Read Dii NÁN KOLOSÍI VɄ 3 Bible Online

NÁN KOLOSÍI VɄ 3 - Dii bible

NÁN KOLOSÍI VɄ 3

¹Tayɨɨ ka su̵g nim ví sı̵́ nɔmmé kan Krístu á̧ḿmɔ́ yȩ, i soo sı̵́ víí hȩn ı̵́ be"ı̵́ má nɔ. Krístu waa gbaŋ dɨ nag nán Tayɨɨ woolı̵́ wu̵lı̵́.

²I 'yɛ́ zó̧ó̧ víí yúú hȩn ı̵́ be"ı̵́ vu̵lı̵́ dágá; i 'yɛ́ vu̵ yúú hȩn ı̵́ hágá yɛ vu̵lı̵́ sá,

³moo ká ví nɔɔ sú̵'ú̵. Vágád víí kan Krístu máa, yú̵g dɨ Tayɨɨ woolı̵́.

⁴Krístu 'yɛ́d ví vágád káákáá sú̵'ú̵. Sey Krístu a gbɔ vúd ya tée, víń sú̵g mbaa kannɔ kan na"ȩ́ woo á̧ḿ.

⁵Moo woo nɔ, i si̧' hȩn kɔ́lı̵́ ı̵́ hágá yɛlı̵́ máa vu̵ gbɔ la ú̵! Wu̵ ɓáa kɔ́lı̵́, kan hȩn sí̧i̧d kɔ́lı̵́, kan hȩn hí̧í̧lí̧ fó̧ó̧ woo kɔ́lı̵́, kan hí̧í̧lí̧ hȩn ɓı̵́d kɔ́lı̵́, kan zó̧ó̧ sú̵lı̵́ hȩn daga voo vu̵lı̵́, moo zó̧ó̧ sú̵lı̵́ máa, man kan tayɨɨ mbɔ́ggı̵́ vu̵ duulíi.

⁶Tayɨɨ kɔ́d nán ki tɔ́g sá vu̵ zó̧ó̧ yȩ́ȩ́ moo hȩn yȩ voo nɔ.

⁷Ká ví mbaa ı̵́ yo̧go̧, ká ví baa kɔ́ hȩn yȩ vu̵ ı̵́ yo̧go̧ á̧ḿ.

⁸A̧máa 'ya̧'a̧ yɛ i gbɔ hȩn yȩ vu̵ 'waa la pád! I gbɔ zó̧ó̧ yȩ́ȩ́ kɔ́lı̵́, kan zó̧ó̧ vi̧i̧ní, kan lı̵́nné á̧ḿ. Ya̧g vȩ́'ȩd, kan moo sȩ́ḿ tóó a vúd ya̧g víílí sá.

⁹I gəd da ví vu̵ moo sá á̧ḿ, moo ví gbɔ mbaalı̵́ see víí kan hȩn kɔ́lı̵́ woo vu̵ á̧ḿ sú̵'ú̵.

¹⁰Ví tii nánán 'maŋ vu̵ sú̵'ú̵. Sey 'waapád nánán 'maŋ yȩ tii mbaa kɔ́ ı̵́ fóto ı̵́ ka yɨbbu̵ pee wɔgɔ, moo há̧á̧ a gaa Tayɨɨ 'waa á̧ḿ.

¹¹Wu̵lı̵́ máa, vu̵ səgən nán vu̵ né, ı̵́ yɛ nán Yúúdaɨ pɛ́lı̵́, ı̵́ yȩ ba nán Yúúdaɨ máa pɛ́lı̵́, ı̵́ yɛ wu̵ dɔ́ do̧ŋ, ı̵́ yɛ zagaɨ, ı̵́ yɛ wu̵ gaa hȩn, ı̵́ yɛ gaan woo né, ı̵́ yɛ gba'aɨ, ı̵́ yɛ waaɨ máa pɛ́lı̵́, a̧máa Krístu wu̵ hȩn 'waapád, dɔ́ dɨ zó̧ó̧ nán voolı̵́ 'waapád á̧ḿ.

¹²Tayɨɨ wu̵ yee ví moo i mbaa nán bii nu, hí̧í̧ ví ú. Moo woo nɔ, i kɔ́ zó̧ó̧ nán, kan zó̧ó̧ to̧o̧. I na' yúú sá, i ka̧' zó̧ó̧, i ma' zó̧ó̧.

