Read Dii NÁN ƐFƐ́ƐZ VɄ 1 Bible Online

NÁN ƐFƐ́ƐZ VɄ 1 - Dii bible

NÁN ƐFƐ́ƐZ VɄ 1

¹Mí Póllu̵, waa ba'ad Yesu Krístu woo nɔ, moo Tayɨɨ wu̵ hí̧í̧ bi 'yɛ́n ı̵́ yo̧go̧. Míi bíńda ɗerwəl yɛ ba'ad ví, nán Tayɨɨ woo kaa Ɛfɛ́ɛzlı̵́[1] víw. Ví ta ya̧g buun yúú Yesu Krístu woolı̵́ né á̧ḿ.

²Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

³Ba na' ví Tayɨɨ, Ba' ı̵́ 'yɛ́lı̵́ baa ví Yesu Krístu woo! Bag ba ví hȩn yúú Krístu woolı̵́, bag ba ví hȩn baggı̵́ ı̵́ be"ı̵́, hȩn yigid Tayɨɨ woo ka pú̵ 'waapád yɛ nɔ.

⁴Sey Tayɨɨ ka yɨm ná hȩn vu̵ né máa, dəŋ yee ba ví wu̵lı̵́, moo aa mbaa ví nán bii vu̵ Krístu woolı̵́, aa kɔ́ ví hȩn ɓı̵́d tíŋ́ biilí sá. Yúú zó̧ó̧ nán woolı̵́

⁵Tayɨɨ ká mbɔ́g moo yȩ, moo aa mbaa ví waa bii vu̵ yúú Yesu Krístu woolı̵́. Hȩn yȩ ka to̧o̧du̵ máa, kɔ́ ı̵́ yo̧go̧.

⁶Moo woo nɔ ba na' ví Tayɨɨ moo zó̧ó̧ nán gbo̧o̧ woo ka kɔ́d ba ví na'a yúú waa zó̧ó̧ woo yȩlȩ́ yȩ nɔ.

⁷Ba nuŋ ví sə́nné mɛm woolı̵́. Tayɨɨ tú' zó̧ó̧ nán woo na'a yȩ, kéé hȩn kɔ́lı̵́ sɔnné baa ví vu̵ gbɔ la moo Yesu woo nɔ.

⁸Tayɨɨ bag ba ví hȩn ɓu̵u̵lı̵́ na'a, pú̵ ba ví moo gaalı̵́ kan moo taalı̵́ 'waapád.

⁹Ká mbɔ́g hȩn woo vu̵ yu̵g woolı̵́ zó̧ó̧lȩ́, ma vud tú'ud ba ví kan hí̧í̧lí̧ woo.

¹⁰Hȩn Tayɨɨ ka hí̧í̧ máa wu̵ yɛ nɔ, bá' sí̧'í̧d woolı̵́ tée, wú̵ń su̵g hȩn ı̵́ ku̵u̵ dɨ be"ı̵́ vu̵, kan ı̵́ hágá yɛlı̵́ vu̵ 'waapád, tíŋ́ gbanaa dágá yȩ woolı̵́. Gbanaa woo Krístu wu̵.

¹¹Kaa sú̵gú̵n ví kan Krístu yɛ, ba nuŋ ví sə́nné á̧ḿ kɔ́ ı̵́ Tayɨɨ aga ka yee ba ví yɛ wɔgɔ, moo Tayɨɨ kɔ́ hȩn 'waapád kɔ́ ı̵́ ka hí̧í̧ wɔgɔ.

¹²Ɨ́ vóó kóó dəŋ 'yɛ́ zó̧ó̧ vóó Krístu woolı̵́ yɛ, vɔ́ na' na"ȩ́ Tayɨɨ woo yɛ nɔ.

¹³Ví á̧ḿ, kíí ki ya̧g ba'ad moo yȩ́ń, moo to̧o̧ 'maŋ ka səd ví yȩ, ví 'yɛ́ zó̧ó̧ víí Krístu woolı̵́, ma Tayɨɨ ba' yigid woo ká ka ta ya̧g wu̵lı̵́ pee, ba'ad ví kɔ́ ı̵́ tumbal woo wɔgɔ, bi tú' ba vín nán bii nu.

¹⁴Dəŋ pú̵ ba ví yigid woo yȩ, moo aa gaa ví sey a səd ba ví 'waa tée, báń nuŋ ví hȩn Tayɨɨ ka mbɔ́gɔd ba ví máa 'waapád. Ba na' ví na"ȩ́ Tayɨɨ woo yȩ nɔ!

¹⁵Moo woo nɔ sey káń ki zó̧ó̧ 'yɛ́lı̵́ víí yúú ı̵́ 'yɛ́lı̵́ baa ví Yesu woolı̵́, kan hí̧í̧lí̧ máa kíí hí̧í̧ zig Tayɨɨ woo vu̵ yȩ máa,

¹⁶mí dȩnnɔ nag gən né moo víí á̧ḿ. Káń dɨd Tayɨɨ moo o̧lȩ́ tée, mí taa ví wu̵lı̵́.

¹⁷Mí ɓá' Tayɨɨ ı̵́ 'yɛ́lı̵́ baa ví Yesu Krístu woo, Ba'á ı̵́ na"ȩ́ yȩ, a pú̵ ví zó̧ó̧ moo gaalı̵́, a tú'ud ví i gaawu̵ du̵u̵ na'a.

¹⁸Tayɨɨ a kɔ́ zó̧ó̧ víí a tú̵'ú̵, moo i gaa hȩn gbo̧o̧ Tayɨɨ ka bee ví moo woo yȩ, kan hȩn naa du̵u̵ woo yȩ ba 'yɛ́d nán woo vu̵ yu̵,

¹⁹kan néélȩ́ hȩn mbalı̵́ woo ka 'yɛ́d nán zó̧ó̧ 'yɛ́lı̵́ woo ba ví yȩ. Hȩn mbalı̵́ woo yȩ, wu̵ hȩn mbalı̵́ Tayɨɨ ka tú'

²⁰sey ka nim Krístu nɔmmé, ma ka 'yɛ́gɛ nag nán woolı̵́ be"ı̵́ máa á̧ḿ.

²¹Wu̵lı̵́ máa, Krístu wu̵ mbaa yúú hȩn gbo̧o̧ voolı̵́, kan hȩn néélȩ́ tóó vu̵lı̵́, kan hȩn hȩn mbalı̵́ tóó vu̵, kan hȩn gbaŋ waalı̵́ á̧ḿ. Yéé woo mba yéé gbo̧o̧ tóó ku̵u̵ 'yɛ́ vu̵ 'ya̧'a̧ yɛ máa 'waapád. Wu̵ mba ı̵́ tóó u̵u̵ dɨ yaalı̵́ yȩ vu̵ á̧ḿ.

²²Tayɨɨ 'yɛ́ Krístu yúú hȩn 'waapáddı̵́ sú̵'ú̵. Wu̵ 'yɛ́gɛ yúú yúú nán sú̵ggı̵́ voolı̵́ á̧ḿ.

²³Eglíizə wu̵ fó̧ó̧ Krístu woo. Hȩn Krístu woo 'waapád dɨ eglíizəlı̵́, a̧máa Krístu fȩȩ be' kan hág á̧ḿ 'waapád!