Read Dii NÁN ƐFƐ́ƐZ VɄ 4 Bible Online

NÁN ƐFƐ́ƐZ VɄ 4 - Dii bible

NÁN ƐFƐ́ƐZ VɄ 4

¹Ɨ́ míí, káń mbaa púúsinalȩ́ moo ba'ad ı̵́ 'yɛ́lı̵́ woolı̵́ yɛ, mí o̧d ví, Tayɨɨ ka bee ví yȩ, i kɔ́ddu̵ ba'ad dȩ"ȩ́ na'a kɔ́ ı̵́ ka hí̧í̧ wɔgɔ.

²I na' yúú sá, i mbaa kan zó̧ó̧ ká̧'a̧d, kan zó̧ó̧ ma"ȩ́. I má'án zó̧ó̧ kan da ví vu̵, i kɔ́d vu̵ zó̧ó̧ nán.

³Yigid Tayɨɨ woo ka su̵gu̵n ví dágá yȩ, i sȩn fó̧ó̧ víí, ví to̧n kan zó̧ó̧ ká̧'a̧d.

⁴Fó̧ó̧ Yesu woo dɨ dágá, yigid Tayɨɨ woo dɨ dágá á̧ḿ; Tayɨɨ bee ví i dɔ́ la biilí ya dágá.

⁵Ɨ́ 'yɛ́lı̵́ baa ví dɨ dágá, zó̧ó̧ 'yɛ́lı̵́ baa ví dɨ dágá, mam Tayɨɨ woolı̵́ dɨ dágá á̧ḿ.

⁶Tayɨɨ dɨ dágá á̧ḿ, wu̵ Ba' baa ví 'waapád. Wu̵ waa gbanii dágá yúú nán voolı̵́ 'waapád, wu̵ pú̵ nán vu̵ néélȩ́ 'waapád, mbaa dɨ zó̧ó̧ nán voolı̵́ 'waapád.

⁷Kóó nɔ́nná nuŋ zó̧ó̧ nán kɔ́ ı̵́ Krístu ka pú̵gu̵ wɔgɔ.

⁸Moo woo nɔ vu̵ bíńda debterelı̵́, o̧: “Ka ɗáá dɔg yúba máa, pa̧ŋ nán vu̵ nagá kɔ́ ı̵́ gba'a vu̵ wɔgɔ; pú̵ nán vu̵ hȩn té'.”

⁹(A̧máa moo kíí ki, “ɗáá dɔg yúba” yȩ, tú' ȩná? Moo yȩ tú' ká ba sí zu̵u̵ hág tíŋ́, ya súlí na'a yȩlȩ́.

¹⁰Ɨ́ ka sí zu̵u̵ máa, wu̵ ɗáá dɔg yúba, há̧á̧ mba sı̵́ be"ı̵́ pi á̧ḿ, moo bi fȩȩ ya 'waapád.)

¹¹Ɨ́ ka pú̵ nán vu̵ hȩn yȩ, wu̵ 'yɛ́ nán tóó vu̵ waa ba'ad Yesu woo vu̵, tóó vu̵ anábi, tóó vu̵ nán moo to̧o̧ 'maŋ palı̵́ vu̵, ı̵́ tóó vu̵ pastɛ́ɛr, tóó vu̵ akaw.

¹²Kɔ́ ı̵́ yo̧go̧ moo bi pú̵ zig Tayɨɨ woo néélȩ́ a kɔ́ddu̵ ba'ad, moo fó̧ó̧ Krístu woo ka sú̵g yȩ a ɓu̵u̵ laa tíŋ́ tíŋ́ kan zó̧ó̧ 'yɛ́lı̵́ á̧ḿ,

¹³há̧á̧ zó̧ó̧ 'yɛ́lı̵́ baa ví a sú̵g dágá, báń gaa ví Waa Tayɨɨ woo 'waa á̧ḿ, tée báń mbaa ví ı̵́ nii waa, báń mbaa ví sı̵́ kɔ́ ı̵́ Krístu ka mbaa máa wɔgɔ.

¹⁴Tée, báń mbaan ví sı̵́ kɔ́ ı̵́ náásá̧ŋ́ waa ku̵u̵ wóó vu̵ kə̧́ə̧́n daa kan moo tú"í nánán voo vu̵, kan kɛb voo vu̵ yȩ wɔgɔ né. Vu̵ sóó nánán vu̵ kan 'wɔ́lı̵́ hȩn ba̧a̧né voo vu̵ á̧ḿ.

¹⁵A̧máa aa pa ví moo yȩ́ń kan hí̧nní tée, zó̧ó̧ 'yɛ́lı̵́ baa ví wú̵ń na' man kan ı̵́ Krístu woo, moo wu̵ yúú baa ví.

¹⁶Krístu wu̵ kɔ́ fó̧ó̧ ka' 'waapád vu̵ sú̵g bé'én néélȩ́ na'a. Kóó fó̧ó̧ ka' woo tɛ́lá dɨ kan ba'ad fó̧ó̧ woolı̵́. Fó̧ó̧ ka' tóó ku̵u̵ kɔ́d daga vu̵ ba'ad yagalı̵́ máa, fó̧ó̧ 'waapád dɨ na"ȩ́ kan hí̧nní.

