Read Dii NÁN FILÍB VɄ 3 Bible Online

NÁN FILÍB VɄ 3 - Dii bible

NÁN FILÍB VɄ 3

¹A̧máa dan kirtȩ́n vu̵, zó̧ó̧ víí a dȩ' ı̵́ 'yɛ́lı̵́ baa ví woolı̵́ la ú̵! Káń baa faa hȩn yɛ bíńda o̧d ví yɛ, míílí̧ máa, hȩn fó̧ó̧ ta̧a̧née pɛ́lı̵́; ı̵́ víí á̧ḿ, víń nuŋ néélȩ́ tóó wu̵lı̵́.

²I gág kan ya̧'a̧d yȩ vu̵ ú̵, nán ba'ad ɓı̵́d kɔ́lı̵́, ku̵u̵ hí̧í̧ do̧ŋ dɔ́lı̵́ na'a yȩ vu̵ yu̵.

³Ɨ́ baa ví, ba ví nán do̧ŋ dɔ́lı̵́ yȩ́ń vu̵ yu̵! Baa kɔ́d ví Tayɨɨ ba'ad kan yigid woo yɛ. Ba dȩ' ví zó̧ó̧ Yesu Krístu woolı̵́. Ba 'yɛ́n ví baa ví zó̧ó̧ hȩn fó̧lȩ́ vu̵lı̵́ né.

⁴Mí á̧ḿ, ka míń hí̧í̧ ú̧ tée, ka míń 'yɛ́ zó̧ó̧ míí yúú hȩn fó̧ó̧ míí vu̵lı̵́ á̧ḿ. Tow nán tóó a taa ba bin dɨ kan hȩn tóó fó̧ó̧ biilí, bin 'yɛ́ zó̧ó̧ bii wu̵lı̵́ á̧ḿ tée, míi mbaga.

⁵Ku̵u̵ ha̧a̧n máa, bá' ka'andaddú̵ woo vu̵ dɔn do̧ŋ wu̵lı̵́. Vu̵ ha̧a̧n zig Izraɛ́llı̵́, zig Bɛnzamɛ́ŋ woolı̵́, zig Eebərə́ə də́ń kəddɨ. Ka' ı̵́ dooká Múúsa woo vu̵ duulí máa, mí nán farísaɨ.

⁶Ká mí pi zó̧ó̧, mí duun nán sú̵ggı̵́ vu̵ kan moo. Moo dooká Tayɨɨ woo vu̵ duulí máa, nán tóó wú̵ń séen mí wu̵lı̵́ né á̧ḿ.

⁷Hȩn yȩ vu̵ míílí̧ máa, nán tóó vú̵ń o̧ ba mín nuŋ hȩn gbo̧o̧ ba'a du̵u̵lı̵́, a̧máa Krístu woolı̵́ máa, mí ho̧ míí hȩn yȩ ba vu̵n hȩn nag tunníi.

⁸A̧máa mí ho̧ míí hȩn tóó vu̵ 'waapád kɔ́ ı̵́ hȩn nag tunní vu̵ wɔgɔ á̧ḿ yúú hȩn gbo̧o̧ yɛlı̵́. A̧máa hȩn ka mba máa, wu̵ káń gaa ı̵́ 'yɛ́lı̵́ míí Yesu Krístu yɛ nɔ. Yúú woolı̵́, mí gbɔ hȩn 'waapád, mí ho̧ hȩn ı̵́ tóó yȩ vu̵ kɔ́ ı̵́ hȩn yɛnné búúlí vu̵ wɔgɔ, moo há̧á̧ bi mbaa kan Krístu,

⁹bi sú̵gú̵n kannɔ ó̧. Mí nugun hȩn yȩ moo káń duun dooká Tayɨɨ woo vu̵ na'a má nɔ né, a̧máa moo káń 'yɛ́ zó̧ó̧ míí Krístu woolı̵́ má nɔ. Wu̵ hȩn Tayɨɨ ka mbɔ́g, moo aa to̧n ví wu̵lı̵́ yúú zó̧ó̧ 'yɛ́lı̵́ yɛlı̵́.

