Read Dii NÁN FILÍB VɄ 2 Bible Online

NÁN FILÍB VɄ 2 - Dii bible

NÁN FILÍB VɄ 2

¹Kíí 'yɛ́ zó̧ó̧ víí Krístu woolı̵́ yȩ, ví nuŋ néélȩ́ wu̵lı̵́ sú̵'ú̵. Krístu ka hí̧í̧ ví yȩ, wu̵ zigid ví zó̧ó̧ á̧ḿ. Yigid Tayɨɨ woo ka to̧n ví yȩ, zó̧ó̧ to̧o̧, kan zó̧ó̧ nán ku̵u̵ dɨ víílí yȩ,

²mí hí̧í̧ i dȩ'ȩn zó̧ó̧ si̧' la gbug. Moo taalı̵́ víí a dágá, hí̧nní víí a dágá, zó̧ó̧ víí a dágá, zó̧ó̧ 'yɛ́lı̵́ víí a dágá á̧ḿ.

³I móón sɨg sá, i soo na"ȩ́ té' sá. A̧máa i nə' yúú, i taa nán tóó vu̵ 'waapád vu̵n mba bi kan na"ȩ́ ó̧.

⁴Kóó nɔ́nná a taa də́ń fó̧ó̧ woo nɔ sá, a̧máa a taa daga vu̵ á̧ḿ.

⁵Moo taalı̵́ Yesu Krístu woo a mbaa víílí sa̧a̧mé á̧ḿ ná':

⁶Yesu ká mbaa woo kɔ́ ı̵́ Tayɨɨ wɔgɔ, a̧máa soon kɛb moo bi vbin na"ȩ́ tóó ı̵́ a man kan ı̵́ Tayɨɨ woo nɔ né.

⁷A̧máa aga gbɔ hȩn 'waapád, ɓɛ mbaalı̵́ gba'aɨ. Tii mbaa kɔ́ ı̵́ nánán wɔgɔ, tú' fó̧ó̧ woo nánánná.

⁸Aga nə' yúú woo, kid Tayɨɨ tɔ́g há̧á̧ nɔɔn zu̵u̵ wu̵lı̵́ la' vbagadı̵́ á̧ḿ.

⁹Moo woo nɔ Tayɨɨ na"o̧, luuwu̵ dɔg yúba mba hȩn 'waapád, 'yɛ́ddu̵ yéé ı̵́ ka mba yéé tóó vu̵ 'waapád máa,

¹⁰moo hȩn ı̵́ be"ı̵́, kan ı̵́ hágá yɛlı̵́ vu̵, kan ı̵́ kaa nɔmmé[1] vu̵, u̵u̵ ki yéé Yesu woo tée, u̵u̵ nə'əyó̧.

¹¹Tée nán 'waapád vú̵ń o̧ Yesu Krístu ba wu̵ ı̵́ 'yɛ́lı̵́, moo Ba'á Tayɨɨ a nuŋ na"ȩ́ wu̵lı̵́.

¹²Ɨ́ hí̧í̧lí̧ míí vu̵, káń mbaa víílí máa, ví kin tɔ́g. A̧máa hȩn ka du̵u̵ máa, káń víílí pɛ́lı̵́ yȩ, i kin tɔ́g mba, i kɔ́ ba'ad kan dú̵ú̵, kan zó̧ó̧ tu̵u̵lı̵́ á̧ḿ, moo i sə́ddú̵,

¹³moo Tayɨɨ wú̵ńnɔ baa pú̵ ví hí̧í̧lí̧ du̵u̵, kan néélȩ́ ma víń baa kɔ́ hȩn hí̧í̧lí̧ woo.

¹⁴I kɔ́ hȩn 'waapád, moo ŋguuní a sá, moo fanné a sá á̧ḿ,

¹⁵moo i mbaa mbaalı̵́ waa Tayɨɨ woo vu̵ yu̵. I duu dooká Tayɨɨ woo vu̵ yu̵, i mbaa kan zó̧ó̧ ká̧'a̧d; hȩn ɓı̵́d tóó a vi̧i̧ ví sá. I tú sa̧a̧m nán hȩn kə̧ə̧g kɔ́lı̵́ yȩ voolı̵́, kan nán ɓı̵́d vu̵ kɔ́ ı̵́ zoo waa vu̵ be"ı̵́ wɔgɔ.

