Read Dii NÁN KOLOSÍI VɄ 1 Bible Online

NÁN KOLOSÍI VɄ 1 - Dii bible

NÁN KOLOSÍI VɄ 1

¹Mí Póllu̵, waa ba'ad Yesu Krístu woo nɔ, moo Tayɨɨ wu̵ hí̧í̧ bi 'yɛ́n ı̵́ yo̧go̧. Vɔ́ sú̵g kan Timɔtée, da ba ví kirtȩ́n yɛ á̧ḿ,

²vóo ba'ad nán Tayɨɨ woo vu̵ kaa Kolosíilí, kíí duu Yesu gbɔn né yȩ víw ɗerwəl yɛ nɔ. Ba' baa ví Tayɨɨ a kɔ́d ví zó̧ó̧ nán, a 'yɛ́ ví i mbaa ká̧'a̧dɨ.

³Kóó baa o̧d Tayɨɨ Ba' ı̵́ 'yɛ́lı̵́ baa ví Yesu Krístu woo moo tée, vɔ́ dȩnnɔ nag bá' 'waapád yúú víílí.

⁴Vɔ́ ki moo zó̧ó̧ 'yɛ́lı̵́ víí Yesu Krístu woolı̵́ yȩ, kan hí̧í̧lí̧ máa kíí hí̧í̧ nán Tayɨɨ woo vu̵ 'waapád yȩ nɔ.

⁵Sey ya̧g ba'ad yȩ́ń, ı̵́ moo to̧o̧ 'maŋ yɛ ka dəŋ ya̧ víílí máa, vu̵ tú'ud ví hȩn gbo̧o̧ Tayɨɨ ka 'yɛ́d ví be"ı̵́ yȩ nɔ. Ma ví 'yɛ́ zó̧ó̧ víí vu̵ wu̵lı̵́.

⁶Nán vu̵ dɨ moo to̧o̧ 'maŋ kilí laa tíŋ́ tíŋ́, kan hȩn baggı̵́ woo yȩ ya̧ sı̵́ hág 'waapáddú̵ kɔ́ ı̵́ ka kɔ́y víílí yȩ wɔgɔ. Dəŋ sey kíí dəŋ ki moo zó̧ó̧ nán Tayɨɨ woo yȩ́ńná yȩlȩ́.

⁷Epafára, da ba ví ba'ad, kaa hí̧í̧wo̧ ví na'a yɛ, ká wu̵ tú'ud ví moo yȩ. Kɔ́ ba'ad Krístu woo kan zó̧ó̧ woo 'waapád víílí sa̧a̧mé.

⁸Wu̵ ya o̧d vɔ́ zó̧ó̧ nán yigid Tayɨɨ woo ka pú̵ ví yȩ á̧ḿ.

⁹Moo woo nɔ, sey kóó ki moo ku̵u̵ o̧d vɔ́ yúú víílí yɛ máa, vɔ́ dȩn Tayɨɨ nag gən yúú víílí ní á̧ḿ. Vɔ́ vi Tayɨɨ a kɔ́ moo gaalı̵́ víí kan moo taalı̵́ víí a laa tíŋ́, moo há̧á̧ i gaa hȩn hí̧í̧lí̧ yigid woo ka pú̵ máa 'waapád.

¹⁰Tée víń mbaa kɔ́ ı̵́ ı̵́ 'yɛ́lı̵́ ka hí̧í̧ wɔgɔ, víń kɔ́ hȩn hí̧í̧lí̧ woo 'waapád. Ba'ad du̵u̵ víí vú̵ń laa tíŋ́ tíŋ́; víń gaa Tayɨɨ laa tíŋ́ tíŋ́ á̧ḿ.

¹¹Vɔ́ vi Tayɨɨ a pú̵ ví néélȩ́ gbo̧o̧ woo yȩ 'waa, tée víń ma' zó̧ó̧ yúú hȩn 'waapáddı̵́,

¹²víń dȩn Ba'á Tayɨɨ nag kan zó̧ó̧ dȩ"ȩ́ á̧ḿ. Wu̵ tii ví nán woo, moo i nuŋ hȩn yȩ"ȩ́ gbaŋ waalı̵́ túlí biilí.

¹³Wu̵ vbid ba ví vud nag néélȩ́ vid woolı̵́[1] laan ba ví ya gbaŋ waalı̵́ Waa hí̧í̧lí̧ woo woolı̵́.

¹⁴Waa ka pú̵ fó̧ó̧ woo moo bi səd ba ví ú yɛ; Tayɨɨ kéé hȩn ɓı̵́d baa ví vu̵ gbɔ moo woo nɔ.

¹⁵Krístu wu̵ fóto Tayɨɨ ı̵́ kaa ho̧nnɔ ví kan nɔ́ɔ́ né yȩ woo. Tayɨɨ dəŋ ha̧a̧ wu̵ yu̵ tíŋ́, ma yɨb hȩn tóó vu̵ 'waapád pigim.

