Read Dii 1 NÁN TESALONÍI VɄ 5 Bible Online

1 NÁN TESALONÍI VɄ 5 - Dii bible

1 NÁN TESALONÍI VɄ 5

¹Dan kirtȩ́n vu̵, moo zá̧ga̧ yaalı̵́ ı̵́ 'yɛ́lı̵́ woo, tóó tée, wú̵ń ya̧ ya zag ndɛnná má nɔ tée, maa ba vɔ́n duu bíńda o̧n ví woo né,

²moo aga ví gaa ban yaa kɔ́ ı̵́ líw ka yaa viddí máa wɔgɔ, ba gaan ví sey woo tíŋ́ né.

³Sey nán u̵u̵ baa o̧: “Mbaalı̵́ ká̧'a̧d wu̵ yɛ nɔ! Hȩn zó̧ó̧ tó̧"ȩ́ vu̵ sı̵́ pɛ́lı̵́!” tée, hȩn tunní wú̵ń ya̧ voolı̵́ há̧ná kɔ́ ı̵́ zá̧ga̧ ha̧g ndɔ́gɔné ka ya̧ wakȩ́ȩ́ ha̧g silí woolı̵́ máa wɔgɔ. Vú̵ń sə́n né á̧ḿ.

⁴A̧máa dan kirtȩ́n vu̵, ı̵́ víí máa, ví nán vid pɛ́lı̵́. Zá̧ga̧ woo wú̵ń ya̧n víílí kɔ́ ı̵́ líw wɔgɔ né,

⁵moo ya víí 'waapád ví waa túlí[1] woo vu̵ yu̵. Ví waa zá̧ga̧ woo vu̵ yu̵. Ba ví waa vid woo vu̵ yu̵ pɛ́lı̵́, kóó waa dim woo vu̵.

⁶Tée ba nə ví kɔ́ ı̵́ nán tóó vu̵ wɔgɔ sá! A̧máa ba mbaa ví nɔ́ɔ́ to̧o̧ȩ; ba gág ví ú!

⁷Nán vu̵ baa nə nəm viddí. Nán doo kíílí vu̵ baa kíí doo viddí á̧ḿ.

⁸A̧máa ba ví baa waa zá̧ga̧ woo vu̵ yu̵. Tée ba gág ví ú! Zó̧ó̧ 'yɛ́lı̵́ kan hí̧nní u̵u̵ mbaad ba ví kɔ́ ı̵́ sa̧a̧m hɨɨ wɔgɔ. Moo zó̧ó̧ 'yɛ́lı̵́ a sə́d ví ú tée, a mbaad ba ví kɔ́ ı̵́ fȩmee hɨɨ wɔgɔ,

⁹moo Tayɨɨ yee ba ví moo bi kɔ́n ba ví zó̧ó̧ yȩ́ȩ́ȩ né, a̧máa yee ba ví moo aa nuŋ ví sə́nné yúú ı̵́ 'yɛ́lı̵́ baa ví Yesu Krístu woolı̵́.

¹⁰Wu̵ nɔɔ moo baa ví, moo zá̧ga̧ yaalı̵́ woolı̵́ tée, aa sú̵g mbaa ví á̧ḿ, kóó aa mbaa ví zá̧a̧d, kóó aa nɔɔ ví ú si̧'.

¹¹Moo woo nɔ, i zígín zó̧ó̧ ya víílí, i kid Yesu tɔ́g laa tíŋ́ tíŋ́ kɔ́ ı̵́ kíí baa kɔ́ yȩ wɔgɔ á̧ḿ.

¹²Dan kirtȩ́n vu̵, vɔ́ o̧d ví moo yúú nán ku̵u̵ kɔ́ ba'ad ı̵́ 'yɛ́lı̵́ woo víílí sa̧a̧mé, ku̵u̵ diid ví tíŋ́, ku̵u̵ tú'ud ví moo ı̵́ 'yɛ́lı̵́ woo máa; i kid vu̵ tɔ́ggú̵.

¹³I na' vu̵, i hí̧í̧ vu̵ mba, moo ba'ad voo yȩ nɔ. I tó̧ń ya víílí ú.

¹⁴Vɔ́ o̧d ví á̧ḿ, dan kirtȩ́n vu̵, i gagad nán zu̵b vu̵ ú̵; i zigid nán dú̵ú̵ vu̵ zó̧ó̧; i maa nán ku̵u̵ née né máa vu̵ ú̵; i ma' zó̧ó̧ yúú nán voolı̵́ 'waapád.

¹⁵I gág hȩn ɓı̵́d sú̵ú̵lı̵́ kan hȩn ɓı̵́ddɨ, a̧máa zá̧ga̧ 'waapád i soo hȩn du̵u̵ wu̵ kɔ́lı̵́ sa̧a̧m víílí kan yúú nán tóó voolı̵́ á̧ḿ.

¹⁶I mbaa kan zó̧ó̧ dȩ"ȩ́ sey 'waapád.

¹⁷I o̧d Tayɨɨ moo nəə sá.

¹⁸I dȩn Tayɨɨ nag yúú hȩn 'waapáddı̵́. Hȩn Tayɨɨ ka hí̧í̧ i kɔ́ yúú Yesu Krístu woolı̵́ máa wu̵ yȩ nɔ.

¹⁹I há' yigid Tayɨɨ woo ba'ad kɔ́lı̵́ sá.

²⁰I ho̧ moo anábi voo kɔ́ ı̵́ hȩn lee wɔgɔ sá.

²¹A̧máa i gu̵g hȩn vu̵ ho̧ 'waapád; i tu̵ hȩn ı̵́ ka du̵u̵ má nɔ.

²²I gág hȩn ɓı̵́d 'waapád kɔ́lı̵́ɨ.

²³Tayɨɨ, ı̵́ zó̧ó̧ ká̧'a̧d pú̵lı̵́ a mbɔ́g ví i kɔ́ də́ń hȩn ka hí̧í̧ má nɔ. A tu̵ hȩn víílí fó̧lȩ́ 'waapád, a tu̵ diga yigid víí, kan vágád víí, kan fó̧ó̧ víí á̧ḿ. Hȩn ví̧i̧g tóó a dɔ́ voolı̵́ sá, moo zá̧ga̧ yaalı̵́ ı̵́ 'yɛ́lı̵́ baa ví Yesu Krístu woo nɔ.

²⁴Ɨ́ ka bee ví yȩ ta ya̧g buun woo né. Aga wú̵ńnɔ kɔ́ hȩn woo.

²⁵Dan kirtȩ́n vu̵, i ɓá' Tayɨɨ yúú vóólı̵́ á̧ḿ.

²⁶I vá' nán kirtȩ́n vu̵ 'waapád kɔ́ ı̵́ dag sá̧ŋ́ vu̵ wɔgɔ; i ka pí̧í̧n ya zó̧ó̧lȩ́.

²⁷Mí dȩn ví nag kan yɛ́g ı̵́ 'yɛ́lı̵́ woo nɔ, tée i záŋ́ga ɗerwəl yɛ o̧d da ba ví kirtȩ́n tóó vu̵ 'waapád.

²⁸Zó̧ó̧ nán ı̵́ 'yɛ́lı̵́ baa ví Yesu Krístu woo a mbaa kan ví ú.