Read Dii 1 NÁN TESALONÍI VɄ 4 Bible Online

1 NÁN TESALONÍI VɄ 4 - Dii bible

1 NÁN TESALONÍI VɄ 4

¹Hȩn dágá máa, dan kirtȩ́n vu̵, ká vɔ́ tú'ud ví mbaalı̵́ ı̵́ a to̧o̧d Tayɨɨ máa sú̵'ú̵; mbaalı̵́ woo, ví mbaa wu̵ yu̵ á̧ḿ. A̧máa vɔ́ duu vi ví kan yɛ́g ı̵́ 'yɛ́lı̵́ baa ví Yesu Krístu woo nɔ, hȩn ı̵́ tóó ka maa kɔ́lı̵́ máa kéé dɨlı̵́ á̧ḿ.

²Ví gaa moo máa kóó tú'ud ví yúú ı̵́ 'yɛ́lı̵́ baa ví Yesu woolı̵́ yȩ sú̵'ú̵.

³Hȩn Tayɨɨ ka hí̧í̧ máa, wu̵ yɛ nɔ: I mbaa də́ń kɔ́ ı̵́ Tayɨɨ ka hí̧í̧ yȩ wɔgɔ; i kɔ́ ɓáa sá;

⁴kóó nɔ́nná a éé kȩ́ȩ́ dáń woo kɔ́ ı̵́ Tayɨɨ ka hí̧í̧ wɔgɔ, a to̧o̧d nánán vu̵ á̧ḿ;

⁵i kɔ́ hȩn hí̧í̧lí̧ fó̧ó̧ woo kɔ́ ı̵́ nán gaa Tayɨɨ sá ku̵u̵ kɔ́ máa wɔgɔ sá.

⁶Yúú hȩn yȩlȩ́ máa, nán tóó a kɔ́d daga hȩn ɓı̵́d, a kɨɨ kȩ́ȩ́ sá̧á̧lȩ́ daga woo sá, moo ı̵́ 'yɛ́lı̵́ wú̵ń si̧'i̧d nán ı̵́ ku̵u̵ kɔ́ hȩn ı̵́ yo̧go̧ máa vu̵ kɔ́ ı̵́ ba vɔ́n o̧d ví tíŋ́ yȩ wɔgɔ.

⁷Tayɨɨ been ba ví moo hȩn sȩ́ḿ kɔ́lı̵́ɨ né, a̧máa moo aa mbaa ví kɔ́ ı̵́ ka hí̧í̧ yȩ wɔgɔ.

⁸Moo woo nɔ, nán a duun moo tú"í yɛ né tée, man nánánne né, a̧máa ma Tayɨɨ ı̵́ ka pú̵ ví yigid woo yȩ nɔ.

⁹Moo hí̧nní kan da ba ví kirtȩ́n vu̵ máa, maa ba vɔ́n duu bíńda ví sı̵́ moo woo né, moo aga Tayɨɨ tú'ud ví sı̵́ hȩn yúú hí̧nní sú̵u̵lı̵́ ú̵,

¹⁰moo ví dɨd da ba ví kirtȩ́n ı̵́ hág Masedo̧wá̧nné vu̵ kɔ́lı̵́ ı̵́ yo̧go̧ 'waapád. A̧máa vɔ́ duu gagad ví, i laan kan ba'ad yɛ kɔ́lı̵́ woo za̧a̧ná.

¹¹I sȩn fó̧ó̧, ví mbaa kan zó̧ó̧ ká̧'a̧d, ví kɔ́ ba'ad dáń víí, moo ví nuŋ hȩn lálı̵́ víí wu̵lı̵́ kɔ́ ı̵́ kóo o̧d ví tíŋ́ máa wɔgɔ.

¹²Tée víń mbaa du̵u̵lı̵́ na'a kan nán ı̵́ ku̵u̵ kirtȩ́n pɛ́lı̵́ máa vu̵ á̧ḿ, víń duu vin vu̵ hȩn nagá né.

¹³Dan kirtȩ́n vu̵, vɔ́ hí̧í̧ i gaa hȩn yúú nán ı̵́ ku̵u̵ nɔɔ yȩ voolı̵́, moo zó̧ó̧ a ví̧i̧ ví kɔ́ ı̵́ nán tóó ku̵u̵ kan hȩn zó̧ó̧ 'yɛ́lı̵́ pɛ́lı̵́ máa vu̵ wɔgɔ sá.

¹⁴Ba 'yɛ́ ví zó̧ó̧ Yesu ba nɔɔ, ba níḿ nɔmmé sú̵'ú̵. Nán ı̵́ ku̵u̵ 'yɛ́ zó̧ó̧ voo Yesu woolı̵́, ku̵u̵ nɔɔ yȩ, Tayɨɨ wú̵ń nim vu̵ á̧ḿ, vú̵ń sú̵g níḿ kan Yesu á̧ḿ.

¹⁵Vɔ́ dɨd ví o̧lȩ́ kɔ́ ı̵́ ı̵́ 'yɛ́lı̵́ ka o̧ wɔgɔ; ı̵́ 'yɛ́lı̵́ a yaa tée, ı̵́ baa ví kaa nɔɔn ví lá né yɛ, báńnɔ dəŋ lúún ví kannɔ tíŋ́ ma, ı̵́ ku̵u̵ nɔɔ máa vú̵ń níḿ duun ba ví ní.

¹⁶A̧máa nán vú̵ń ki yɛ́g tóó wú̵ń pa moo, yɛ́g ı̵́ nii maleeka woo voo nɔ, kan ga̧' naa Tayɨɨ woo á̧ḿ; ma ı̵́ 'yɛ́lı̵́ aga wú̵ńnɔ lúú zu̵u̵ be"ı̵́ pi. Nán ı̵́ ku̵u̵ 'yɛ́ zó̧ó̧ voo Krístu woolı̵́, ku̵u̵ nɔɔ máa, vú̵ńnɔ dəŋ níḿ nɔmmé.

¹⁷Pig woolı̵́ tée, ı̵́ kaa nɔɔn ví lá né yɛ, vú̵ń sad ba ví dɔgɔn, báń sú̵g ví mam hi̧i̧gí á̧ḿ, moo kanné kan ı̵́ 'yɛ́lı̵́ be"ı̵́, tée báń mbaa ví kannɔ há̧á̧ káákáá á̧ḿ.

¹⁸Tée i ka̧' da ba ví vu̵ zó̧ó̧ kan moo yɛ ú̵.