Read Dii 1 NÁN TESALONÍI VɄ 1 Bible Online

1 NÁN TESALONÍI VɄ 1 - Dii bible

1 NÁN TESALONÍI VɄ 1

¹Mí Póllu̵, vɔ́ sú̵g kan Silád, kan Timɔtée á̧ḿ, vóo ba'ad nán sú̵ggı̵́ Ba'á Tayɨɨ woo kíí sú̵g kan yɛ́g ı̵́ 'yɛ́lı̵́ Yesu Krístu woo kaa Tesaloníilí̧ yȩ víw ɗerwəl yɛ nɔ. Tayɨɨ a kɔ́d ví zó̧ó̧ nán, a 'yɛ́ ví i mbaa ká̧'a̧dɨ.

²Vɔ́ baa dȩn Tayɨɨ nag bá' 'waapád yúú víílí 'waapád. Kóó dɨddu̵ moo o̧lȩ́ tée, vɔ́ baa pu̧u̧ ví wu̵lı̵́,

³yúú zó̧ó̧ 'yɛ́lı̵́ víí kan ba'ad woo, kan zó̧ó̧ nán víí kíí mbaa wu̵lı̵́ yȩ, kan zó̧ó̧ ma"ȩ́ víí kíí 'yɛ́ taalı̵́ víí yúú ı̵́ 'yɛ́lı̵́ baa ví Yesu Krístu woolı̵́ yȩlȩ́. Vɔ́ dɨ ví taalı̵́ ı̵́ yo̧go̧ tíŋ́ Tayɨɨ Ba' baa ví woolı̵́.

⁴Dan kirtȩ́n vu̵, vɔ́ gaa Tayɨɨ hí̧í̧ ví sú̵'ú̵, yee ví sú̵'ú̵ á̧ḿ,

⁵moo moo to̧o̧ 'maŋ kóó pa̧ŋ laan víílí yȩ, vɔ́ pa̧ga̧n mooɨ dágá né, a̧máa néélȩ́ Tayɨɨ woo du̵u̵lı̵́, kan yigid woo á̧ḿ, ma vɔ́ faan moo yȩ né á̧ḿ. Ví gaa mbaalı̵́ vóó sa̧a̧m víílí yúú moo víílí á̧ḿ.

⁶Ví duu hȩn kɔ́lı̵́ vóó, kan ı̵́ ı̵́ 'yɛ́lı̵́ baa ví woo á̧ḿ. Ví nuŋ hȩn ndɔ́gɔné ɓu̵u̵lı̵́ na'a, a̧máa ví fȩȩ sı̵́ víí moo Tayɨɨ woo kan zó̧ó̧ dȩ"ȩ́ ı̵́ yigid Tayɨɨ woo ka pú̵ ví yȩ ó̧.

⁷Ɨ́ víí, ví tú'ud nán zó̧ó̧ 'yɛ́lı̵́ ı̵́ hág Masedo̧wá̧nné vu̵ hȩn u̵u̵ kɔ́ duu máa ó̧. Ví tú'ud kan ı̵́ hág Akáyyı̵́ vu̵ á̧ḿ.

⁸Kíí fȩȩ moo Tayɨɨ woo yȩ, ví pa yɛ́g ı̵́ 'yɛ́lı̵́ woo hág Masedo̧wá̧nné, kan hág Akáyyı̵́ sú̵'ú̵ á̧ḿ. Hág tóó vu̵ ɓu̵u̵lı̵́ na'a á̧ḿ, vu̵ ki moo yúú zó̧ó̧ 'yɛ́lı̵́ víí Tayɨɨ woolı̵́ yȩ sú̵'ú̵. Moo woo nɔ duu maan sı̵́ moo tóó ha"ı̵́ yúú woolı̵́ né á̧ḿ.

⁹Nán vu̵ pa'a fȩȩlȩ́ máa kíí fȩȩ vɔ́, kíí gbóo tayɨɨ mbɔ́ggı̵́ víí vu̵, kíí tii ya Tayɨɨ ı̵́ zá̧a̧d woolı̵́, kíí kɔ́d Tayɨɨ yȩ́ń yɛ ba'ad,

¹⁰kíí laa Waa woo Yesu, Tayɨɨ ka nimmɔ nɔmmé yȩ, a fíí ya be"ı̵́ pȩ́ń yȩ nɔ. Yesu yȩ səd ba ví zó̧ó̧ yȩ́ȩ́ Tayɨɨ woo a dɨ yaalı̵́ yȩlȩ́ sú̵'ú̵.