Read Dii NÁN GALÁD VɄ 4 Bible Online

NÁN GALÁD VɄ 4 - Dii bible

NÁN GALÁD VɄ 4

¹Moo káń bi o̧d ví máa, wu̵ yɛ nɔ. Waa tóó ka bi ɓɛ hȩn gaga ba"oo woo nɔ tée, dəŋ mbaa kɔ́ ı̵́ gba'a wɔgɔ náásá̧ŋ́ŋı̵́ pȩ́ń, kóó hȩn 'waapád a woo nɔ si̧'.

²Ka mbaa lá náásá̧ŋ́ŋı̵́ tée, kid nán ku̵u̵ gágadu̵ hȩn woo máa vu̵ yu̵ tɔ́g há̧á̧ ya̧ bá' zá̧ga̧ ba' woo ka gə máa.

³Ɨ́ baa ví, káa mbaa ví lá náásá̧ŋ́ná máa, ba mbaa ví gba'a yúú moo tú"í yúú yigid néélȩ́ tóó vu̵lı̵́.

⁴A̧máa zá̧ga̧ woo ka ya̧ máa, Tayɨɨ ba' Waa woo zu̵u̵n. Wakȩ́ȩ́ wu̵ ha̧a̧wo̧. Waa yȩ kid dooká nán Yúúda voo tɔ́g,

⁵moo a səd nán ı̵́ dooká Múúsa woo ka buu vu̵ máa vu̵ yu̵, moo aa tii ví waa Tayɨɨ woo vu̵ yu̵ á̧ḿ.

⁶Ví waa lig vu̵ yu̵. Moo woo nɔ ma, Tayɨɨ ba' yigid Waa woo woo yaan zó̧ó̧ baa vílí, baa bee bee: “Ábba, ábba!” (Moo yɛ tú' “Ba'á, ba'á!”)

⁷Moo woo nɔ mɔ́ sı̵́ gba'aɨ pɛ́lı̵́, mɔ́ sı̵́ waa liggi. Káḿ mbaa waa woo yȩ, mɔ́ń nuŋ hȩn yȩ"ȩ́ nag Tayɨɨ woolı̵́ á̧ḿ.

⁸Ká ví gaan Tayɨɨ né, a̧máa hȩn ı̵́ ku̵u̵ Tayɨɨɨ pɛ́lı̵́ máa ví kɔ́d vu̵ yu̵ ba'ad.

⁹'Ya̧'a̧ yɛ máa, ví gaa Tayɨɨ sú̵'ú̵ (maa i o̧ Tayɨɨ ba gaa bi sú̵'ú̵!), ma kɔ́ née ví duu vȩ́' la moo tú"í yúú yigid néélȩ́ tóó vu̵lı̵́, kan hȩn gíḿ yȩ vu̵lı̵́ á̧ḿmá! Ví hí̧í̧ bi duu la kɔ́d vu̵ ba'ad gba'aa?

¹⁰Ví 'yɛ́ zó̧ó̧ víí bi na' zá̧ga̧ ı̵́ tóó ku̵u̵ yee vu̵, kan sȩȩ tóó vu̵, kan mam vúnní tóó vu̵, kan ve' tóó vu̵ yȩlȩ́ á̧ḿ.

¹¹Mí gbɔ́ dam yúú víílí, tóó tée ka mín pin fó̧ó̧ míí leená moo víílí té'.

¹²Dan kirtȩ́n vu̵, mí hí̧í̧ i mbaa kɔ́ ı̵́ mí wɔgɔ, moo mí tii mbaa kɔ́ ı̵́ ví wɔgɔ sú̵'ú̵ á̧ḿ. Ví kɔ́n mí hȩn kə̧ə̧g tóó né.

¹³Ví gaa sey káń dəŋ tú'ud ví moo to̧o̧ 'maŋ máa, hȩn ká ho̧o̧n sú̵'ú̵.

¹⁴A̧máa kóó ká a̧n ho̧o̧ȩ ı̵́ yo̧go̧ si̧', ví zigin mí ní; zó̧ó̧ fá̧a̧n ví moo míílí̧ ní á̧ḿ. Ví fȩȩn kɔ́ ı̵́ maleeka Tayɨɨ woo wɔgɔ, tóó tée ı̵́ Krístu wɔgɔ á̧ḿ.

¹⁵Zó̧ó̧ dȩ"ȩ́ víí pee laa dɨ tɛ́lá? Moo yȩ́ńne, mí o̧ nɔ́ɔ́ kan hȩn vbənnée tée, ka víń vbəd pú̵n sú̵'ú̵.

¹⁶Káń o̧d ví moo yȩ́ńná máa, mí tii sı̵́ ı̵́ maag víí 'ya̧'a̧ yɛ áa?

¹⁷Nán yȩ vu̵ pi zó̧ó̧ yúú víílí, vu̵ kɔ́ ba'ad ɓı̵́d yȩ vu̵, a̧máa vu̵ hí̧í̧ i duu bi ú, tée bi buu ví ú.

