Read Dii NÁN ƐFƐ́ƐZ VɄ 5 Bible Online

NÁN ƐFƐ́ƐZ VɄ 5 - Dii bible

NÁN ƐFƐ́ƐZ VɄ 5

¹Kíí mbaa waa hí̧í̧lí̧ Tayɨɨ woo vu̵ yȩ, i kɔ́ hȩn kɔ́lı̵́ woo nɔ á̧ḿ.

²I mbaa kan hí̧nní kɔ́ ı̵́ Krístu ka hí̧í̧ ba ví, ka ha' fó̧ó̧ woo pú̵ moo baa vílí kɔ́ ı̵́ hȩn ha"ı̵́ sa̧g to̧o̧ Tayɨɨ woolı̵́ wɔgɔ yȩ nɔ.

³Ví nán Tayɨɨ woo vu̵ yu̵; moo woo nɔ, moo ɓáa kɔ́lı̵́ vu̵, kan hȩn sí̧i̧d kɔ́lı̵́ vu̵, kan zó̧ó̧ sú̵lı̵́ hȩn daga voo vu̵lı̵́, u̵u̵ ki moo woo vu̵ víílí sa̧a̧mé sá.

⁴I moo moo ka to̧o̧n kilí ní máa vu̵, kan moo ya̧ŋ vu̵, kan moo lee vu̵ sá. Ɨ́ yȩ vu̵ maan kɔ́lı̵́ né, a̧máa i dȩn Tayɨɨ wu̵ nag.

⁵I gaa du̵u̵lı̵́ na'a, nán ɓáa kɔ́lı̵́ vu̵, kan nán hȩn sí̧i̧d kɔ́lı̵́ vu̵, vú̵ń nugun dɔ́lı̵́ gbaŋ waalı̵́ Krístu woolı̵́, kan Tayɨɨ woolı̵́ né, kóó nán zó̧ó̧ sú̵lı̵́ vu̵ á̧ḿ, moo zó̧ó̧ sú̵lı̵́ máa, man kan tayɨɨ lee vu̵ duulíi.

⁶Nán tóó a zo' ví kan moo lee vu̵ sá. Tayɨɨ wú̵ń kɔ́d nán ki tɔ́g sá vu̵ zó̧ó̧ yȩ́ȩ́ yúú hȩn yȩ vu̵lı̵́.

⁷Moo woo nɔ, hȩn tóó a su̵gu̵n ví kan nán yȩ vu̵ sá,

⁸moo ká ví mbaa dimná, a̧máa 'ya̧'a̧ yɛ máa, ví tú' sı̵́ túlí ı̵́ 'yɛ́lı̵́ baa ví Krístu woo nɔ. I baa 'yȩm ya túlílí kɔ́ ı̵́ waa woo vu̵ wɔgɔ,

⁹moo nán ka 'yȩm ya túlílí máa, kɔ́ woo hȩn du̵u̵ 'waapád, kan hȩn hí̧í̧lí̧ Tayɨɨ woo, kan moo yȩ́ń á̧ḿ.

¹⁰I soo ho̧ hȩn ı̵́ 'yɛ́lı̵́ ka hí̧í̧ máa ó̧!

¹¹I duu mbaa kan hȩn kɔ́lı̵́ vid tóó vu̵ sá, moo vu̵ kan hȩn yȩ́ń tóó pɛ́lı̵́, a̧máa i há' ba'ad voo la ú̵!

¹²Hȩn nán yȩ ku̵u̵ baa kɔ́ dimná yȩ, moo moolȩ́ yúú woolı̵́ á̧ḿ, hȩn sȩ́ḿme.

¹³Sey túlí yɛ ka túd hȩn ɓı̵́d yȩ vu̵ 'waa sú̵'ú̵ máa, ba'ad vid voo yȩ vu̵ vúd sı̵́ nɔ́lȩ́ ó̧ á̧ḿ.

¹⁴Hȩn 'waapád ku̵u̵ vuddu̵ ya túlílí máa, tii sı̵́ túlí ú. Moo woo nɔ ma, vu̵ o̧: “Ɨ́ móó káḿ dɨ nəm yȩ, a̧m níḿ dɔggú̵! A̧m níḿ dɔg sa̧a̧m nán nɔm voolı̵́, tée Krístu wú̵ń túm.”

¹⁵Moo woo nɔ, i gág kan mbaalı̵́ víí vu̵ ú! I mbaa ya̧ŋná sá, a̧máa i mbaa kan moo taalı̵́ du̵u̵lı̵́ na'a.

¹⁶I soo hi̧naa du̵u̵ vu̵ yu̵, moo bá' yɛ vu̵ bá' ɓı̵́ddɨ.

