Read Dii NÁN GALÁD VɄ 6 Bible Online

NÁN GALÁD VɄ 6 - Dii bible

NÁN GALÁD VɄ 6

¹Dan kirtȩ́n vu̵, nán tóó ka kɔ́ hȩn sɔd tée, ı̵́ víí kíí nuŋ yigid Tayɨɨ woo yȩ, i ka vȩ"o̧ ya kan zó̧ó̧ ká̧'a̧dɨ. A̧máa tée i gág á̧ḿ, moo ka vín dɔ́ hȩn zo"ı̵́lı̵́ á̧ḿ.

²I pə́gə́n hȩn gané tée, ví duu dooká Krístu woo ı̵́ yo̧go̧ sú̵'ú̵ á̧ḿ.

³A̧máa nán tóó a taa bin nán gbo̧o̧ȩ, ma a nán gbo̧o̧ȩ pɛ́lı̵́ tée, sóó fó̧ó̧ woo mooɨ.

⁴Kóó nɔ́nná aga a gu̵g mbaalı̵́ woo ho̧ la ú̵. Tée a ho̧ hȩn ka dəm fó̧ó̧ woo wu̵lı̵́ yȩ tée, wú̵ń gaa mbaalı̵́ dáń kan yúú woo, a̧máa a gú̵gú̵n kan hȩn ı̵́ tóó ka dɨ daga voolı̵́ máa sá,

⁵moo kóó nɔ́nná aga a gaŋ hȩn gané dáń woo nɔ.

⁶Nán ı̵́ ku̵u̵ dɨddu̵ moo to̧o̧ 'maŋ tú"í tée, a gɛ hȩn ka 'yɛ́ máa, pú̵ akaw woo yȩ á̧ḿ.

⁷I sóó fó̧ó̧ víí moo sá. Ba kɔ́n Tayɨɨ ba̧a̧m né, moo nán ka ndag la' máa, to̧' wu̵ yu̵.

⁸A kɔ́ hȩn hí̧í̧lí̧ nánánne tée, wú̵ń nuŋ nɔm wu̵lı̵́ á̧ḿ. A̧máa a kɔ́ hȩn ı̵́ ka to̧o̧d yigid Tayɨɨ woo má nɔ tée, wú̵ń nuŋ vágád káákáá Tayɨɨ woolı̵́.

⁹Tée, ba gbɔ ví hȩn du̵u̵ kɔ́lı̵́ sá, moo nag a ka̧'a̧n ba ví ní tée, báń nuŋ ví hȩn bá' sí̧'í̧d woolı̵́ ú̵.

¹⁰Bá' ka dɨ lálı̵́ yɛ, ba gbá̧' kɔ́d ví da ba ví vu̵ hȩn du̵u̵ wu̵lı̵́, a̧máa ba kɔ́d ví da ba ví kirtȩ́n vu̵ yu̵ mba.

¹¹Hȩn bindigo ı̵́ na'a laladı̵́ yɛ, aga míí bíńda kan nag míí.

¹²Nán ı̵́ ku̵u̵ hí̧í̧ bi na' yúú nɔ́ɔ́ nánán voolı̵́ máa, vu̵u̵ yú ví moo do̧ŋ dɔ́lı̵́ yȩ nɔ. A̧máa vu̵ kɔ́ ı̵́ yo̧go̧ moo u̵u̵ duun bi kan moo yúú zó̧ó̧ 'yɛ́lı̵́ la' vbagad Krístu woolı̵́ yɛlı̵́ sá.

¹³Nán sú̵u̵ ku̵u̵ dɔ́ do̧ŋ yȩ, vu̵ duun dooká Múúsa woo vu̵ né á̧ḿ, a̧máa vu̵ hí̧í̧ i dɔ́ do̧ŋ moo bi dəm fó̧ó̧ bii wu̵lı̵́ má nɔ té'.

¹⁴Ɨ́ míí máa, séý mí dəm fó̧ó̧ míí yúú nɔm ı̵́ 'yɛ́lı̵́ baa ví Yesu Krístu woolı̵́ la' vbagad yȩlȩ́ pȩ́ń. Ma hȩn hágá yɛ vu̵ mbaa kɔ́ ı̵́ hȩn nɔm wɔgɔ zó̧ó̧ míílí̧, mí á̧ḿ, mí mbaa kɔ́ ı̵́ nɔm wɔgɔ tíŋ́ nánán voolı̵́.

¹⁵Kóó do̧ŋ dɔ́lı̵́, kóó mbaalı̵́ zaga á̧ḿ, hȩn gbo̧o̧ tóó nɔ pɛ́lı̵́. A̧máa moo ha̧yné 'maŋ wu̵ hȩn gbo̧o̧.

¹⁶Mí o̧d nán ku̵u̵ duu moo tú"í yȩ máa vu̵ 'waapád, u̵u̵ mbaa nánná. Tayɨɨ a kɔ́d vu̵ zó̧ó̧ nán, a kɔ́d kan zig woo vu̵ á̧ḿ.

¹⁷Nán tóó a duu fígin sı̵́ 'ya̧'a̧ yɛ sá, moo mí dɨ kan ndɔ́g laa Yesu woo fó̧ó̧ míílí̧ yɛlı̵́.

¹⁸Dan kirtȩ́n vu̵, ı̵́ 'yɛ́lı̵́ baa ví Yesu Krístu a kɔ́d ví zó̧ó̧ nánne. Aamɛ́n.