¹⁸Nán tóó a 'yɛ́ zó̧ó̧ yúú hȩn du̵u̵ kɔ́lı̵́lı̵́ tée, du̵u̵ ú̵, kóó sey woo téé, kóó a̧n ho̧nnɔ kan nɔ́ɔ́ míí ní á̧ḿ si̧'.

¹⁹Ɨ́ víí, ví waa ha̧a̧lȩ́ míí vu̵ yu̵. Mí nuŋ hȩn ndɔ́gɔné yúú víílí 'yɛ́nné, kɔ́ ı̵́ wakȩ́ȩ́ ka dɨ waa ha̧a̧lȩ́ máa wɔgɔ, há̧á̧ Krístu a dɔ́ mbaa zó̧ó̧ víílí pȩ́ń.

²⁰'Ya̧'a̧ yɛ ka míń mbaa dɨ víílí sa̧a̧mé! Tée ka mín tii sı̵́ moo moolȩ́ míí vu̵ ú̵, a̧máa mí gaan hȩn a̧n kɔ́n kan ví ní.

²¹Ɨ́ víí, kíí hí̧í̧ bi duu dooká Múúsa woo yȩ, i o̧nnɔ! Ví kin moo debtere Múúsa woo ka o̧n máa náa?

²²O̧ Ibrahí̧í̧ma ba nuŋ waa idú. Ɨ́ tóó máa, gba'a kȩ́ȩ́ woo Agáar wu̵ ha̧a̧wo̧. Ɨ́ tóó máa, kȩ́ȩ́ dáń woo Sára wu̵ ha̧a̧wo̧.

²³Waa ı̵́ gba'a kȩ́ȩ́ woo yȩ, vu̵ ha̧a̧wo̧ kan hȩn hí̧í̧lí̧ fó̧ó̧ȩ. A̧máa waa ı̵́ kȩ́ȩ́ dáń woo máa, vu̵ ha̧a̧wo̧ kan ya̧g talı̵́ Tayɨɨ woo nɔ.

²⁴Moo pa'ané yȩ mbaa kɔ́ ı̵́ hȩn gú̵gu̵né tóó vu̵ wɔgɔ. Wakȩ́ȩ́ idú yȩ vu̵ tú' ya̧g talı̵́ vu̵ idú. Ɨ́ tóó máa, tú' yúú Agáar woolı̵́, ya̧g talı̵́ ı̵́ yúú gu̵u̵ Sináyyȩ́ȩ, ma ha̧a̧ waa gba'a vu̵.

²⁵Agáar mbaa kɔ́ ı̵́ gu̵u̵ Sináy wɔgɔ, hág Arábbı̵́. Man kan kaa Yerúsalem ı̵́ 'ya̧'a̧ yɛ nɔ, moo vu̵ kan nán woo vu̵ á̧ḿ, vu̵ gba'aɨ.

²⁶A̧máa Yerúsalem ı̵́ tóó yúba zu mbaa woo vəg leená, wu̵ ha̧a̧ ba ví baa,

²⁷moo debtere o̧: “Zó̧ó̧ a dȩ'ȩm, wakȩ́ȩ́ zi̧i̧ yɛ mɔ́, ı̵́ káḿ ha̧a̧n waa né yȩ! A̧m dȩ' zó̧ó̧, a̧m lɛ́g la ú̵, ı̵́ káḿ gaan hȩn ndɔ́gɔné waa ha̧a̧lȩ́ né yȩ nɔ, moo waa ı̵́ wakȩ́ȩ́ ka ha̧a̧n waa né yȩ, waa woo vu̵, vú̵ń ɓu̵u̵ mba ı̵́ wakȩ́ȩ́ ka mbaa kan wə̧ə̧ yȩ woo ú̵.”

²⁸Dan kirtȩ́n vu̵, ı̵́ víí máa, ví waa ya̧g talı̵́ vu̵ yu̵ kɔ́ ı̵́ Iizág wɔgɔ.

²⁹A̧máa sey tóó máa, ı̵́ ku̵u̵ ha̧a̧wo̧ kan hí̧í̧lí̧ fó̧ó̧ yȩ, duun ı̵́ ku̵u̵ ha̧a̧wo̧ kan hí̧í̧lí̧ Tayɨɨ woo yȩ kan moo. Máa, hȩn woo dɨ kɔ́yné 'ya̧'a̧ yɛ ı̵́ yo̧go̧ á̧ḿ.

³⁰A̧máa debtere o̧ nɛ́nná? O̧: “A̧m nɛŋ gba'a kȩ́ȩ́ yȩ gbɔ la, kan waa woo á̧ḿ, moo waa gba'a kȩ́ȩ́ yȩ woo u̵u̵ yȩ'ȩn hȩn gaga kan waa ı̵́ wakȩ́ȩ́ wə̧ə̧ yȩ woo sá sá̧ḿ.”

³¹Moo woo nɔ ma, dan kirtȩ́n vu̵, ba ví baa waa gba'a woo nɔ pɛ́lı̵́, a̧máa ba ví baa waa ı̵́ wakȩ́ȩ́ wə̧ə̧ ka ha̧a̧ má nɔ.