Read Dii NÁN GALÁD VɄ 2 Bible Online

NÁN GALÁD VɄ 2 - Dii bible

NÁN GALÁD VɄ 2

¹Pig woolı̵́ ve' ka ya̧a̧ wa̧nɓó' zu̵u̵ ndaddú̵ máa, mí duu vȩ́' dɔg Yerúsalemmé. Vɔ́ dɔg kan Baanábas á̧ḿ. Mí pa̧ŋ kan Tíd á̧ḿ.

²Mí dɔg wu̵lı̵́ moo Tayɨɨ wu̵ yu̵g o̧n ba a̧n dɔggú̵. Vɔ́ sú̵g kan nán sú̵ggı̵́ vu̵, mí mbad vu̵ moo to̧o̧ 'maŋ káń tú'ud zig ı̵́ ku̵u̵ Yúúda pɛ́lı̵́ yȩ vu̵. Pig woo máa, mí duu mbad ı̵́ nii voo vu̵ moo á̧ḿ, moo mí hí̧í̧ bi ki ba'ad míí a yagalı̵́ tɛ́ nɔ.

³Kóó Tíd a nán Gɛrɛ́g kóó laa á̧ḿ yȩ nɔ si̧', vu̵ duunɔ moo do̧ŋ dɔ́lı̵́lı̵́ né á̧ḿ.

⁴A̧máa nán kirtȩ́n vbád tóó ku̵u̵ yá̧á̧n kan vɔ́ wu̵lı̵́ á̧ḿ máa, vu̵ hí̧í̧ bi dɔddu̵ do̧ŋŋɨ. Nán yȩ vu̵ pu̧u̧ dɔ́ ya sa̧a̧m nán sú̵ggı̵́ vóólı̵́, vu̵ pí̧í̧ vɔ́ yúú moo mbaalı̵́ waa vóó yúú Yesu Krístu woolı̵́ yȩlȩ́, moo oo tii gba'a voo vu̵ yu̵.

⁵A̧máa vɔ́ kin vu̵ vóó tɔ́g né sá̧ḿ, moo moo to̧o̧ 'maŋ a mbaa víílí yȩ́ńná.

⁶A̧máa nán ı̵́ ku̵u̵ ho̧ vu̵ ku̵u̵ ı̵́ nii vu̵ máa (hȩn tóó kan mí míí wu̵lı̵́ né, moo Tayɨɨ sə̧'ə̧n woo moo, moo nɔ́ɔ́ nánánne né), nán yȩ vu̵ duu tú' moo 'maŋ tóó ha'an mí ní á̧ḿ.

⁷A̧máa ku̵u̵ ki máa, vu̵ ho̧ Tayɨɨ ba wu̵ pú̵n ba'ad a̧n kɔ́d nán ı̵́ ku̵u̵ Yúúda pɛ́lı̵́ máa vu̵, moo moo to̧o̧ 'maŋŋɨ, kɔ́ ı̵́ ka pú̵ Piɛ́r a pad nán Yúúda vu̵ yȩ wɔgɔ.

⁸Moo Tayɨɨ ka pú̵ Piɛ́r néélȩ́ waa ba'ad yúú nán Yúúda voolı̵́ yȩ, wu̵ pú̵n néélȩ́ waa ba'ad yúú nán ı̵́ ku̵u̵ Yúúda pɛ́lı̵́ máa voolı̵́ á̧ḿ.

⁹Yaakúbu vu̵ kan Piɛ́r,[2] kan Yoohá̧na, ku̵u̵ mbaa kɔ́ ı̵́ 'yɛgɛ ndam wɔgɔ nán zó̧ó̧ 'yɛ́lı̵́ voolı̵́ yȩ, vu̵ ki zó̧ó̧ nán Tayɨɨ ka kɔ́n yɛ, ma vu̵ pú̵ vɔ́ nag kan Baanábas, moo ya̧g talı̵́ɨ, vu̵ o̧d vɔ́: “I laa víí nán ı̵́ ku̵u̵ Yúúda pɛ́lı̵́ máa voolı̵́, vɔ́ laa vóó nán Yúúda voolı̵́.”

¹⁰Hȩn ku̵u̵ o̧ ha'ad vɔ́ dágá máa, vu̵ o̧: “Tée, i taa ya nán gíḿ yɛlı̵́ yɛ vu̵ ú̵.” Yúú hȩn yȩlȩ́ máa, mí 'yɛ́ zó̧ó̧ míí du̵u̵lı̵́.

