Read Dii 1 NÁN TESALONÍI VɄ 2 Bible Online

1 NÁN TESALONÍI VɄ 2 - Dii bible

1 NÁN TESALONÍI VɄ 2

¹Dan kirtȩ́n vu̵, aga ví gaa á̧ḿ, laalı̵́ vóó kóo laa víílí yȩ, hȩn leeɨ pɛ́lı̵́.

²A̧máa ví gaa ká vu̵ dəŋ haa vɔ́, vɔ́ nuŋ hȩn ndɔ́gɔné kaa Filíbbí pȩ́ń, ma vɔ́ laa víílí. A̧máa Tayɨɨ zigid vɔ́ zó̧ó̧, moo oo pad ví moo to̧o̧ 'maŋ bii nu, kóó oo nuŋ hȩn ndɔ́gɔné wu̵lı̵́ ɓu̵u̵lı̵́ na'a ó̧ si̧'.

³Moo kóó pa yɛ, vbád wu̵lı̵́ pɛ́lı̵́, hȩn ví̧i̧g kɔ́lı̵́ tóó wu̵lı̵́ pɛ́lı̵́, vɔ́ sóon nánán vu̵ moo wu̵lı̵́ né á̧ḿ.

⁴A̧máa Tayɨɨ ka gu̵g vɔ́ ho̧ máa, gbɔd vɔ́ moo to̧o̧ 'maŋ nagá, ma vɔ́ tú' kɔ́ ı̵́ ka hí̧í̧ wɔgɔ. Vɔ́ soon kɛb bi to̧o̧n nánán vu̵ yu̵ né, a̧máa bi to̧o̧d Tayɨɨ, ı̵́ ka baa gu̵g zó̧ó̧ nánán voo yȩ nɔ.

⁵Ví gaa ba vɔ́n baa naan nánán tóó né. Tayɨɨ gaa ú̵, vɔ́ yu̵g moo tóó o̧n bi nugun sɨɨde wu̵lı̵́ né á̧ḿ.

⁶Vɔ́ soon na"ȩ́ nánán voolı̵́ né, kóó víílí, kóó nán tóó voolı̵́ á̧ḿ.

⁷Ka vɔ́ń o̧ i kid vɔ́ tɔ́g 'waapád, moo aga vɔ́ waa ba'ad Krístu woo vu̵ yu̵. A̧máa vɔ́ o̧n né, vɔ́ mbaa víílí kan zó̧ó̧ ká̧'a̧d kɔ́ ı̵́ waa na'a ka dɨ waa va̧a̧ pú̵lı̵́ máa wɔgɔ.

⁸Moo kóó hí̧í̧ ví na'a yȩ nɔ, vɔ́ hí̧í̧ bi pa̧n ví ya moo to̧o̧ 'maŋ Tayɨɨ woo nɔ dágá né, a̧máa vɔ́ hí̧í̧ bi pú̵ fó̧ó̧ vóó moo víí á̧ḿ. Vɔ́ hí̧í̧ ví na'a ı̵́ yo̧go̧.

⁹Dan kirtȩ́n vu̵, i taa ba'ad fó̧ó̧ ta̧a̧né vóó, kan hȩn fó̧ó̧ pı̵́ı̵́lı̵́ vóó yȩ vu̵ yu̵. Sey kóó dɨd ví moo to̧o̧ 'maŋ Tayɨɨ woo palı̵́ yȩ, vɔ́ kɔ́ ba'ad vid kan zá̧ga̧ á̧ḿ moo mbaalı̵́ vóó yɛ a zi̧i̧ ví sá.

¹⁰Ví gaa ú̵, Tayɨɨ gaa á̧ḿ; mbaalı̵́ vóó kan nán zó̧ó̧ 'yɛ́lı̵́ yɛ ví to̧o̧d Tayɨɨ, mbaa də́ń kɔ́ ı̵́ Tayɨɨ ka hí̧í̧ wɔgɔ. Nán tóó wú̵ń séen vɔ́ wu̵lı̵́ né á̧ḿ.

¹¹Ví gaa vɔ́ mbaa sa̧a̧m víílí kɔ́ ı̵́ waa ba'a ka mbaa kan waa vu̵ máa wɔgɔ.

