Read Dii NÁN ƐFƐ́ƐZ VɄ 6 Bible Online

NÁN ƐFƐ́ƐZ VɄ 6 - Dii bible

NÁN ƐFƐ́ƐZ VɄ 6

¹Waa vu̵, ba'ad víí ı̵́ 'yɛ́lı̵́ woolı̵́ máa wu̵ yɛ nɔ. I kid ı̵́ ha̧a̧lȩ́ víí vu̵ tɔ́ggú̵, moo hȩn Tayɨɨ ka hí̧í̧ máa wu̵ yɛ nɔ.

²“A̧m na' ba' móó kan na' móó ó̧;” moo Tayɨɨ ka dəŋ pa kan ya̧g talı̵́ woo máa wu̵ yȩ nɔ.

³Duu o̧: “Tée mɔ́ń mbaa kan zó̧ó̧ dȩ"ȩ́, mɔ́ń mbaa ɗii hágá yɛlı̵́ á̧ḿ.”

⁴Ɨ́ víí waa ba'a vu̵, i vi̧i̧ waa víí vu̵ zó̧ó̧, moo u̵u̵ kɔ́ zó̧ó̧ yȩ́ȩ́ sá. A̧máa i tu̵ vu̵, i tú'ud vu̵ mbaalı̵́ du̵u̵ kɔ́ ı̵́ ı̵́ 'yɛ́lı̵́ ka hí̧í̧ máa wɔgɔ.

⁵Gba'a vu̵, i kid ı̵́ buulí víí hágá yɛlı̵́ vu̵ tɔ́g, kan zó̧ó̧ víí 'waapád, kɔ́ ı̵́ kíí kid Krístu tɔ́g máa wɔgɔ. I ndɔg vu̵, i tu̵u̵ tíŋ́ voolı̵́.

⁶I kɔ́ ba'ad moo nɔ́ɔ́ voo, moo bi to̧o̧d nánán vu̵ yu̵ sá, a̧máa i kɔ́ hȩn hí̧í̧lí̧ Tayɨɨ woo kan zó̧ó̧ víí 'waapád kɔ́ ı̵́ gba'a Krístu woo vu̵ wɔgɔ.

⁷I kɔ́ ba'ad kan zó̧ó̧ to̧o̧, moo ı̵́ 'yɛ́lı̵́ woo nɔ, a̧máa moo nánán voo nɔ dágá pɛ́lı̵́.

⁸Ví gaa nán a kɔ́ hȩn du̵u̵ woo ȩná, ı̵́ 'yɛ́lı̵́ wú̵ń sú̵ú̵wu̵ kan hȩn du̵u̵ woo yȩ nɔ, kóó a gba'a, kóó a ı̵́ buulí, kóó a nɔ́nná á̧ḿ.

⁹Ɨ́ víí, baa lig vu̵, i kɔ́ ı̵́ yo̧go̧ kan gba'a víí vu̵ á̧ḿ. I gbɔ hȩn séené ú̵ á̧ḿ, moo ví gaa ı̵́ 'yɛ́lı̵́ ı̵́ bii kan ı̵́ 'yɛ́lı̵́ ı̵́ voo ba dágá, ba dɨ be"ı̵́, ba səgən nán vu̵ né.

¹⁰Sí̧'í̧d woolı̵́ máa, i soo néélȩ́ víí ı̵́ 'yɛ́lı̵́ woolı̵́, kan hȩn mbalı̵́ gbo̧o̧ woo yȩlȩ́.

¹¹I ta sii, ví ɓɛ hȩn sɨɨ Tayɨɨ woo ka pú̵ ví máa 'waapád, ví nda doo du̵u̵ na'a, tée víń mba kɛb Seeɗán woo yȩ,

¹²moo ba kɔ́n ví sɨɨ kan fó̧ó̧ nánánne né, a̧máa ba kɔ́ ví kan yigid tóó ku̵u̵ dɨ kan néélȩ́, kan yigid ɓı̵́d tóó ku̵u̵ dɨ be"ı̵́, ku̵u̵ mba hȩn kan hȩn mbalı̵́, ku̵u̵ waa gbaŋ ya dim yɛlı̵́ yɛ vu̵ yu̵.