¹⁷Moo woo nɔ, i mbaa ya̧ŋná sá, a̧máa i soo hȩn hí̧í̧lí̧ ı̵́ 'yɛ́lı̵́ woo gaa ú̵.

¹⁸I kíí doo sá, moo ka víń ti la wu̵lı̵́ kəd. A̧máa yigid Tayɨɨ woo a wu̵ hi̧' víílí zó̧ó̧lȩ́.

¹⁹I mban moo kan yéé Tayɨɨ na"ȩ́ see vu̵ kan ı̵́ 'maŋ vu̵ á̧ḿ, kan yéé zó̧ó̧ dȩ"ȩ́. I bee yéé, ví na"o̧ kan zó̧ó̧ víí 'waapád.

²⁰Sey 'waapád i dȩn Ba'á Tayɨɨ nag moo hȩn 'waapád, kan yɛ́g ı̵́ 'yɛ́lı̵́ baa ví Yesu Krístu woo nɔ.

²¹I ndɔg Krístu tée, i kíń tɔ́g ya víílí á̧ḿ.

²²Wakȩ́ȩ́ vu̵, i kid wə̧ə̧ víí vu̵ tɔ́g kɔ́ ı̵́ kíí kid ı̵́ 'yɛ́lı̵́ tɔ́g máa wɔgɔ,

²³moo wayée wu̵ yúú kȩ́ȩ́ woo kɔ́ ı̵́ Krístu ka wu̵ yúú eglíizə woo wɔgɔ. Krístu wu̵ səd zig Tayɨɨ woo, wu̵ fó̧ó̧ woo.

²⁴Wakȩ́ȩ́ u̵u̵ kid wə̧ə̧ vu̵ tɔ́g yúú hȩn 'waapáddı̵́ kɔ́ ı̵́ eglíizə ku̵u̵ kid Krístu tɔ́g máa wɔgɔ.

²⁵Wayée vu̵, i hí̧í̧ kȩ́ȩ́ víí vu̵ kɔ́ ı̵́ Krístu ka hí̧í̧ nán sú̵ggı̵́ woo vu̵, ka pú̵ fó̧ó̧ woo moo voolı̵́ máa wɔgɔ.

²⁶Mbɔ́g vu̵ kan mam, kan moo moolȩ́ á̧ḿ, u̵u̵ dȩ' tíŋ́ Tayɨɨ woolı̵́,

²⁷moo u̵u̵ mbaad bi kɔ́ ı̵́ náá gíb waa tóó ka du̵u̵ na'a, fó̧ó̧ woo ka fo̧o̧ né máa wɔgɔ. Hȩn ví̧i̧g tóó a sá, kan hȩn lı̵́nné tóó u̵u̵ sá á̧ḿ. A̧máa a mbaa dȩ"ȩ́ na'a, hȩn ɓı̵́d tóó a wu̵lı̵́ sá!

²⁸Moo woo nɔ, wayée u̵u̵ hí̧í̧ kȩ́ȩ́ voo vu̵ kɔ́ ı̵́ fó̧ó̧ voo wɔgɔ. Nán ka hí̧í̧ kȩ́ȩ́ woo tée, hí̧í̧ fó̧ó̧ woo sú̵'ú̵,

²⁹moo nán tóó mán fó̧ó̧ woo né, a̧máa baa pú̵gu̵ hȩn lálı̵́, baa gbá̧"o̧ kɔ́ ı̵́ Krístu ka gbá̧' nán sú̵ggı̵́ woo vu̵ máa wɔgɔ,

³⁰moo fó̧ó̧ baa ví vu̵ kə́kə́d vu̵ sú̵g fó̧ó̧ woolı̵́ sú̵'ú̵.

³¹Debtere o̧ ı̵́ yo̧go̧, o̧: “Moo woo nɔ wayée wú̵ń hı̵́'ı̵́n kan ba' woo kan na' woo, vú̵ń má'án kan kȩ́ȩ́, ya voo idú á̧ḿ vú̵ń tii fó̧ó̧ dágáɨ.”

³²Moo yȩ́ń gbo̧o̧ ka yú̵g máa wu̵ vúd moo yɛlı̵́. Ɨ́ míí máa, mí taa moo yȩ tú' moo yúú Krístu woolı̵́, kan nán sú̵ggı̵́ woo voolı̵́ á̧ḿ.

³³A̧máa moo yɛ dɨ yúú víílí á̧ḿ. Kóó nɔ́nná a hí̧í̧ kȩ́ȩ́ woo kɔ́ ı̵́ fó̧ó̧ woo wɔgɔ. Wakȩ́ȩ́ u̵u̵ kid wə̧ə̧ vu̵ tɔ́g á̧ḿ.