Read Dii NÁN GALÁD VɄ 5 Bible Online

NÁN GALÁD VɄ 5 - Dii bible

NÁN GALÁD VɄ 5

¹Krístu vud ba ví sı̵́ nag gba'alı̵́ ú̵, moo aa mbaa ví waa lig vu̵ yȩ́ńná. Moo woo nɔ mí o̧d ví, i nda doo víí la ú̵, moo ví waa lig vu̵ yu̵. I duu tii gba'a sá.

²I ki pȩ́ń! Ɨ́ míí Pól máa, mí o̧d ví tow i dɔ́ do̧ŋ tée, Krístu wú̵ń duu maan ví sı̵́ hȩn tóó né sá̧ḿ.

³Mí duu faa o̧d ví, nán ku̵u̵ dɔ́ do̧ŋ máa, u̵u̵ duu dooká Múúsa woo vu̵ 'waapád, a kéé sá.

⁴Ɨ́ víí kíí soo hi̧naa bi to̧n kan Tayɨɨ yúú dooká Múúsa woo vu̵lı̵́ yȩ, ví hı̵́'ı̵́n sı̵́ víí kan Krístu ú. Zó̧ó̧ nán Tayɨɨ woo sı̵́ víílí pɛ́lı̵́ á̧ḿ.

⁵Ɨ́ vóó máa, vɔ́ 'yɛ́ vóó zó̧ó̧ Tayɨɨ woolı̵́, vɔ́ to̧n kan Tayɨɨ sú̵'ú̵. Vɔ́ nuŋ yigid woo á̧ḿ, ma yigid woo kɔ́ ba'ad zó̧ó̧ vóólı̵́ kan zó̧ó̧ 'yɛ́lı̵́ Tayɨɨ woolı̵́, ma vɔ́ nuŋ to̧nné wu̵lı̵́,

⁶moo kóó má'án kan Yesu Krístu sú̵'ú̵ máa, kóó do̧ŋ dɔ́lı̵́, kóó mbaalı̵́ zaga á̧ḿ, hȩn gbo̧o̧ tóó wu̵lı̵́ pɛ́lı̵́, séý zó̧ó̧ 'yɛ́lı̵́ a wu̵ kɔ́ ba'ad kan zó̧ó̧ nán.

⁷Ká ví laa ɗug tíŋ́ du̵u̵ na'a, ma nóo duu há' ví i kid moo yȩ́ń yȩ tɔ́g sálá?

⁸Moo yú̵nné yȩ yaan Tayɨɨ ka been ví yȩ woolı̵́ né.

⁹Nánán vu̵ o̧: “Wág waaná' daa kɔ́ doo fúŋ́.”

¹⁰Kóó ı̵́ yo̧go̧ si̧', ı̵́ 'yɛ́lı̵́ Yesu zigin zó̧ó̧ yúú víílí, ba vín taan hȩn tóó kə́d né. A̧máa nán ı̵́ ka yú̵ń ví moo yȩ, Tayɨɨ wú̵ń sə̧' moo yúú woolı̵́ á̧ḿ, kóó nán woo a mbaa nɛ́nná si̧'.

¹¹Dan kirtȩ́n vu̵, ı̵́ míí, ka mín o̧d nán u̵u̵ dɔ́ do̧ŋ la ú̵ tée, ka vu̵n duun mí kan moo né. A ı̵́ yo̧go̧ tée, hȩn a há' nán vu̵ moo nɔm Yesu woo la' vbagadı̵́ máa, lúú sú̵'ú̵.

¹²Mí hí̧í̧ nán ı̵́ ku̵u̵ yú̵ń ví moo yȩ, aga u̵u̵ sə̧'ə̧ lı̵́d la ú̵!

¹³Dan kirtȩ́n vu̵, ı̵́ víí, Tayɨɨ bee ví moo i mbaa kan yúú víí nu. A̧máa kóó i mbaa kan yúú víí ú si̧', i duu gbɔd hí̧í̧lí̧ ɓı̵́d víí yȩ hi̧naa sá, a̧máa i kɔ́ń ba'ad kan zó̧ó̧ nánne,

¹⁴moo dooká Múúsa woo vu̵ 'waapád vu̵ vúd dɨ moo dágá yȩlȩ́: “A̧m hí̧í̧ dam vu̵ kɔ́ ı̵́ káḿ hí̧í̧ fó̧ó̧ móó wɔgɔ.”

