Read Dii NÁN FILÍB VɄ 4 Bible Online

NÁN FILÍB VɄ 4 - Dii bible

NÁN FILÍB VɄ 4

¹Dan kirtȩ́n ı̵́ hí̧í̧lí̧ míí vu̵, káń 'yɛ́ zó̧ó̧ míí víílí yȩ, víi hȩn zó̧ó̧ dȩ"ȩ́ míí, kan hȩn yúú na"ȩ́ míí. Ɨ́ hí̧í̧lí̧ míí vu̵, i nda doo ı̵́ 'yɛ́lı̵́ baa ví woolı̵́ ı̵́ yo̧go̧!

²Mí gagad Ɛvodíi vu̵ moo kan Siŋtís. Moo taalı̵́ voo a dágá tíŋ́ ı̵́ 'yɛ́lı̵́ woolı̵́.

³Dan ba'ad míí, mí hí̧í̧ bi vim, a̧m mbɔ́gɔn wakȩ́ȩ́ yȩ vu̵ ú̵, moo vu̵u̵ dii ba'ad maan də́ń moo to̧o̧ 'maŋ palı̵́, vu̵ sú̵g kan Kelemáŋ, kan dan ba'ad tóó vu̵. Yéé voo dɨ debtere gbaŋ waalı̵́ Tayɨɨ woolı̵́ á̧ḿ.

⁴I dȩ' zó̧ó̧ sey 'waapád tíŋ́ ı̵́ 'yɛ́lı̵́ woolı̵́. Mí duu o̧d ví, i dȩ' zó̧ó̧ la ú̵!

⁵Nán 'waapád u̵u̵ ho̧ zó̧ó̧ ká̧'a̧d víí á̧ḿ; ı̵́ 'yɛ́lı̵́ dɨ bə́'.

⁶I gbɔ́ dam yúú hȩn tóó vu̵lı̵́ sá, a̧máa hȩn kíí hí̧í̧ máa, i ɓá' Tayɨɨ; i ɓá"u̵ kan nag dȩné á̧ḿ.

⁷Tée ká̧'a̧d Tayɨɨ woo ka mba moo taalı̵́ nánán voo 'waapád yȩ, wú̵ń tu̵ zó̧ó̧ víí, kan moo taalı̵́ víí yȩ Yesu Krístu woolı̵́.

⁸Dan kirtȩ́n vu̵, hȩn ka kéé máa, i 'yɛ́ zó̧ó̧ víí yúú hȩn yȩ́ń kɔ́lı̵́ vu̵lı̵́, kan hȩn du̵u̵ vu̵, kan hȩn ka to̧o̧d Tayɨɨ, kan hȩn ka mbaa dȩ"ȩ́ na'a, kan hȩn ka maa hí̧í̧lí̧, kan hȩn to̧o̧ vu̵, kan hȩn yȩ́ń vu̵, kan hȩn ka maa dəmné máa á̧ḿ.

⁹Hȩn kíí kúgú míílí̧, káń baa tú'ud ví, kan hȩn kíí ki, kíí ho̧ káń baa kɔ́ á̧ḿ máa, i duu wu̵ yu̵. Tée Tayɨɨ ı̵́ ká̧'a̧d pú̵lı̵́ yȩ wú̵ń mbaa kan ví.

¹⁰Zó̧ó̧ míí dȩ' yúú ı̵́ 'yɛ́lı̵́ woolı̵́ mbaa ná', moo kíí duu nuŋ hi̧naa taan há̧ná yɛ nɔ. Ví dɨn taalı̵́ tíŋ́ á̧ḿ, a̧máa ví nugun hi̧naa né.

¹¹Mí o̧n moo bin mbaan gíḿmi né, moo ı̵́ míí, mí kúgú hȩn bi mbaa kan zó̧ó̧ dȩ"ȩ́ yúú hȩn káń nuŋ yɛlı̵́.

¹²Mí gaa gíḿ mbaalı̵́ ú̵; mí gaa mbaalı̵́ ya hȩn naalȩ́ á̧ḿ. Mí gaa mbaalı̵́ ya kə́dkə́d 'waapád, kan ya 'waapád á̧ḿ. Sey tóólı̵́ tée, mí nuŋ hȩn lálı̵́ ɓu̵u̵lı̵́ na'a; sey tóólı̵́ tée, go̧o̧m ya̧n. Sey tóólı̵́ tée, mí nuŋ hȩn vu̵ mba; sey tóólı̵́ tée, mí nugun na'a né.

¹³A̧máa hȩn tóó mban mí kɛb wu̵lı̵́ né, moo Krístu ka pú̵n néélȩ́ woo yȩ nɔ.

¹⁴Kóó ı̵́ yo̧go̧ si̧', sey ká kíí ho̧ hȩn ka mban kɛb máa, ví ya maan á̧ḿ; máa du̵u̵ ú̵.

¹⁵Nán Filíb vu̵, ví gaa á̧ḿ. Sey káń dəŋ pad ví moo to̧o̧ 'maŋ, ma káń lúú hág Masedo̧wá̧nné máa, nán sú̵ggı̵́ tóó vu̵ maan ví hȩn pú̵lı̵́ yúú míílí̧ ní, séý aga víi baa pú̵n hȩn dágá.

¹⁶Káń dɨ kaa Tesaloníilí̧ máa, ví ba'an hȩn ka geen máa wu̵lı̵́ do' idú á̧ḿ.

¹⁷Mí soon moo bi baa nugun hȩn víílíi ní, a̧máa mí kɔ́ ı̵́ yo̧go̧ moo Tayɨɨ a bag ví hȩn laan tíŋ́ tíŋ́.

¹⁸Mí nuŋ hȩn kíí pú̵ Epafodíd na'a a pa̧n ya ú̵ yɛ 'waapád sú̵'ú̵. Hȩn woo ɓu̵u̵ mba ú̵ á̧ḿ. Hȩn kíí pú̵ yȩ vu̵ mbaa kɔ́ ı̵́ hȩn ha"ı̵́ sa̧g to̧o̧ Tayɨɨ ka hí̧í̧ máa wɔgɔ; vu̵ to̧o̧d Tayɨɨ sú̵'ú̵.

¹⁹Tayɨɨ míí wú̵ńnɔ ha'ad ví hȩn kíí hí̧í̧ máa 'waapád dȩ"ȩ́ na'a Yesu Krístu woolı̵́, moo wu̵ ı̵́ naa.

²⁰Tayɨɨ wu̵ Ba' baa ví; ba na"o̧ ví há̧á̧ káákáá, aamɛ́n.

²¹I vá' nán Tayɨɨ woo vu̵ kan yɛ́g Yesu Krístu woo wu̵lı̵́ 'waapád. Da ba ví kirtȩ́n ı̵́ míílí̧ yɛ vu̵ vá' ví wu̵lı̵́ á̧ḿ.

²²Nán Tayɨɨ woo yɛlı̵́ vu̵ vá' ví 'waapád. Nán kíi gbanii nán Róma voo woolı̵́, vu̵u̵ vá' ví mba.

²³Zó̧ó̧ nán ı̵́ 'yɛ́lı̵́ baa ví Yesu Krístu woo a mbaa kan ví ú!