¹³I ká̧'á̧n zó̧ó̧ ya víílí ú. Moo ka kɔ́y sa̧a̧m víílí tée, i 'yɛ́ń moo woo zó̧ó̧lȩ́ sá. I kéé moo woo vu̵ gbɔ la kɔ́ ı̵́ ı̵́ 'yɛ́lı̵́ baa ví ka kéé ı̵́ víí gbɔ máa wɔgɔ.

¹⁴A̧máa hȩn ka mba hȩn yȩ vu̵ 'waapád máa, wu̵ hí̧nní. Hí̧nní wu̵ kɔ́, ma víń sú̵g mbaa kɔ́ ı̵́ Tayɨɨ ka hí̧í̧ wɔgɔ.

¹⁵Zó̧ó̧ ká̧'a̧d Krístu woo a hi̧' zó̧ó̧ víílí. Tayɨɨ bee ví yúú zó̧ó̧ ká̧'a̧d yȩlȩ́, su̵g ví fó̧ó̧ dágá. I dȩnnɔ nag á̧ḿ.

¹⁶Moo Krístu woo 'waapád a hi̧' zó̧ó̧ víílí; i tú'ún moo, nóo a gagad daga, a gagad daga moo kan moo gaalı̵́. I bee yéé Tayɨɨ na"ȩ́ kə́dkə́d, ı̵́ yigid woo ka tú'ud ví má nɔ. I na' Tayɨɨ kan yéé nag dȩné zó̧ó̧ víílí.

¹⁷Hȩn kíí dɨ kɔ́lı̵́ 'waapád, kóó moo moolȩ́, kóó ba'ad woo ȩná, i kɔ́gɔ kan yɛ́g ı̵́ 'yɛ́lı̵́ baa ví Yesu woo nɔ. I baa dȩn Ba'á Tayɨɨ nag kan yɛ́g woo á̧ḿ.

¹⁸Wakȩ́ȩ́ vu̵, i kid wə̧ə̧ víí vu̵ tɔ́g kɔ́ ı̵́ ka maa kɔ́lı̵́ tíŋ́ ı̵́ 'yɛ́lı̵́ baa ví woolı̵́ máa wɔgɔ.

¹⁹Ɨ́ víí wayée vu̵, i hí̧í̧ kȩ́ȩ́ víí vu̵ ú̵. I kɔ́d vu̵ zó̧ó̧ ɓı̵́d sá á̧ḿ.

²⁰Waa vu̵, i kid ı̵́ ha̧a̧lȩ́ víí vu̵ tɔ́g yúú hȩn 'waapáddı̵́. Hȩn ka to̧o̧d ı̵́ 'yɛ́lı̵́ baa ví máa wu̵ yɛ nɔ.

²¹Waa ba'a vu̵, i vi̧i̧ waa víí vu̵ zó̧ó̧ sá, nag kan ka̧' vu̵ ú̵.

²²Gba'a vu̵, i kid ı̵́ buulí víí hágá yɛlı̵́ yɛ vu̵ tɔ́g yúú hȩn 'waapáddı̵́. Tée i taa u̵u̵ tu̵ bi, ma bi kɔ́d vu̵ hȩn zó̧ó̧ ká̧'a̧d sá, a̧máa i kid vu̵ tɔ́g kan zó̧ó̧ víí 'waapád, moo kíí ndɔg ı̵́ 'yɛ́lı̵́ baa ví yȩ nɔ.

²³Kóó ba'ad woo ȩná, kíí dɨ kɔ́lı̵́ tée, i kɔ́ kan zó̧ó̧ víí 'waapád, kɔ́ ı̵́ kíí kɔ́d ı̵́ 'yɛ́lı̵́ máa wɔgɔ, a̧máa moo nánán voo nɔ pɛ́lı̵́.

²⁴Ví gaa hȩn sú̵ú̵lı̵́ víí wú̵ń yaa dɨ ı̵́ 'yɛ́lı̵́ woolı̵́, wú̵ń dɔd ví gbaŋ waalı̵́ woolı̵́. Ɨ́ buulí víí wu̵ Krístu; i kɔ́d wu̵ yu̵ ba'ad dágá.

²⁵Kóó nɔ́nná a kɔ́ hȩn ɓı̵́d tée, Tayɨɨ wú̵ń vȩ' hȩn ɓı̵́d woo sú̵u̵n wu̵ wu̵ yu̵, moo Tayɨɨ səgən nánán vu̵ né.