Read Dii NÁN FILÍB VɄ 1 Bible Online

NÁN FILÍB VɄ 1 - Dii bible

NÁN FILÍB VɄ 1

¹Vɔ́ yu̵, Pól kan Timɔtée, nán ba'ad Yesu Krístu woo vu̵ yu̵. Vóo ba'ad nán Tayɨɨ woo ví kíí dɨ kaa Filíbbí, kíí duu Yesu Krístu yȩ víw ɗerwəl yɛ nɔ, kan ı̵́ nii sú̵ggı̵́ vu̵, kan diyáakərə vu̵ á̧ḿ.

²Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

³Bá' 'waapád káń baa taa ví tée, mí dȩn Tayɨɨ míí nag yúú víílí.

⁴Sey káń baa ɓá'ad ví Tayɨɨ ya víí 'waapád tée, mí ɓá"u̵ kan zó̧ó̧ dȩ"ȩ́ȩ,

⁵moo kíí maan moo to̧o̧ 'maŋ palı̵́ ya dəné woolı̵́ há̧á̧ ka ya ya̧ 'ya̧'a̧ yɛ nɔ.

⁶Mí gaa Tayɨɨ ka dəŋ ba'ad du̵u̵ kɔ́lı̵́ víílí yȩ, wú̵ń kɔ́ si̧' la gbug há̧á̧ wú̵ń ya̧ zá̧ga̧ fíiní Yesu Krístu woolı̵́.

⁷Káń taa moo yúú víílí ı̵́ yo̧go̧ 'waapád yȩ, mí taa yagalı̵́. Kóó 'ya̧'a̧ yɛ, a̧n dɨ lig púúsinalȩ́, kóó sey káń dɨ ya̧g kpanné yúú moo to̧o̧ 'maŋŋı̵́ á̧ḿ yɛ nɔ si̧', mí taa ví mbaan də́ń wu̵ yu̵, moo ví nuŋ zó̧ó̧ nán Tayɨɨ woo nag míílí̧ sú̵'ú̵ á̧ḿ.

⁸Káń o̧d ví: “Mí hí̧í̧ ví ú” yɛ, Tayɨɨ gaa ba mín o̧ yagalı̵́, ba mín hí̧í̧ ví 'waapád kan hí̧í̧lí̧ gbo̧o̧ ı̵́ Yesu Krístu woo má nɔ.

⁹Hȩn káń ɓá' Tayɨɨ yúú víílí máa, wu̵ yɛ nɔ, hí̧nní víílí sa̧a̧mé a há'ay laa tíŋ́ tíŋ́, kan moo gaalı̵́, kan moo yȩ́ń taalı̵́ á̧ḿ,

¹⁰moo há̧á̧ i gɛ moo woo pəgən, tée víń mbaa kɔ́ ı̵́ Tayɨɨ ka hí̧í̧ wɔgɔ, nán tóó wú̵ń séen ví zá̧ga̧ Krístu woolı̵́ né á̧ḿ.

¹¹Tée víń baa kɔ́ hȩn ka to̧o̧d Tayɨɨ máa, kan néélȩ́ Yesu Krístu woo, moo nán u̵u̵ na' Tayɨɨ, u̵u̵ dəmmɔ á̧ḿ.

¹²Dan kirtȩ́n vu̵, mí hí̧í̧ i gaa hȩn ka kɔ́y yúú míílí̧ yɛ, hȩn woo wu̵ kɔ́ pȩ́ń, moo to̧o̧ 'maŋ ka dɨ laalı̵́ tíŋ́ tíŋ́ yɛ nɔ.

¹³Moo woo nɔ nán 'waapád lig ŋgó̧ḿna woolı̵́ yɛlı̵́, kan nán tóó vu̵ á̧ḿ, vu̵ gaa ba vu̵n dɔn púúsinalȩ́ yɛlı̵́ moo káń kɔ́d Krístu ba'ad má nɔ.

¹⁴Moo woo nɔ, nán kirtȩ́n tóó vu̵ ɓu̵u̵lı̵́ na'a ku̵u̵ gaa ı̵́ yo̧go̧ á̧ḿ máa, vu̵ nuŋ néélȩ́ moo Tayɨɨ tú"í; dú̵ú̵ kɔ́n vu̵ né á̧ḿ.

¹⁵Moo yȩ́ńne, nán tóó vu̵ sa̧a̧m voolı̵́ vu̵ pa moo Krístu woo kan sɨg moolȩ́ yúú míílí̧, kan hȩn bágané vu̵, a̧máa tóó vu̵ pa voo moo bi kɔ́ hȩn du̵u̵ɨ.

¹⁶Nán ı̵́ ku̵u̵ kɔ́ kan hí̧nní máa, vu̵ gaa voo Tayɨɨ ba 'yɛ́n moo a̧n tú' moo to̧o̧ 'maŋ ba moo yȩ́ńne.