¹⁰Kóó a̧n nuŋ hȩn ndɔ́gɔné, kóó a̧n nɔɔ kɔ́ ı̵́ Krístu ka nuŋ hȩn ndɔ́gɔné, ka nɔɔ yȩ wɔgɔ si̧', mí hí̧í̧ séý bi gaawu̵, a nim fó̧ó̧ míí nɔmmé á̧ḿ.

¹¹Mí soo də́ń hi̧naa bi níḿ nɔmmé.

¹²Mí nuŋ hȩn woo 'waa ná né; mí mbaa ná kɔ́ ı̵́ Tayɨɨ ka hí̧i̧n wɔgɔ né á̧ḿ, a̧máa mí dɨ lá ɗug kɛlı̵́, moo bi nuŋŋɔ́, moo Yesu Krístu kan sı̵́ nagá ó̧.

¹³Káy, dan kirtȩ́n vu̵, mí taan ba bin nuŋŋɔ sú̵'ú̵ né, a̧máa mí dɨ hȩn dágá yȩ wu̵ kɔ́lı̵́. Mí záń hȩn ı̵́ pigim vu̵, mí sȩn fó̧ó̧

¹⁴kɛ ɗug líí la tə́g, bi la nuŋ hȩn Tayɨɨ ka been, a̧n la nuŋ biilí, kan yɛ́g Yesu Krístu woo yȩ pȩ́ń.

¹⁵Ɨ́ baa ví, kaa mbaa ví kɔ́ ı̵́ Tayɨɨ ka hí̧í̧ wɔgɔ yɛ, ba taa ví hȩn dágá yȩ nɔ. Tow i taa moo ı̵́ víí dɨ kə́dda tée, Tayɨɨ wú̵ń tú'ud ví hȩn woo á̧ḿ.

¹⁶A̧máa ba duu ví baa hi̧naa dágá yɛ nɔ kɔ́ ı̵́ kaa kɔ́ ví tíŋ́ yɛ wɔgɔ.

¹⁷Dan kirtȩ́n vu̵, i duu hȩn kɔ́lı̵́ Yesu woo kɔ́ ı̵́ káń duu yɛ wɔgɔ á̧ḿ. I 'yɛ́ nɔ́ɔ́ víí nán ku̵u̵ duu hȩn kɔ́lı̵́ vóó yɛ voolı̵́.

¹⁸Mí baa o̧d ví, mí duu faa o̧d ví, kan ká̧ń ya̧gá̧ yɔ. Nán tóó vu̵ ɓu̵u̵lı̵́ na'a, vu̵ máń nɔm Yesu woo la' vbagadı̵́ yȩ ó̧.

¹⁹Tayɨɨ wú̵ń tud vu̵, moo vu̵ taa voo də́ń hȩn lálı̵́ voo yȩ nɔ. Hȩn fó̧ó̧ dəmné voo wu̵ hȩn sȩ́ḿ vu̵ yu̵. Vu̵ taa voo də́ń hȩn hágá yɛ vu̵ yu̵.

²⁰Ba ví baa waa hág ı̵́ be"ı̵́ vu̵ yu̵. Ba laa ví Yesu Krístu ı̵́ 'yɛ́lı̵́ baa ví ú, wú̵ń yaa wu̵lı̵́, wú̵ń səd ba ví á̧ḿ.

²¹Wú̵ń tii fó̧ó̧ gíḿ baa ví yɛ kɔ́ ı̵́ fó̧ó̧ woo ka na' na'a yȩ wɔgɔ. Kɔ́ hȩn yȩ vu̵ kan néélȩ́ woo ka mba hȩn 'waapád yȩ nɔ.