¹²Vɔ́ baa gagad ví moo, vɔ́ zigid ví zó̧ó̧, vɔ́ o̧d ví moo néélȩ́ na'a i mbaa kɔ́ ı̵́ Tayɨɨ ka hí̧í̧ wɔgɔ. Wu̵ bee ví i dɔ́ gbaŋ waalı̵́ biilí, ya na"ȩ́ bii yȩlȩ́.

¹³Vɔ́ dȩn Tayɨɨ nag gən yúú hȩn ı̵́ tóó yȩlȩ́ né á̧ḿ. Sey kóo pa̧n ví la moo Tayɨɨ yȩ, ví ki, ví fȩȩ á̧ḿ. Ví fȩȩn kɔ́ ı̵́ moo nán voo vu̵ wɔgɔ né, a̧máa ví fȩȩwo̧ fȩȩlȩ́ moo Tayɨɨɨ yȩ́ńná kəd, ma Tayɨɨ baa kɔ́ ba'ad zó̧ó̧ víílí ı̵́ kíí 'yɛ́ zó̧ó̧ víí woolı̵́ yȩ nɔ.

¹⁴Dan kirtȩ́n vu̵, ví á̧ḿ, ví nuŋ hȩn kɔ́ ı̵́ nán sú̵ggı̵́ Tayɨɨ woo vu̵ hág Yúúdalı̵́ ku̵u̵ 'yɛ́ zó̧ó̧ voo Yesu Krístu woolı̵́ máa wɔgɔ á̧ḿ. Ví nuŋ hȩn ndɔ́gɔné nag waa hág víí voolı̵́ kɔ́ ı̵́ ku̵u̵ nuŋ hȩn ndɔ́gɔné nag daga nán Yúúda voolı̵́ máa wɔgɔ. Nán Yúúda vu̵ duun vu̵ kan moo ı̵́ yo̧go̧ á̧ḿ.

¹⁵Nán Yúúda yȩ vu̵u̵ nɔɔ ı̵́ 'yɛ́lı̵́ Yesu, kan anábi vu̵; vu̵u̵ duun vɔ́ kan moo á̧ḿ. Vu̵ to̧o̧n Tayɨɨ né, vu̵ tii mbaa nán maag nán voo 'waapád á̧ḿ.

¹⁶Moo vu̵ há' vɔ́ oo pad zig tóó vu̵ moo hȩn sənné yɛ sá. Vu̵ kɔ́ ı̵́ yo̧go̧ moo bi kɔ́ ba'ad ɓı̵́d nán Yúúda voo si̧' la gbug pȩ́ń. A̧máa sí̧'í̧d woo, zó̧ó̧ yȩ́ȩ́ Tayɨɨ woo yaa sı̵́ yúú voolı̵́ ú̵.

¹⁷Dan kirtȩ́n kaa hı̵́'ı̵́n ví bá' waaná' yɛ, ba hı̵́'ı̵́n ví dɨ nɔ́lȩ́, a̧máa zó̧ó̧lȩ́ pɛ́lı̵́. Vɔ́ dɨ ví taalı̵́ kan zó̧ó̧ vóó 'waapád, kíí ka̧a̧ vɔ́ na'a yɛ, báń duu hó̧ń ví nɔ́lȩ́ pȩ́ń.

¹⁸Ká vɔ́ hí̧í̧ bi vȩ́' laa víílí. Ɨ́ míí Pól, ká mí hí̧í̧ bi laa víílí há̧á̧ do' idú, a̧máa Seeɗán wu̵ há' vɔ́.

¹⁹Sey ı̵́ 'yɛ́lı̵́ baa ví Yesu a fíí ya tée, nóo wú̵ń mbaa hȩn zó̧ó̧ 'yɛ́lı̵́ vóó, kan hȩn zó̧ó̧ dȩ"ȩ́ vóó, kan hȩn yúú na"ȩ́ vóó tíŋ́ Yesu woolı̵́lá? Wu̵ víw náa? Séý víw,

²⁰moo víi hȩn nɔ́ɔ́ tunní vóó, kan hȩn zó̧ó̧ dȩ"ȩ́ vóó á̧ḿ.