Read Dii NÁN GALÁD VɄ 3 Bible Online

NÁN GALÁD VɄ 3 - Dii bible

NÁN GALÁD VɄ 3

¹Nán ya̧ŋ Galáddı̵́ yȩ víw, nóo ka zo' ví moolá? Vu̵ ga' Yesu Krístu la' vbagadı̵́. Vɔ́ tú'ud ví moo woo du̵u̵ na'a kɔ́ ı̵́ kíí ho̧ kan nɔ́ɔ́ víí nu zu wɔgɔ.

²Mí hí̧í̧ bi gaa hȩn dágá víílí. Ví nuŋ yigid Tayɨɨ woo moo kíí duu dooká Múúsa woo má naa? Tóó tée moo kíí ki moo to̧o̧ 'maŋ, ma kíí 'yɛ́ zó̧ó̧ Tayɨɨ woolı̵́ má naa?

³Moo ȩn ví duu mbaa ya̧ŋná á̧ḿmá? Ká ví dəŋ kɔ́ ba'ad kan yigid Tayɨɨ woo nɔ, ma 'ya̧'a̧ yɛ máa, ví hí̧í̧ bi si̧' kan néélȩ́ dáń bii naa?

⁴Víń tid hȩn kíí nuŋ yȩ vu̵ gbɔ la té"aa? Mí taa míí vú̵ń tin té' né.

⁵Ɨ́ ka pú̵ ví yigid woo, ka kɔ́ hȩn sa̧ga̧ gbo̧o̧ vu̵ víílí á̧ḿ yȩ, kɔ́ vu̵ moo kíí duu dooká Múúsa woo má naa? Tóó tée moo kíí ki moo to̧o̧ 'maŋ ma, kíí 'yɛ́ zó̧ó̧ Tayɨɨ woolı̵́ má naa?

⁶Moo woo nɔ ma, debtere Tayɨɨ woo o̧ moo yúú Ibrahí̧í̧ma woolı̵́ á̧ḿ: “Ibrahí̧í̧ma ká 'yɛ́ zó̧ó̧ woo Tayɨɨ woolı̵́, ma Tayɨɨ ho̧ zó̧ó̧ 'yɛ́lı̵́ woo, 'yɛ́gɛ nán to̧o̧g woo.”

⁷I gaa á̧ḿ, nán ku̵u̵ 'yɛ́ zó̧ó̧ Tayɨɨ woolı̵́ máa, vu̵ waa Ibrahí̧í̧ma woo vu̵ yu̵ yȩ́ńná.

⁸Debtere tú' Tayɨɨ ban to̧n kan nán ı̵́ ku̵u̵ Yúúda pɛ́lı̵́ máa vu̵ yúú zó̧ó̧ 'yɛ́lı̵́ voolı̵́; moo woo nɔ o̧d Ibrahí̧í̧ma moo to̧o̧ yȩ, o̧: “Tayɨɨ wú̵ń bag zig nán vu̵ 'waapád hȩn yúú móólȩ́.”

⁹Moo woo nɔ nán zó̧ó̧ 'yɛ́lı̵́ vu̵ nuŋ hȩn baggı̵́ kɔ́ ı̵́ Ibrahí̧í̧ma nán zó̧ó̧ 'yɛ́lı̵́ yȩ wɔgɔ á̧ḿ.

¹⁰A̧máa kóó nɔ́nná ka 'yɛ́ zó̧ó̧ woo dooká Múúsa woolı̵́ tée, Tayɨɨ ga'adu̵ sı̵́ naggú̵, moo debtere o̧: “Kóó nɔ́nná ka duun hȩn ku̵u̵ bíńda debtere Tayɨɨlı̵́ woolı̵́ yȩ vu̵ 'waan pád né tée, Tayɨɨ ga'adu̵ sı̵́ naggú̵.”

¹¹Ɨ́ yȩ máa yȩ́ńne. Nán tóó vu̵ to̧n kan Tayɨɨ yúú dooká Múúsa woolı̵́ né, moo debtere o̧ yúú zó̧ó̧ 'yɛ́lı̵́lı̵́, o̧: “Nán a 'yɛ́ zó̧ó̧ woo Tayɨɨ woolı̵́, tée Tayɨɨ sı̵́ń to̧n kannɔ, tée nán yȩ wú̵ń nuŋ vágád yȩ́ńná.”

¹²A̧máa moo dooká Múúsa woo kɔ́n ba'ad kɔ́ ı̵́ zó̧ó̧ 'yɛ́lı̵́ Tayɨɨ woolı̵́ wɔgɔ né, moo debtere duu o̧: “Nán ka duu dooká Múúsa woo vu̵ máa, wú̵ń nuŋ vágád yȩ́ńná ó̧.”

¹³Debtere duu o̧: “Nán ku̵u̵ ga"u̵ la' vbagadı̵́ máa, Tayɨɨ ga'adu̵ nag sú̵'ú̵,” ma Krístu tii hȩn nag ga"ı̵́ yúú baa vílí; moo woo nɔ dooká Múúsa woo duu ga'an ba ví sı̵́ nag né.

¹⁴Yesu kɔ́ ı̵́ yo̧go̧, moo nán ı̵́ ku̵u̵ Yúúda pɛ́lı̵́ máa u̵u̵ nuŋ hȩn baggı̵́ Tayɨɨ woo ka bag Ibrahí̧í̧ma yȩ yúú Yesu Krístu woolı̵́ á̧ḿ, moo aa nuŋ ví yigid Tayɨɨ woo ka ta ya̧g wu̵lı̵́ yȩ yúú zó̧ó̧ 'yɛ́lı̵́ baa vílí.