¹³Moo woo nɔ, i ɓɛ víí hȩn sɨɨ ı̵́ Tayɨɨ woo ka pú̵ ví máa 'waapád! Zá̧ga̧ u̵u̵ duun ví kan moo wu̵lı̵́ tée, víń kɔ́ sɨɨ, víń nda doo, víń mba hȩn 'waapád.

¹⁴Moo yȩ́ń a mbaad ví kɔ́ ı̵́ hȩn sii talı̵́ wɔgɔ. Hȩn hí̧í̧lí̧ Tayɨɨ woo kɔ́lı̵́ a mbaad ví kɔ́ ı̵́ sa̧a̧m hɨɨ wɔgɔ.

¹⁵I pi zó̧ó̧, ví pa moo to̧o̧ 'maŋ moo to̧nné kan Tayɨɨ yɛ, a mbaad ví kɔ́ ı̵́ tɛ́gɛ́ wɔgɔ.

¹⁶Zó̧ó̧ 'yɛ́lı̵́ víí a mbaad ví kɔ́ ı̵́ go̧ŋ sɨɨ wɔgɔ. Sey Seeɗán a kɔ́ kɛb woo tée, wú̵ń man kan sı̵́ɨɨ, wú̵ń ya ta'an ví ní.

¹⁷Sə́nné kíí nuŋ Tayɨɨ woolı̵́ yȩ a mbaad ví kɔ́ ı̵́ fȩmee hɨɨ wɔgɔ. Moo Tayɨɨ woo a mbaa víílí kɔ́ ı̵́ pag naa yigid Tayɨɨ woo ka pú̵ ví máa wɔgɔ.

¹⁸I ɓá' Tayɨɨ hȩn mbaan wu̵lı̵́ sey 'waapád kɔ́ ı̵́ yigid Tayɨɨ woo ka tú'ud ví máa wɔgɔ. I bee Tayɨɨ, a maa ví ú. I nə sá, i nda doo wu̵lı̵́. I ɓá'ad nán kirtȩ́n vu̵ 'waapád Tayɨɨ ú̵.

¹⁹I ɓá'an Tayɨɨ á̧ḿ, moo a̧n moo moo tée, Tayɨɨ a 'yɛ́n moo ya̧gá̧ wu̵lı̵́, moo a̧n pa moo to̧o̧ 'maŋ Tayɨɨ woo ka yu̵g yȩ, a̧n paga néélȩ́ na'a.

²⁰Mí waa ba'ad moo to̧o̧ 'maŋ yɛ woo nɔ, kóó a̧n dɨ lig púúsinalȩ́ yɛlı̵́ si̧'. I ɓá'an Tayɨɨ moo há̧á̧ mí pa moo woo kan néélȩ́ kɔ́ ı̵́ Tayɨɨ ka hí̧í̧ wɔgɔ.

²¹Da ba ví kirtȩ́n Tisíg kaa hí̧í̧wo̧ ví na'a, ka kɔ́d ı̵́ 'yɛ́lı̵́ ba'ad gbɔn né yȩ, wú̵ń o̧d ví moo míí 'waapád, tée víń gaa mbaalı̵́ míí.

²²Mí ba"u̵ la víílí də́ń moo a o̧d ví ba vɔ́n mbaa née yɛlı̵́lá, moo a zigid ví zó̧ó̧ á̧ḿ.

²³Ba'á Tayɨɨ kan ı̵́ 'yɛ́lı̵́ baa ví Yesu Krístu u̵u̵ 'yɛ́ nán kirtȩ́n vu̵ u̵u̵ mbaa ká̧'a̧d, u̵u̵ kɔ́d vu̵ zó̧ó̧ nán, u̵u̵ pú̵ vu̵ zó̧ó̧ 'yɛ́lı̵́ á̧ḿ.

²⁴Zó̧ó̧ nán Tayɨɨ woo a mbaa kan nán ku̵u̵ hí̧í̧ ı̵́ 'yɛ́lı̵́ baa ví Yesu Krístu, kan hí̧í̧lí̧ ı̵́ a 'wáa né máa vu̵ yu̵.