Read Dii NÁN ƐFƐ́ƐZ VɄ 3 Bible Online

NÁN ƐFƐ́ƐZ VɄ 3 - Dii bible

NÁN ƐFƐ́ƐZ VɄ 3

¹Moo woo nɔ, ı̵́ míí Pól, káń mbaa púúsinalȩ́ yúú moo Krístu woolı̵́ yɛlı̵́ yɛ, mí mbaa wu̵lı̵́ moo ı̵́ víí, kíí nán Yúúda pɛ́lı̵́ yȩ, mí ɓá'ad víw Tayɨɨ.

²Ví ki moo ya̧g ba'ad zó̧ó̧ nán Tayɨɨ ka pú̵n moo víílí yɛ gaa ú̵.

³Tayɨɨ tú'un hȩn tóó ka yu̵ggu̵ máa sú̵'ú̵. (Ba mín bíńda o̧d ví sı̵́ pá̧ńnɔ́ á̧ḿ,

⁴moo i záŋ́ga tée, víń ki mín gaa hȩn ka' tóó ka yú̵g Krístu woolı̵́ máa sú̵'ú̵.)

⁵Ká tíŋ́ máa, Tayɨɨ tú'un nán vu̵ hȩn woo ka yu̵gu̵n yȩ né, a̧máa 'ya̧'a̧ yɛ máa, tú'ud waa ba'ad Yesu woo vu̵, kan anábi woo vu̵ á̧ḿ. Tú'ud vu̵ kan yigid woo nɔ.

⁶Hȩn ka yu̵g sú̵u̵ wu̵ yɛ nɔ. Moo to̧o̧ 'maŋ o̧ nán ı̵́ ku̵u̵ Yúúda pɛ́lı̵́ máa, u̵u̵ sú̵g nuŋ hȩn yȩ"ȩ́ Tayɨɨ woolı̵́, kan nán Yúúda vu̵ á̧ḿ, o̧ ba vu̵n zig woo nɔ á̧ḿ, ba vu̵n dɨ ya̧g talı̵́ woo ka ta yúú Yesu Krístu woolı̵́ yȩlȩ́ á̧ḿ.

⁷Mí tii nán ba'ad moo to̧o̧ 'maŋ woo. Tayɨɨ kɔ́n zó̧ó̧ nán, pú̵n néélȩ́ woo kan nag gbaŋ woo yȩ nɔ.

⁸Sa̧a̧m nán Tayɨɨ woo voolı̵́ máa, nán tóó vu̵ mban 'waapád. Kóó ı̵́ yo̧go̧ si̧', Tayɨɨ tú'un zó̧ó̧ nán woo, moo a̧n pad nán ı̵́ ku̵u̵ Yúúda pɛ́lı̵́ máa vu̵ moo to̧o̧ 'maŋ Krístu woo ka mbaa kɔ́ ı̵́ hȩn naa gbo̧o̧ tóó ka 'wáa né wɔgɔ yȩ nɔ.

⁹Tayɨɨ o̧ ba a̧n tú'ud nán 'waapád u̵u̵ gaa hȩn ba kii mbɔ́g yu̵g yȩ nɔ. Wu̵ yɨb hȩn vu̵ 'waapád, ma hȩn woo ka hí̧í̧ kɔ́lı̵́ máa, ká yu̵g ya sı̵́ káákáá pi nu.

¹⁰Mí tú' moo yɛ vu̵, moo há̧á̧ maleeka gbo̧o̧ vu̵, kan ı̵́ hȩn mbalı̵́ vu̵ be"ı̵́, u̵u̵ ki moo gaalı̵́ Tayɨɨ woo na'a yɛ, u̵u̵ ki nán sú̵ggı̵́ voolı̵́.

¹¹Tayɨɨ kɔ́ hȩn yȩ kɔ́ ı̵́ aga ka mbɔ́g moo woo 'yɛ́ ya káákáá yȩ wɔgɔ, kɔ́ kan ı̵́ 'yɛ́lı̵́ baa ví Yesu Krístu wu̵.

¹²Yúú sú̵gu̵né baa ví kan Yesu Krístu yɛlı̵́, kan zó̧ó̧ 'yɛ́lı̵́ woolı̵́ yɛ, ba nuŋ ví zó̧ó̧ 'yɛ́lı̵́ séené la Tayɨɨ woolı̵́ tíŋ́.

¹³Moo woo nɔ, mí vi ví, zó̧ó̧ a tó̧' ví yúú hȩn ndɔ́gɔné míí víílí yɛlı̵́ sá, moo hȩn woo wú̵ńnɔ pú̵ ví na"ȩ́ tóó.

¹⁴Moo woo nɔ, mí gu doo núug tíŋ́ Ba'á Tayɨɨ woolı̵́;

¹⁵zig 'waapád, kóó be"ı̵́, kóó hágá yɛlı̵́ á̧ḿ, vu̵ nuŋ yéé voo woolı̵́ nagá;

¹⁶mí vigi a pú̵ ví néélȩ́ gbo̧o̧ ba'a kan yigid woo zó̧ó̧ víílí,

¹⁷moo Krístu a mbaa zó̧ó̧ víílí yúú zó̧ó̧ 'yɛ́lı̵́lı̵́. Mí duu vigi a kɔ́ i hí̧ń kan zó̧ó̧ víí 'waapád á̧ḿ,

¹⁸moo há̧á̧ i sú̵g kan zig Tayɨɨ woo vu̵ 'waapád, ví nuŋ néélȩ́ ki gaa zó̧ó̧ nán Krístu woo, kan neelȩ́ woo, kan lú̵gú̵d woo, kan na"ȩ́ woo, kan súlí woo, ba dɨ nɛ́nná?

¹⁹Mí duu vigi i gaa zó̧ó̧ nán Krístu woo, nán ba gaa 'waa né máa ó̧, moo há̧á̧ Tayɨɨ a hi̧' mbaa zó̧ó̧ víílí ság.

²⁰Ba na' ví Tayɨɨ, dɨ kan néélȩ́ kɔ́ hȩn mba hȩn ı̵́ kaa taa ví, kaa ɓá"u̵ ví máa 'waapád. Kɔ́ kan néélȩ́ ka kɔ́ ba'ad baa vílí fó̧lȩ́ yɛ nɔ.

²¹Nán sú̵ggı̵́ u̵u̵ na"o̧ voolı̵́ sa̧a̧mé, kan Yesu Krístu woolı̵́, há̧á̧ zig kan zig há̧á̧ káákáá. Aamɛ́n.