¹⁶I pa̧n vu̵ la moo vágád káákáá ú̵. Tow i kɔ́ ı̵́ yo̧go̧ tée, míń dəm fó̧ó̧ míí zá̧ga̧ Krístu woolı̵́, tée míń o̧ hȩn pee ba bin kɛn ɗug yɛ té' né, ba bin kɔ́ ba'ad yɛ ta̧a̧n té' né á̧ḿ.

¹⁷Zó̧ó̧ 'yɛ́lı̵́ víí mbaad Tayɨɨ kɔ́ ı̵́ hȩn ha"ı̵́ wɔgɔ. Kóó u̵u̵ nɔɔ fó̧ó̧ míí kɔ́ ı̵́ hȩn ha"ı̵́ wɔgɔ á̧ḿ si̧', zó̧ó̧ wú̵ń dȩ'ȩn kɔ́ ı̵́ ka dȩ' ví yȩ wɔgɔ á̧ḿ.

¹⁸I dȩ' zó̧ó̧, i sú̵g dȩ' zó̧ó̧ kan mí á̧ḿ.

¹⁹Mí taa yúú ı̵́ 'yɛ́lı̵́ baa ví Yesu woolı̵́, ba bíń ba' Timɔtée la víílí dɨlı̵́. Sey a̧n ki moo víí tée, zó̧ó̧ wú̵ń pɛn,

²⁰moo mí ho̧n nán tóó 'yɛ́n zó̧ó̧ víílí na'a kɔ́ ı̵́ Timɔtée wɔgɔ né.

²¹A̧máa nán tóó vu̵ ká̧ŋ́ voo fó̧ó̧ voo nɔ, vu̵ taan hȩn Yesu Krístu woo né.

²²Ví gaa Timɔtée máa, mbaalı̵́ woo, kan ta ya̧g buu sá woo á̧ḿmɔ́. Maan ba'ad kɔ́lı̵́ kɔ́ ı̵́ waa ka kɔ́ ba'ad kan ba' woo wɔgɔ yúú moo to̧o̧ 'maŋŋı̵́.

²³Mí taa, a̧n gaa mbaalı̵́ míí yɛ tée, míń há̧á̧ ba"u̵ la víílí dɨlı̵́.

²⁴Mí gaa ı̵́ 'yɛ́lı̵́ woolı̵́ máa, míń dɨ laalı̵́ víílí dɨlı̵́ há̧ná á̧ḿ.

²⁵Da ba ví kirtȩ́n Epafodíd, dan ba'ad kíí ba"u̵ ya, ka pa̧n ya hȩn káń hí̧í̧ pee máa, vɔ́ sú̵g kɔ́ ba'ad néélȩ́ na'a wu̵lı̵́ á̧ḿ, ma mí taa, maa ba mín ba"u̵ vȩ' laan víílí.

²⁶Hí̧í̧ bi la ho̧ ví 'waapád á̧ḿ. Zó̧ó̧ tó̧"o̧, moo ká ví ki hȩn ba ho̧o̧wo̧ ó̧.

²⁷Ho̧o̧ woo zaa kan nɔɔ ó̧. A̧máa Tayɨɨ wu̵ kɔ́ddu̵ zó̧ó̧ nán. Kɔ́n wu̵ yu̵ dágá né, kɔ́n á̧ḿ, moo a̧n nuŋ zó̧ó̧ ví̧i̧ní ha'an sá.

²⁸Moo woo nɔ, mí ba"u̵ la víílí há̧ná, moo i ho̧go̧, zó̧ó̧ a ka̧' ví, a dȩ' ví á̧ḿ, moo zó̧ó̧ a ví̧i̧n sá á̧ḿ.

²⁹I fȩȩwo̧ kan yɛ́g ı̵́ 'yɛ́lı̵́ woo, kan zó̧ó̧ dȩ"ȩ́ du̵u̵ na'a. I na' nán ı̵́ yo̧go̧ máa vu̵ ú̵,

³⁰moo zaa kan nɔɔ moo ba'ad Krístu woolı̵́. Kóó nɔm a yaa woolı̵́ bə́"ú̵ si̧', fȩȩ ba'ad víí kɔ́n á̧ḿ.