ za̧a̧ná, wú̵ńnɔ kɔ́ ma, ba'ad du̵u̵ kíí kɔ́ yȩ wú̵ń laa tíŋ́.

¹¹Wú̵ń tii ví nán naa, moo i pú̵ nán tóó vu̵ hȩn kan zó̧ó̧ víí 'waapád, tée nán ɓu̵u̵lı̵́ na'a vú̵ń dȩn Tayɨɨ nag yúú hȩn pú̵lı̵́ víí ku̵u̵ nuŋ nag vóólı̵́ yȩlȩ́.

¹²Ba'ad kíí kɔ́ yȩ, ví kɔ́n séý fó̧ó̧ nán Tayɨɨ woo voo vu̵ yu̵ dágá né, a̧máa nán ɓu̵u̵lı̵́ na'a vú̵ń dȩn Tayɨɨ nag wu̵lı̵́ á̧ḿ.

¹³Vú̵ń na' Tayɨɨ moo kíí kɔ́ ba'ad yȩ́ń yȩ, kíí duu moo to̧o̧ 'maŋ yúú Krístu woolı̵́, kíí pú̵ vu̵ hȩn kan zó̧ó̧ to̧o̧ yȩ, nán tóó vu̵ nuŋ wu̵lı̵́ á̧ḿ.

¹⁴Vú̵ń dȩn Tayɨɨ nag yúú víílí, vú̵ń hí̧í̧ ví kan zó̧ó̧ voo 'waapád, moo Tayɨɨ ka bag ví hȩn na'a yȩ nɔ.

¹⁵Ba na' ví Tayɨɨ moo hȩn pú̵lı̵́ woo ka mba hȩn 'waapád yȩ nɔ.