¹⁵A̧máa, kíí lı̵́ń, kíí nɔ́gɔ́n kɔ́ ı̵́ ya̧'a̧d vu̵ wɔgɔ yȩ, i gággú̵! Moo ka víń tud dey vu̵ ú̵.

¹⁶Hȩn káń hí̧í̧ bi o̧d ví máa ka yɔ, i duu hȩn yigid Tayɨɨ woo ka tú'ud ví má nɔ, tée víń kɔ́n hȩn hí̧í̧lí̧ dáń víí ní sá̧ḿ,

¹⁷moo hȩn hí̧í̧lí̧ dáń víí sɛ́n hȩn yigid Tayɨɨ woo né. Yigid Tayɨɨ woo á̧ḿ, sɛ́n hȩn hí̧í̧lí̧ ı̵́ dáń víí ní. Vu̵ kɔ́ń sɨɨ, moo i kɔ́ hȩn hí̧í̧lí̧ dáń víí sá.

¹⁸Tow yigid Tayɨɨ woo a wu̵ dɨ ví pa̧né tée, dooká Múúsa woo vu̵ duu ma'an ví sı̵́ né.

¹⁹A̧máa hȩn zó̧ó̧ dáń baa ví ka hí̧í̧ mba máa vu̵ təən ho̧lȩ́ né. Wu̵ ɓáa kɔ́lı̵́, kan hȩn sí̧i̧d kɔ́lı̵́, kan dȩdȩ́ȩm kɔ́lı̵́,

²⁰kan tayɨɨ mbɔ́ggı̵́ vu̵, kan ndu̵n, kan maag, kan moo kɔ́nné, kan sɨg mɔ́nné, kan zó̧ó̧ yȩ́ȩ́, kan moo fá̧né, kan hı̵́'ɨné yúú mbaalı̵́lı̵́,

²¹kan zó̧ó̧ sú̵lı̵́ hȩn da ba ví voolı̵́, kan doo kíílí, kan lálı̵́ vó'om, kan hȩn ka man kan vu̵ á̧ḿ. Mí duu o̧d ví kɔ́ ı̵́ káń o̧d ví tíŋ́ yȩ wɔgɔ, nán ku̵u̵ kɔ́ hȩn yȩ vu̵ máa, vú̵ń dɔ́n gbaŋ waalı̵́ Tayɨɨ woolı̵́ né sá̧ḿ.

²²A̧máa sey yigid Tayɨɨ woo ka dɔ́ zó̧ó̧ baalı̵́ tée, ba kɔ́ zó̧ó̧ nán, zó̧ó̧ dȩ"ȩ́, to̧o̧g, zó̧ó̧ ma"ȩ́, zó̧ó̧ to̧o̧, hȩn du̵u̵ kɔ́lı̵́, ta ya̧g buu sá,

²³zó̧ó̧ ká̧'a̧d, kan zó̧ó̧ zi̧i̧lí̧ á̧ḿ. Dooká tóó há'an hȩn máa yȩ vu̵ né.

²⁴Nán Yesu Krístu woo vu̵ nɔɔ sı̵́ hȩn hí̧í̧lí̧ dáń voo vu̵ la' vbagad Yesu woolı̵́ ú̵; vu̵ nɔɔ kan hȩn hí̧í̧lí̧ fó̧ó̧ voolı̵́ vu̵ á̧ḿ.

²⁵Tow yigid Tayɨɨ woo ka pú̵ ba vágád tée, séý ba kɔ́ hȩn woo á̧ḿ.

²⁶Ba na' ví yúú sá; ba vi̧i̧ ví da ba ví vu̵ zó̧ó̧ sá; ba dɔd ví nán tóó yúú ya sɨg moolȩ́lȩ́ sá.