¹¹A̧máa sey Piɛ́r ka yaa kaa Aŋtiósdı̵́ máa, mí lúú moo kannɔ ya sú̵ggı̵́lı̵́, moo ka kɔ́ hȩn sɔd yȩ nɔ.

¹²Ká tíŋ́ máa, Piɛ́r baa lá hȩn kan nán sú̵ggı̵́ ı̵́ ku̵u̵ Yúúda pɛ́lı̵́ máa vu̵ á̧ḿ. A̧máa sey Yaakúbu ka ba' nán tóó ku̵u̵ yaa woolı̵́ máa, Piɛ́r duu lán sı̵́ hȩn kan nán pee vu̵ nɔ́ɔ́ voolı̵́ né, moo Piɛ́r ndɔg nán ku̵u̵ ho̧ voo do̧ŋ dɔ́lı̵́ ba hȩn gbo̧o̧ȩ máa vu̵ yu̵.

¹³Piɛ́r vu̵ sú̵g kan nán Yúúda tóó vu̵, vu̵ woo Baanábas dɔd ba'ad ya̧g i'idú voo yȩlȩ́ á̧ḿ.

¹⁴Sey káń ho̧ ku̵u̵ kɔ́n hȩn kɔ́ ı̵́ moo to̧o̧ 'maŋ ka tú'un wɔgɔ yȩ́ńná né máa, mí o̧d zu̵u̵ Piɛ́r nɔ́ɔ́ nánán voolı̵́ 'waapád: “Mɔ́ nán Yúúdaɨ. Yɛlı̵́ máa mɔ́ duu mbaan sı̵́ kɔ́ ı̵́ nán Yúúda wɔgɔ né. Ma mɔ́ń kɔ́ née pȩ́ń mɔ́ń yú nán ı̵́ ku̵u̵ Yúúda pɛ́lı̵́ máa vu̵ u̵u̵ duu hȩn dikab nán Yúúda voo nɔlá?”

¹⁵Ba ví baa waa Yúúda vu̵ yu̵. Ba ví zig nán tóó ku̵u̵ kɔ́ hȩn ɓı̵́d máa vu̵ yu̵ pɛ́lı̵́.

¹⁶Ba gaa ví nán vu̵ to̧n kan Tayɨɨ moo ku̵u̵ 'yɛ́ zó̧ó̧ Yesu Krístu woolı̵́ má nɔ, a̧máa moo dooká Múúsa woo duulíi pɛ́lı̵́. Ba ví á̧ḿ, ba 'yɛ́ ví zó̧ó̧ Yesu Krístu woolı̵́, moo ba to̧n ví kan Tayɨɨ wu̵lı̵́, a̧máa moo dooká duulíi pɛ́lı̵́. Kóó nán dágá aga to̧n kan Tayɨɨ moo dooká duulíi ní.

¹⁷A̧máa tow aa soo ví to̧nné kan Tayɨɨ yúú Krístu woolı̵́ tée, ba gaa ví ban ví nán hȩn ɓı̵́d kɔ́lı̵́ɨ á̧ḿ. Moo yɛ tú' Krístu ba kɔ́ ba'ad hȩn ɓı̵́ddɨ á̧ḿmaa? Pɛ́lı̵́ sá̧ḿ!

¹⁸A̧n duu kɔ́ hȩn káń há' yɛ tée, tú' ba mín kin dooká tɔ́g né.

¹⁹Ka' ı̵́ dooká Múúsa woolı̵́ máa, mí nɔɔ sı̵́ míí ú̧. Dooká sə̧' moo nɔm yúú míílí̧ sú̵'ú̵. Wu̵ nɔɔn, moo há̧á̧ a̧n mbaad Tayɨɨ zá̧a̧dná. Ká mí sú̵g nɔɔ kan Krístu la' vbagadı̵́ sú̵'ú̵;

²⁰'ya̧'a̧ yɛ máa, míi mbaan zá̧a̧d né, a̧máa Krístu wu̵ mbaa fó̧ó̧ míílí̧. Mbaalı̵́ ı̵́ káń dɨ mbaalı̵́ yɛ, mí mbaa sı̵́ mbaalı̵́ ı̵́ káń 'yɛ́ zó̧ó̧ Waa Tayɨɨ woolı̵́, ka hí̧i̧n, ka ɓɛ fó̧ó̧ woo pín wu̵lı̵́ má nɔ.

²¹Mí ɓéen zó̧ó̧ nán Tayɨɨ woo yȩ né. Tow nán u̵u̵ to̧n kan Tayɨɨ yúú dooká duulílí tée, tú' Krístu ba nɔɔ la té'.