¹⁷A̧máa nán ı̵́ tóó yȩ vu̵ tú' moo Krístu woo kan zó̧ó̧ sɨg moolȩ́. Vu̵ taa ba bin kɔ́ mbaalı̵́ míí lig púúsinalȩ́ yɛ ba a duu mban kɛbbɨ.

¹⁸Tée nɛ́nná? Kóó moo taalı̵́ voo a moo ɓı̵́ddɨ, kóó a moo to̧o̧ȩ á̧ḿ si̧', hȩn tóó təə né. Vu̵ dɨ moo Krístu woo wu̵ tú"í á̧ḿ, ma mí dȩ' míí zó̧ó̧ moo woo nɔ. A̧máa zó̧ó̧ míí wú̵ń dȩ' laa tíŋ́ tíŋ́ á̧ḿ,

¹⁹moo mí gaa hȩn yȩ wú̵ńnɔ tiin hȩn ká̧'a̧d pú̵lı̵́ yúú moo kíí ɓá' Tayɨɨ yȩlȩ́, yigid Yesu Krístu woo wú̵ń maan á̧ḿ.

²⁰Hȩn káń dɨ laalı̵́, káń 'yɛ́ zó̧ó̧ míí wu̵lı̵́ na'a yɛ, sȩ́ḿ wú̵ń kɔ́n mí wu̵lı̵́ né sá̧ḿ. Kóó a̧n mbaa kan vágád, kóó u̵u̵ nɔɔnɔ́ si̧', dú̵ú̵ kɔ́n mí ní á̧ḿ, moo nán vu̵ ho̧ na"ȩ́ Krístu woo sey 'waapád fó̧ó̧ míílí̧ sú̵'ú̵; vu̵ ho̧ 'ya̧'a̧ yɛ á̧ḿ.

²¹Ɨ́ míí máa, a̧n mbaa kan vágád tée, mí mbaad Krístu wu̵. A̧máa a̧n nɔɔ ó̧ tée, míń nuŋ hȩn ha'an wu̵lı̵́ á̧ḿ.

²²A̧máa káń dɨ lá mbaalı̵́ kan vágád yɛ, ba'ad a dɨ laalı̵́ tíŋ́ tíŋ́ tée, mí o̧n ví hȩn káń yeen máa dágá né.

²³Mí dii la ndəg. Hȩn ka du̵u̵ mba máa, mí hí̧í̧ bi lúú la mbaa kan Krístu wu̵.

²⁴A̧máa maa ba mín mbaa zá̧a̧d moo víí nu.

²⁵Moo woo nɔ, mí gaa míń mbaa kan ví, moo zó̧ó̧ 'yɛ́lı̵́ víí a laa tíŋ́ tíŋ́, víń mbaa kan zó̧ó̧ dȩ"ȩ́ wu̵lı̵́ á̧ḿ.

²⁶A̧n duu laa víílí tée, víń dəm fó̧ó̧ víí moo míílí̧, yúú mbaalı̵́ víí Yesu Krístu woolı̵́ yȩ nɔ.

²⁷A̧máa hȩn dágá máa, i mbaa kɔ́ ı̵́ moo to̧o̧ 'maŋ Krístu woo ka o̧ wɔgɔ. Kóó a̧n laa víílí, kóó a̧n laa né si̧', tée míń ki la ba vín nda doo néélȩ́ na'a kan zó̧ó̧ dágá, ba vín sú̵g kɔ́ ba'ad kan zó̧ó̧ 'yɛ́lı̵́ dágá yúú moo to̧o̧ 'maŋŋı̵́ yȩ á̧ḿ.

²⁸Dú̵ú̵ a kɔ́ ví kan ı̵́ maag víí vu̵ sá sá̧ḿ. Tée vú̵ń ho̧ gaa ba bin ti ú. Ɨ́ víí máa, víń gaa ba bíń sə́d sú̵'ú̵ á̧ḿ, moo hȩn yȩ Tayɨɨ wu̵ kɔ́.

²⁹Tayɨɨ wu̵ kɔ́d ví zó̧ó̧ nán yȩ yúú Krístu woolı̵́, moo i 'yɛ́ zó̧ó̧ víí Krístu woolı̵́ dágá sá, a̧máa i nuŋ hȩn ndɔ́gɔné moo woo á̧ḿ.

³⁰Ví gaa, ká ba mín kɔ́ ba'ad Yesu woo néélȩ́ na'a. 'Ya̧'a̧ yɛ ví ki ba mín kɔ́ laa tíŋ́, ma ví sú̵g kɔ́ ba'ad dágá yȩ kɔ́ ı̵́ mí wɔgɔ á̧ḿ.