Read Dii NÁN KOLOSÍI VɄ 4 Bible Online

NÁN KOLOSÍI VɄ 4 - Dii bible

NÁN KOLOSÍI VɄ 4

¹Ɨ́ gba'a buulí vu̵, i kɔ́d gba'a víí vu̵ hȩn du̵u̵ kɔ́ ı̵́ Tayɨɨ ka hí̧í̧ wɔgɔ. Tée i gaa ı̵́ buulí bii ba dɨ be"ı̵́ á̧ḿ.

²I o̧d Tayɨɨ moo nəə sá, i nə sá á̧ḿ, i dȩnnɔ naggɨ.

³Sey dágá yȩlȩ́, i ɓá"u̵ moo vóó á̧ḿ, moo Tayɨɨ a pú̵ vɔ́ hi̧naa du̵u̵ oo tú' moo woo, oo tú' hȩn ka yú̵g yúú Krístu woolı̵́ yȩ á̧ḿ. Vu̵ dɔn púúsinalȩ́ yɛlı̵́ yúú moo yȩlȩ́.

⁴I ɓá"u̵ moo a̧n moo moo yúú woolı̵́ dȩ"ȩ́ na'a kɔ́ ı̵́ ka hí̧í̧ wɔgɔ á̧ḿ.

⁵I gaa mbaalı̵́ kan nán ı̵́ ku̵u̵ kirtȩ́n pɛ́lı̵́ máa vu̵ ú̵. I soo hi̧naa du̵u̵ vu̵ yu̵.

⁶Moo to̧o̧ a wu̵ vúd də́ń ya̧g víílí kɔ́ ı̵́ Tayɨɨ ka hí̧í̧ wɔgɔ. I hí̧i̧d kóó nɔ́nná moo ka maa o̧lȩ́ má nɔ.

⁷Da ba ví kirtȩ́n Tisíg, nán ba'ad ı̵́ 'yɛ́lı̵́ woo yȩ́ńná, káń hí̧í̧wo̧ na'a yɛ, vɔ́ sú̵g kɔ́d ı̵́ 'yɛ́lı̵́ ba'ad, ma wú̵ńnɔ pá'ad ví moo míí vu̵ 'waapád.

⁸Mí ba"u̵ la ı̵́ yo̧go̧ moo a la o̧d ví vɔ́n mbaa nɛ́nná, moo a zigid ví zó̧ó̧ wu̵lı̵́ á̧ḿ.

⁹Vu̵ sú̵g laa kan da ba ví kirtȩ́n yȩ́ń Onezím, káń hí̧í̧wo̧ máa á̧ḿ. Aga nán víí nu. Vú̵ń pá'ad ví hȩn ka ya̧a̧ yɛlı̵́ máa 'waapád.

¹⁰Aristáar, ka dɨ púúsinalȩ́ yɛlı̵́ á̧ḿ yɛ, vá' ví wu̵lı̵́. Márkus, Baanábas daa sá̧ŋ́ vá' ví wu̵lı̵́ á̧ḿ. (Ká mí o̧d ví moo yúú Márkus woolı̵́ sú̵'ú̵; a ya̧ la víílí tée, i fȩȩwo̧ du̵u̵ na'a má nɔ.)

¹¹Yesu ı̵́ ku̵u̵ beewu̵ Yústus yɛ, vá' ví wu̵lı̵́ á̧ḿ. Nán Yúúda ta̧a̧nɔ́ yȩ aga vu̵u̵ ka̧'a̧n zó̧ó̧ yúú ba'ad moo gbaŋ waalı̵́ Tayɨɨ woo yɛlı̵́, vu̵u̵ sȩn mí fó̧ó̧ á̧ḿ.

¹²Epafára, nán víí yɛ, vá' ví wu̵lı̵́ á̧ḿ. Nán ba'ad Yesu Krístu woo yɛ ɓá' Tayɨɨ gən yúú víílí ní, moo i dii néélȩ́ na'a kɔ́ ı̵́ ı̵́ nii vu̵ wɔgɔ, i 'yɛ́ zó̧ó̧ víí 'waapád yúú hȩn hí̧í̧lí̧ Tayɨɨ woo kɔ́lı̵́ 'waapáddı̵́.

¹³Mí ho̧ kan nɔ́ɔ́ míí á̧ḿ, Epafára kɔ́ ba'ad néélȩ́ na'a moo víí, kan moo nán ı̵́ kaa Lawdiséelı̵́ voo, kan nán kaa Hirapolíilí voo á̧ḿ.

¹⁴Dóbta vóó Lúg, kóó hí̧í̧wo̧ na'a yɛ, vu̵ kan Demás vu̵ vá' ví wu̵lı̵́ á̧ḿ.

¹⁵I vá' da ba ví kirtȩ́n ı̵́ kaa Lawdiséelı̵́ vu̵ wu̵lı̵́, kan Níḿfa á̧ḿ, kan nán sú̵ggı̵́ kíi woolı̵́ vu̵.

¹⁶Kíí záŋ́ga ɗerwəl yɛ 'waa tée, i ba' pú̵ nán sú̵ggı̵́ ı̵́ Lawdiséelı̵́ vu̵ á̧ḿ. Tée, u̵u̵ ba'ad ví ya ɗerwəl ı̵́ voo, ví záŋ́ga á̧ḿ.

¹⁷I duu o̧d Aasíb: “A̧m gág ba'ad ı̵́ 'yɛ́lı̵́ woo ka gbɔm nagá yȩ, a̧m kɔ́gɔ du̵u̵lı̵́ na'a ó̧.”

¹⁸Aga mí bíńda hȩn yɛ kan nag míí nu: Mí vá' ví ú. I záń mí sá, mí dɨ lig púúsinalȩ́ yɛlı̵́. Tayɨɨ a bag ví hȩnne.