Read Dii NÁN KOLOSÍI VɄ 2 Bible Online

NÁN KOLOSÍI VɄ 2 - Dii bible

NÁN KOLOSÍI VɄ 2

¹Mí hí̧í̧ i gaa ba'ad máa káń dɨ kɔ́lı̵́ néélȩ́ na'a yɛ, ba ba'ad gbo̧o̧ȩ, moo víí kan nán Lawdisée voo, kan nán ı̵́ ku̵u̵ ho̧n mí ní máa voo á̧ḿ.

²Mí hí̧í̧ zó̧ó̧ voo a ka̧', u̵u̵ hí̧n 'waa, u̵u̵ hi̧' kan moo gaalı̵́ yȩ́ń, u̵u̵ dii la dəg, moo u̵u̵ gaa hȩn Tayɨɨ woo ba ka yu̵g yȩ, ba Krístu wu̵.

³Moo gaalı̵́, kan nɔ́ɔ́ 'wɔ́lı̵́ 'waapád yú̵g dɨ woolı̵́.

⁴Mí o̧d ví moo yɛ moo baa ya̧g kúḿ tóó kan zo' ví ú.

⁵Kóó a̧n mbaan kan ví ní si̧', zó̧ó̧ míí dɨ víílí. Káń ho̧ kíí 'yɛ́ zó̧ó̧ Krístu woolı̵́ du̵u̵ na'a, kíí nda doo wu̵lı̵́ yȩ, zó̧ó̧ dȩ'ȩn á̧ḿ.

⁶Kíí fȩȩ moo Krístu ba wu̵ ı̵́ 'yɛ́lı̵́ yȩ, i duu wu̵ yu̵.

⁷I nda doo wu̵lı̵́, i mbaa də́ń woolı̵́, i 'yɛ́ zó̧ó̧ woolı̵́ kɔ́ ı̵́ ku̵u̵ tú'ud ví yȩ wɔgɔ. Nag dȩné víí a ɓu̵u̵ á̧ḿ.

⁸I gággú̵, nán tóó a buu ví kan moo tú"í nánán voo sá, kan hȩn zo"ı̵́ lee vu̵, kan hȩn dikab voo vu̵, kan moo tú"í yúú yigid néélȩ́ tóó vu̵lı̵́, ka yúú Krístu woolı̵́ pɛ́lı̵́ máa vu̵ á̧ḿ.

⁹Hȩn Tayɨɨ woo 'waapád dɔ́ hi̧' dɨ Krístu woolı̵́, vu̵ man kííd á̧ḿ.

¹⁰Hȩn woo hi̧' dɨ víílí 'waapád á̧ḿ. Wu̵ mbaa yúú hȩn gbo̧o̧ voolı̵́ 'waapád, kan hȩn néélȩ́ tóó vu̵ á̧ḿ.

¹¹Kíí sú̵gú̵n kan Krístu yȩ, ví dɔ́ do̧ŋ tóó sú̵'ú̵, do̧ŋ ı̵́ nánán ku̵u̵ dɔn kan nag má nɔ né, a̧máa ví hı̵́'ı̵́n sı̵́ kan hȩn ɓı̵́d ka buu ví yȩ ó̧. Do̧ŋ dɔ́lı̵́ Krístu woolı̵́ wu̵ yȩ nɔ.

¹²Ku̵u̵ woo ví mam Tayɨɨ woo máa, ví sú̵g dɔ́ sı̵́ kan Krístu bɛ́ɛ́gı̵́ ú̵. Ví duu sú̵g níḿ nɔmmé á̧ḿ, moo kíí 'yɛ́ zó̧ó̧ néélȩ́ Tayɨɨ woo ka nim Krístu nɔmmé yȩ woolı̵́ má nɔ.

¹³Ká ví mbaa nɔmná yúú hȩn kɔ́lı̵́ sɔnné víí vu̵lı̵́, ví nán Yúúda pɛ́lı̵́ á̧ḿ. A̧máa Tayɨɨ ya kéé hȩn kɔ́lı̵́ sɔnné baa ví gbɔ la 'waapád; kɔ́ ví, ví sú̵g mbaa zá̧a̧d kan Krístu á̧ḿ.