¹⁶Tayɨɨ yɨb hȩn 'waapád kan wu̵ yu̵, hȩn ku̵u̵ dɨ be"ı̵́, kan ı̵́ hágá yɛ vu̵; ı̵́ kaa ho̧ vu̵ ví kan nɔ́ɔ́, kan ı̵́ kaa ho̧n vu̵ ví ní á̧ḿ; yigid néélȩ́ vu̵, kan hȩn gbaŋ waalı̵́ vu̵, kan hȩn gbo̧o̧ vu̵, kan hȩn néélȩ́ tóó vu̵ 'waapád. Tayɨɨ yɨb vu̵ kan wu̵ yu̵, yɨb vu̵ moo woo nɔ á̧ḿ.

¹⁷Wu̵ mbaa tíŋ́, ma hȩn 'waapád vu̵ yı̵́b. Hȩn 'waapád vu̵ mbaa kan néélȩ́ woo nɔ.

¹⁸Wu̵ man kan yúú eglíizə woo. Fó̧ó̧ máa, nán sú̵ggı̵́ vu̵ yu̵. Wu̵ ı̵́ hȩn dəné. Wu̵ waa nii, wu̵ dəŋ níḿ nɔmmé, moo aga a mbaa ı̵́ nii yúú hȩn 'waapáddı̵́,

¹⁹moo Tayɨɨ hí̧í̧ hȩn bii 'waapád a mbaa fó̧ó̧ Krístu woolı̵́.

²⁰Tayɨɨ hí̧í̧ aga bi duu to̧n kan hȩn 'waapád yúú woolı̵́, bi to̧n kan hȩn 'waapád be"ı̵́ kan hágá á̧ḿ yúú nɔm woo la' vbagadı̵́ yȩlȩ́.

²¹Ví á̧ḿ, ká ví mbaan dáŋ́ Tayɨɨ woolı̵́ né. Ká ví ı̵́ maag woo yúú hȩn ɓı̵́d víí kíí taa, kíí kɔ́ yȩlȩ́.

²²A̧máa 'ya̧'a̧ yɛ máa Tayɨɨ duu to̧n kan ví yúú hȩn ndɔ́gɔné Waa woo woolı̵́, kan nɔm woo yȩlȩ́, moo i mbaa tíŋ́ biilí kɔ́ ı̵́ ka hí̧í̧ wɔgɔ dȩ"ȩ́ na'a, hȩn ɓı̵́d tóó a sá.

²³A̧máa i 'yɛ́ zó̧ó̧ víí Tayɨɨ woolı̵́ kəd, i nda doo woolı̵́. I hɨ'ɨn moo taalı̵́ víí yúú moo taalı̵́ Tayɨɨ ka 'yɛ́d ví yȩlȩ́ sá, kɔ́ ı̵́ moo to̧o̧ 'maŋ ka o̧d ví yȩ wɔgɔ. Moo dágá yȩ, vu̵ pad nán vu̵ wu̵ yu̵ ya 'waapád hágá yɛlı̵́. Mí á̧ḿ, mí mbaa nán ba'ad wu̵lı̵́ á̧ḿ yɔ.

²⁴'Ya̧'a̧ yɛ máa zó̧ó̧ míí dȩ' moo hȩn ndɔ́gɔné káń nuŋ moo víílí yɛlı̵́, moo hȩn tóó ka kéé Krístu ka kɔ́n ná moo nán sú̵ggı̵́ voo né máa, míi kɔ́ si̧' moo nán sú̵ggı̵́ voo. Nán sú̵ggı̵́ sú̵u̵ vu̵u̵ fó̧ó̧ Krístu woo.

²⁵Tayɨɨ wu̵ tiin nán ba'ad nán sú̵ggı̵́ yȩ voo. Tayɨɨ gbɔn sa̧a̧m víílí yɛlı̵́, moo a̧n pad ví moo woo 'waapád.

²⁶Moo sú̵u̵ Tayɨɨ ká yu̵ggu̵ ya káákáá, ká yu̵g nán vu̵ 'waapád yȩ, 'ya̧'a̧ yɛ vud hȩn woo tú'ud sı̵́ nán woo vu̵ ú̵.

²⁷Tayɨɨ hí̧í̧ bi vud moo mbɔ́ggı̵́ gbo̧o̧ woo yȩ tú'ud ví ú. Moo yȩ du̵u̵ la wu̵lı̵́ yúú nán ku̵u̵ Yúúda pɛ́lı̵́ máa voolı̵́. Hȩn ka mbɔ́g yu̵g sú̵u̵ wu̵ yɛ nɔ, Krístu dɨ víílí, víń gaa ba bíń dɔ́ gbaŋ waalı̵́ Tayɨɨ woolı̵́ á̧ḿ.

²⁸Ma vɔ́ tú'ud nán 'waapád vu̵ moo Krístu woo. Vɔ́ gaa moo woo vu̵ 'waapád pȩ́ń, vɔ́ tú'ud nán vu̵ kan hi̧naa hi̧naa, vɔ́ gagad vu̵, moo u̵u̵ sú̵gú̵n kan Krístu, u̵u̵ mbaa kɔ́ ı̵́ Tayɨɨ ka hí̧í̧ wɔgɔ.

²⁹Yúú hȩn máa káń dɨ ba'ad kɔ́lı̵́ wu̵lı̵́ néélȩ́ na'a yɛ, mí kɔ́ kan néélȩ́ gbo̧o̧ Krístu ka pú̵n yɛ nɔ.