Read Dii NÁN GALÁD VɄ 1 Bible Online

NÁN GALÁD VɄ 1 - Dii bible

NÁN GALÁD VɄ 1

¹Mí Póllu̵, waa ba'ad ı̵́ Yesu Krístu woo kan ı̵́ Ba'á Tayɨɨ ka nimmɔ nɔmmé yȩ woo nɔ á̧ḿ. Nánán vu̵u̵ yeen mí ní, vu̵u̵ ba'an mí ní á̧ḿ.

²Vɔ́ sú̵g kan da vɔ́ kirtȩ́n ı̵́ kóó mbaa kan vu̵ á̧ḿ yɛ vu̵, vóo bíńda ɗerwəl yɛ ba'ad ví, nán sú̵ggı̵́ hág Galáddı̵́ yȩ víw.

³Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

⁴Yesu wu̵ pú̵ fó̧ó̧ woo moo hȩn ɓı̵́d baa ví, moo bi vud ba ví ya mbaalı̵́ ɓı̵́d baa ví hágá yɛlı̵́ kɔ́ ı̵́ Tayɨɨ Ba' baa ví ka hí̧í̧ wɔgɔ.

⁵Tayɨɨ wu̵ maa aa na"o̧ ví há̧á̧ káákáá, aamɛ́n!

⁶Káń ho̧ kíí há̧á̧ tii duu moo tú"í tóó, kíí kéé Tayɨɨ ı̵́ ka bee ví kan zó̧ó̧ nán Krístu woo gbɔ yȩ, kɔ́nna ɓá'.

⁷Moo yȩ́ńná, moo to̧o̧ 'maŋ tóó pɛ́lı̵́ sá̧ḿ! A̧máa nán tóó vu̵ yú̵ń ví moo, moo bi á̧ moo to̧o̧ 'maŋ Krístu woo yɛ gbɔ ú̵.

⁸A̧máa kóó fó̧ó̧ vóó, kóó maleeka tóó be"ı̵́, ka tú'ud ví moo to̧o̧ 'maŋ tóó kə́d yúú ı̵́ kóó tú'ud ví yɛlı̵́ tée, Tayɨɨ a ga'adu̵ naggɨ!

⁹Ká mí o̧d ví sú̵'ú̵; mí duu faa o̧d ví tóó: nán tóó ka tú'ud ví moo to̧o̧ 'maŋ tóó kə́d yúú ı̵́ kíí fȩȩwo̧ yɛlı̵́ tée, Tayɨɨ a ga'adu̵ naggɨ!

¹⁰Yee mí o̧ moo yɛ a to̧o̧d nánán vu̵ yaa? Tóó tée, a to̧o̧d Tayɨɨa? Tóó tée, moo nán u̵u̵ hí̧i̧n wu̵láa? A ı̵́ yo̧go̧ tée, mí kɔ́n ba'ad Krístu woo nɔ né.

¹¹Dan kirtȩ́n vu̵, mí hí̧í̧ i gaa moo to̧o̧ 'maŋ káń dɨ palı̵́ yɛ, nánán vu̵u̵ yɨmmɔ né.

¹²Mí nugunɔ nán tóó woolı̵́ né; nán vu̵u̵ tú'un mí ní á̧ḿ, a̧máa aga Yesu Krístu wu̵ tú'un.

¹³Ví ki sey ká káń duu lá moo Tayɨɨ tú"í nán Yúúda voo máa, ví gaa ba mín duun nán sú̵ggı̵́ Tayɨɨ woo vu̵ kan hȩn ɓı̵́d ɓu̵u̵lı̵́ na'a. Mín sȩn fó̧ó̧ bi tud vu̵ ú̵ máa á̧ḿ.

¹⁴Míi pi zó̧ó̧ mba dan kóó duu moo Tayɨɨ tú"í nán Yúúda voo máa vu̵ á̧ḿ. Mí duu də́ń hȩn dikab ı̵́ nii vóó voo nɔ.

¹⁵A̧máa sey ka to̧o̧d Tayɨɨ, ı̵́ ka yeen sii na' míí woolı̵́, ka been kan zó̧ó̧ nán woo yȩ máa,

¹⁶wu̵ tú'un Waa woo, moo a̧n pad nán ı̵́ ku̵u̵ Yúúda pɛ́lı̵́ máa vu̵ moo to̧o̧ 'maŋ woo yɛ ú̵. Mí la vin nán tóó né á̧ḿ.

¹⁷Mí dɔgɔn waa ba'ad ı̵́ ku̵u̵ kɔ́ ba'ad tíŋ́ míílí̧ máa voolı̵́ Yerúsalemmé né á̧ḿ. A̧máa mí daa laa hág Arábbı̵́, ma mí duu vȩ́' ya kaa Damásdı̵́.

¹⁸Ve' ta̧a̧nɔ́ ka ya̧a̧ máa, mí dɔg Yerúsalemmé, moo bi la ho̧ Piɛ́r[1] wu̵. Vɔ́ mbaa á̧ḿ, alad idú.

¹⁹Mí ho̧n waa ba'ad Yesu woo tóó né, séý Yaakúbu ı̵́ 'yɛ́lı̵́ daa sá̧ŋ́ŋɨ.

²⁰Moo káń bíńda o̧d ví yɛ, mí o̧ dɨ tíŋ́ Tayɨɨ woolı̵́, mí kɔ́n vbáddɨ né.

²¹Pig woolı̵́ mí daa yaa hág Siiríilí, kan Silisíi.

²²A̧máa sey woolı̵́ nán kirtȩ́n hág Yúúdalı̵́ vu̵ ho̧ ya̧g túń míí gaa né.

²³Vu̵ ki də́ń kilíi: “Nán ka duun ba ví kan moo na'a pee, duu moo zó̧ó̧ 'yɛ́lı̵́ baa ví ka sɛ́n né pee, duu pa moo woo á̧ḿ.”

²⁴Ma vu̵ baa na' Tayɨɨ moo míílí̧ á̧ḿ.