¹⁵Dan kirtȩ́n vu̵, mí o̧d ví hȩn ka' ı̵́ nánán voolı̵́ má nɔ. Nán tóó ka ta ya̧g néélȩ́ na'a tée, nán tóó duu buu ní, o̧n moo tóó kə́d yúú woolı̵́ né á̧ḿ.

¹⁶Tayɨɨ tad Ibrahí̧í̧ma ya̧g kan zig woo nɔ. A̧máa Tayɨɨ kan hí̧í̧ bi o̧ kan zig zo"ɨ tée, kan o̧: “Kan zig woo vu̵ yu̵.” A̧máa Tayɨɨ o̧: “Kan zig woo nɔ.” Moo yȩ tú' fó̧ó̧ dágáɨ, wu̵ Krístu wu̵.

¹⁷Hȩn káń hí̧í̧ bi o̧d ví máa, wu̵ yɛ nɔ. Tayɨɨ ká mbɔ́g ya̧g talı̵́ woo sú̵'ú̵, ma dooká Múúsa woo yaa woo ve' tȩmɛre ndaddú̵ kan ve' vo' ta̧a̧nɔ́ pig woolı̵́. Wú̵ń na'ad ya̧g talı̵́ Tayɨɨ woo yȩ gbɔn né, kan moo mbɔ́ggı̵́ woo yȩ á̧ḿ.

¹⁸Nán a nuŋ hȩn yȩ"ȩ́ yúú dookálı̵́ tée, duu nugun sı̵́ kan ya̧g talı̵́ɨ né. A̧máa ı̵́ yȩ Tayɨɨ pú̵ Ibrahí̧í̧ma kan ya̧g talı̵́ɨ.

¹⁹Tée ba'ad ı̵́ dooká Múúsa woo máa, wu̵ ȩná? Vu̵ ha"u̵ wu̵lı̵́, moo nán u̵u̵ gaa hȩn Tayɨɨ ba ka sɛ́n né má nɔ, há̧á̧ a ya̧ yaalı̵́ Waa ya̧g talı̵́ Tayɨɨ woo yȩ pȩ́ń. Maleeka vu̵u̵ pa̧ŋ dooká Tayɨɨ woo yȩ yaan nag nán moo mbɔ́ggı̵́ tóó[3] woolı̵́.

²⁰A̧máa ba'ad ka maa nán dágá wu̵ kɔ́lı̵́ tée, duu maan sı̵́ mbɔ́ggı̵́ fó̧ó̧ idú né, a̧máa Tayɨɨ wu̵ dágá, wu̵ pú̵ ya̧g talı̵́ woo yȩ.[4]

²¹Moo woo nɔ, yee dooká Tayɨɨ woo lı̵́d ya̧g talı̵́ woo vu̵ áa? Pɛ́lı̵́ sá̧ḿ! Tow dooká tóó kannɔ pú̵ nán vu̵ néélȩ́ u̵u̵ nuŋ vágád Tayɨɨ woolı̵́ kannɔ ó̧ tée, nán ka vu̵n duu dooká yȩ, ka vu̵n to̧n kan Tayɨɨ wu̵lı̵́ gínú.

²²A̧máa debtere Tayɨɨ woo o̧ nán vu̵ 'waapád vu̵n gba'a hȩn ɓı̵́d woo vu̵ yu̵, moo nán u̵u̵ 'yɛ́ zó̧ó̧ voo Yesu Krístu woolı̵́ máa, u̵u̵ nuŋ hȩn Tayɨɨ ka ta ya̧g wu̵lı̵́ yȩ á̧ḿ.

²³Sey moo zó̧ó̧ 'yɛ́lı̵́ ka yaa ná né máa, dooká Múúsa woo tíd 'yɛ́ ba ví kɔ́ ı̵́ gba'a wɔgɔ, moo há̧á̧ ba aa laa ví sey zó̧ó̧ 'yɛ́lı̵́ ba a ya̧ pȩ́ń.

²⁴Moo woo nɔ, dooká Múúsa woo tu̵ ba ví kɔ́ ı̵́ nán waa tu̵lı̵́ tóó wɔgɔ, há̧á̧ ba a ya̧ sey Krístu woo, moo aa to̧n ví kan Tayɨɨ yúú zó̧ó̧ 'yɛ́lı̵́ baa ví yȩlȩ́.

²⁵A̧máa sey zó̧ó̧ 'yɛ́lı̵́ ka ya̧ sú̵'ú̵ máa, ı̵́ waa tu̵lı̵́ yȩ duu tu̵n ba ví sı̵́ né.

²⁶Moo ya víí 'waapád kíí 'yɛ́ zó̧ó̧ Yesu Krístu woolı̵́ yȩ, ví sı̵́ waa Tayɨɨ woo vu̵ yu̵,

²⁷moo kóó nɔ́nná ka woo mam Tayɨɨ kan yɛ́g Krístu woo yȩ, dɔ́ Krístu kɔ́ ı̵́ sa̧a̧m wɔgɔ.

²⁸Hȩn tóó ka duu səgən nán vu̵ máa sı̵́ pɛ́lı̵́, kóó nán Yúúda vu̵, kan zig tóó vu̵, kóó gba'a kan waa lig, kóó wayée kan wakȩ́ȩ́, moo ya víí 'waapád ví sú̵gú̵n sı̵́ dágá kan Yesu Krístu ú̵.

²⁹A̧máa kíí nán Krístu woo yȩ, ví zig Ibrahí̧í̧ma woo vu̵ yu̵ á̧ḿ; víń nuŋ hȩn yȩ"ȩ́ Tayɨɨ woolı̵́ kɔ́ ı̵́ ya̧g talı̵́ woo yȩ wɔgɔ.