¹⁷Moo woo nɔ, mí hí̧í̧ bi o̧d ví kan yɛ́g ı̵́ 'yɛ́lı̵́ woo, i duu mbaa mbaalı̵́ nán gaa Tayɨɨ sá voo sá. Vu̵ duu moo taalı̵́ lee voo yȩ vu̵.

¹⁸Vu̵ taan moo dȩ"ȩ́ na'a né. Vu̵ gaan vágád Tayɨɨ woolı̵́ né, moo vu̵ kan moo taalı̵́ pɛ́lı̵́, vu̵ sɛ́n moo Tayɨɨ woo kilí ní.

¹⁹Sȩ́ḿ duu kɔ́n vu̵ né sá̧ḿ. Vu̵ kɔ́ dȩdȩ́ȩm, vu̵ kɔ́ hȩn ɓı̵́d dam pɛ́lı̵́.

²⁰A̧máa ví kúgun hȩn tóó ı̵́ yo̧go̧ yúú Krístu woolı̵́ né.

²¹Ví ki moo woo sú̵'ú̵, vu̵ tú'ud ví sı̵́ moo yȩ́ń Yesu woo ú̵ á̧ḿ.

²²Vu̵ o̧d ví, i gbɔ mbaalı̵́ see víí vu̵, moo mbaalı̵́ see víí yȩ kan hí̧í̧lí̧ woo, vu̵u̵ tud nán vu̵ kan kɛb vbád voo vu̵.

²³A̧máa i gbɔ Tayɨɨ a tii zó̧ó̧ víí 'maŋná, kan moo taalı̵́ víí á̧ḿ.

²⁴I duu zó̧ó̧ 'maŋ Tayɨɨ ka mbɔ́g pú̵ ví yȩ nɔ. Wu̵ man kan zó̧ó̧ ı̵́ Tayɨɨ woo. I duuwu̵ tée, víń duu moo yȩ́ń, víń kɔ́ də́ń hȩn hí̧í̧lí̧ Tayɨɨ woo á̧ḿ.

²⁵Moo woo nɔ, i gbɔ moo vbád vu̵ ó̧nné sa̧a̧m víílí ú! I ó̧ń moo yȩ́ńne, moo ya baa ví 'waapád, fó̧ó̧ baa ví kə́kə́d vu̵ sú̵g dɨ fó̧ó̧ woolı̵́.

²⁶Kíí kɔ́ zó̧ó̧ yȩ́ȩ́ tée, i gág hȩn ɓı̵́d kɔ́lı̵́ɨ. Zó̧ó̧ yȩ́ȩ́ yȩ, moo woo a ya̧ ya̧g mɛn sá.

²⁷I gbɔd Seeɗán ya mbaalı̵́ zó̧ó̧ víílí sá!

²⁸Nán líw a duu kɔ́ líw sá, a̧máa a bé' ba'adu̵ kɔ́lı̵́, moo a kɔ́ hȩn yȩ́ń, a nuŋ hȩn lálı̵́ wu̵lı̵́, moo a pú̵ nán ı̵́ ku̵u̵ 'yɛ́n hȩn né máa vu̵ hȩn wu̵lı̵́ á̧ḿ.

²⁹I móón moo ɓı̵́d sá, séý moo to̧o̧ a wu̵ vúd ya̧g víílí, moo zó̧ó̧ 'yɛ́lı̵́ da ví voo a laa tíŋ́, a to̧o̧d nán ı̵́ ku̵u̵ ki máa vu̵ á̧ḿ.

³⁰I vi̧i̧ yigid Tayɨɨ woo zó̧ó̧ sá. Yigid woo wu̵ mbaa zó̧ó̧ víílí kɔ́ ı̵́ Tayɨɨ ka zuŋ ví kan tumbal woo máa wɔgɔ. Wu̵ tú' Tayɨɨ ban səd ba ví 'waa bá' sí̧'í̧dí.

³¹I 'yɛ́d nán tóó moo zó̧ó̧lȩ́ sá; i vi̧i̧ nán tóó zó̧ó̧ sá; i kɔ́ zó̧ó̧ yȩ́ȩ́ sá; i sa nán tóó zó̧ó̧lȩ́ kan moo sá; i luu vu̵ la 'waapád víílí sa̧a̧mé, kan ya̧g vȩ́'ȩd vu̵, kan zó̧ó̧ ɓı̵́d 'waapád á̧ḿ. I gbɔ vu̵ la ú̵!

³²A̧máa i mbaa kan zó̧ó̧ to̧o̧. Hí̧nní a wu̵ hi̧' sa̧a̧m víílí. I kéé hȩn ɓı̵́d vu̵ gbóón kɔ́ ı̵́ Tayɨɨ ká kéé ı̵́ víí gbɔ yúú Krístu woolı̵́ yȩ wɔgɔ.