¹⁴Kaa duun ví dooká Tayɨɨ woo vu̵ né máa, duu ba ví ɓoo. A̧máa ɓɛ ɗerwəl ɓoo baa ví ga' la' vbagadı̵́, na'ad kéé gbɔ la.

¹⁵Krístu ka nɔɔ la' vbagadı̵́ máa, Tayɨɨ sid hȩn gbo̧o̧, kan hȩn néélȩ́ tóó vu̵, vu̵ nugun sı̵́ néélȩ́ né. Buu vu̵ gba'a, kɔ́d vu̵ hȩn sȩ́ḿ la zo"ı̵́.

¹⁶Moo woo nɔ, i gbɔd nán tóó a sə̧' moo yúú hȩn lálı̵́ víí, kan hȩn zɔlı̵́ víí vu̵lı̵́ sá, kóó yúú zá̧ga̧ mam vúnní vu̵lı̵́, kóó moo sȩȩ 'maŋ kan zá̧ga̧ asawə vu̵lı̵́ á̧ḿ.

¹⁷Hȩn woo vu̵ mbaa kɔ́ ı̵́ yigid fó̧ó̧ woo wɔgɔ, moo yigid tú' fó̧ó̧ ban yaa dɨlı̵́, a̧máa fó̧ó̧ máa wu̵ Krístu wu̵.

¹⁸Nán tóó a vbid hȩn sú̵ú̵lı̵́ víí kan hȩn zo"ı̵́ sá. Vu̵ ho̧ fó̧ó̧ voo hȩn leená. Vu̵ kɔ́d maleeka vu̵ ba'ad, vu̵ o̧ ba bin ho̧ hȩn tóó vu̵, ma vu̵ na' yúú moo hȩn lee taalı̵́ nánán voo yȩlȩ́.

¹⁹Vu̵ má'an voo kan Krístu né; Krístu wu̵ yúú baa ví, wu̵ gbá̧' fó̧ó̧ woo 'waapád, ma ndíd vu̵ bé'én ya bé'ené voo vu̵lı̵́; fó̧ó̧ woo na' kɔ́ ı̵́ Tayɨɨ ka hí̧í̧ wɔgɔ á̧ḿ.

²⁰Kíí sú̵g nɔɔ kan Krístu, kíí gbɔ moo tú"í yúú yigid néélȩ́ tóó vu̵lı̵́ yȩ, moo ȩn ví duu mbaa kɔ́ ı̵́ nánán hágá yɛ vu̵ wɔgɔlá? Moo ȩn ví duu dooká voo yȩ vu̵lá?

²¹Vu̵ o̧: “I ɓɛ ı̵́ yɛ sá;” “I bé' ı̵́ yɛ ho̧ sá;” “I za' ı̵́ yȩ sá” á̧ḿ.

²²Vu̵ pa moo yúú hȩn nán ku̵u̵ za', ku̵u̵ kɔ́ ba'ad kan vu̵, ma ku̵u̵ lı̵́d zu̵u̵ ya̧g woolı̵́ yȩlȩ́. Dooká voo vu̵ də́ń dooká nánán voo vu̵ yu̵.

²³Hȩn kɔ́lı̵́ ı̵́ yo̧go̧ yȩ, nán vu̵ ho̧ vu̵ kɔ́ ı̵́ moo gaalı̵́ gbo̧o̧ wɔgɔ. Vu̵ dɨ Tayɨɨ na"ȩ́ kan hi̧naa aga ku̵u̵ mbɔ́g máa; vu̵ nə' yúú voo vu̵, vu̵ pı̵́ı̵́ fó̧ó̧ voo. A̧máa hȩn kɔ́lı̵́ voo vu̵, hȩn gbo̧o̧ tóó nɔ pɛ́lı̵́ á̧ḿ, séý hȩn ka to̧o̧d zó̧ó̧ ɓı̵́d voo má nɔ.