Read Dii 1 NÁN TESALONÍI VɄ 3 Bible Online

1 NÁN TESALONÍI VɄ 3 - Dii bible

1 NÁN TESALONÍI VɄ 3

¹Moo woo nɔ, kíí ka̧a̧ vɔ́ na'a yɛ, vɔ́ mbɔ́g moo bi kéé mbaa Atɛ́nné vɔ́ mɛ́ń.

²Ma vɔ́ ba' da ba ví kirtȩ́n Timɔtée, kóó sú̵g kɔ́ ba'ad moo to̧o̧ 'maŋ Tayɨɨ woo á̧ḿ yúú Krístu woolı̵́ yɛ; vɔ́ ba"u̵ la víílí, moo a zigid ví zó̧ó̧ yúú zó̧ó̧ 'yɛ́lı̵́ víílí, a ka̧' ví zó̧ó̧ á̧ḿ,

³moo nán tóó a ndɔg moo máa ku̵u̵ dɨ ba ví dunní yɛ sá, moo ví gaa Tayɨɨ ba wu̵ hí̧í̧ aa nuŋ ví moo vu̵ ı̵́ yo̧go̧.

⁴Sey ká vɔ́ mbaa víílí máa, vɔ́ baa o̧d ví vú̵ń dɨ ba ví dunní kan mooɨ, ma hȩn woo kɔ́y kɔ́ ı̵́ kíí gaa wɔgɔ.

⁵Moo woo nɔ, zó̧ó̧ ka tó̧'o̧n máa, mí ba' Timɔtée, moo bi gaa zó̧ó̧ 'yɛ́lı̵́ víí mbaa dɨ nɛ́nná! Ká mí ndɔg ı̵́ hȩn zo"ı̵́ kan zo' ví, ba'ad vóó kan tii sı̵́ hȩn leeɨ á̧ḿ!

⁶A̧máa 'ya̧'a̧ yɛ Timɔtée ka vȩ́' ya víílí yȩ, pá'ad vɔ́ moo to̧o̧ yúú zó̧ó̧ 'yɛ́lı̵́ víílí, kan hí̧nní víí á̧ḿ, o̧ ba vín dɨ vɔ́ taalı̵́ bá' 'waapád, ba vín hí̧í̧ vɔ́ ho̧lȩ́ kɔ́ ı̵́ kóó hí̧í̧ bi ho̧ ví yȩ wɔgɔ.

⁷Moo woo nɔ dan kirtȩ́n vu̵, a hȩn zó̧ó̧ ví̧i̧ní kan hȩn ndɔ́gɔné kóó nuŋ na'a yɛ nɔ si̧', vɔ́ nuŋ zó̧ó̧ ká̧'a̧d yúú zó̧ó̧ 'yɛ́lı̵́ víí yȩlȩ́ sú̵'ú̵!

⁸Tow i nda doo yúú mbaalı̵́ víí kíí sú̵g mbaa wu̵lı̵́ kan ı̵́ 'yɛ́lı̵́ Yesu yȩlȩ́ tée, vɔ́ duu nuŋ zó̧ó̧ 'maŋ 'ya̧'a̧ yɛ sú̵'ú̵ á̧ḿ.

⁹Hȩn zó̧ó̧ dȩ"ȩ́ máa kíí kɔ́d vɔ́ tíŋ́ Tayɨɨ baa ví woolı̵́ yȩ, vɔ́ gaan moo tóó oo o̧n né; séý vɔ́ dȩn Tayɨɨ wu̵ nag dágá.

¹⁰Vɔ́ baa pinnɔ vid kan zá̧ga̧ á̧ḿ a gbɔd vɔ́ hi̧naa vɔ́ la ho̧ ví la nɔ́lȩ́, bi duu ha'ad ví moo gaalı̵́ tóó ka kéé yúú zó̧ó̧ 'yɛ́lı̵́ víílí máa á̧ḿ.

¹¹Aga Ba' baa ví Tayɨɨ, kan ı̵́ 'yɛ́lı̵́ baa ví Yesu u̵u̵ tú̵'u̵d vɔ́ hi̧naa vɔ́ la ho̧ ví ú!

¹²Ɨ́ 'yɛ́lı̵́ a kɔ́ i hí̧ń hí̧nní gbo̧o̧, i hí̧í̧ nán 'waapád kɔ́ ı̵́ kóó hí̧í̧ ví yɛ wɔgɔ.

¹³Tée víń nuŋ néélȩ́, nán tóó wú̵ń séen ví yúú hȩn ɓı̵́d tóólı̵́ né. Sey ı̵́ 'yɛ́lı̵́ baa ví Yesu a fíí ya kan nán woo vu̵ 'waapád tée, víń mbaa nán Ba' baa ví Tayɨɨ woo vu̵ á̧ḿ.