Read Dii 2 NÁN TESALONÍI VɄ 1 Bible Online

2 NÁN TESALONÍI VɄ 1 - Dii bible

2 NÁN TESALONÍI VɄ 1

¹Mí Póllu̵, vɔ́ sú̵g kan Silád, kan Timɔtée á̧ḿ, vóo ba'ad nán sú̵ggı̵́ Ba' baa ví Tayɨɨ woo kíí sú̵g kan yɛ́g ı̵́ 'yɛ́lı̵́ Yesu Krístu woo kaa Tesaloníilí̧ yȩ víw ɗerwəl yɛ nɔ.

²Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

³Dan kirtȩ́n vu̵, séý vɔ́ń dȩn Tayɨɨ nag gən yúú víílí ní. Vɔ́ dȩnnɔ yagalı̵́, moo zó̧ó̧ 'yɛ́lı̵́ víí Tayɨɨ woolı̵́ dɨ laalı̵́ tíŋ́ tíŋ́, kan hí̧nní víí yȩ á̧ḿ, dɨ há'aynée.

⁴Moo woo nɔ ma, vɔ́ na' yúú vóó yúú víílí sa̧a̧m nán sú̵ggı̵́ Tayɨɨ woo voolı̵́. Kóó u̵u̵ duun ví kan moo, kóó i nuŋ hȩn ndɔ́gɔné ɓu̵u̵lı̵́ na'a si̧', kíí nda doo, kíí gbɔn zó̧ó̧ 'yɛ́lı̵́ né yȩ nɔ.

⁵Hȩn yȩ tú' moo sə̧"ȩ́ yȩ́ń Tayɨɨ woo ba dɨlı̵́. Kíí nuŋ hȩn ndɔ́gɔné moo gbaŋ waalı̵́ Tayɨɨ woo yȩ, maa ví dɔ́lı̵́ woolı̵́ ú̵.

⁶Tayɨɨ wú̵ń sə̧' moo yȩ́ń woo tóó á̧ḿ, moo nán ku̵u̵ kɔ́d ví hȩn píím yȩ, wú̵ń tii hȩn ndɔ́gɔné víí kɔ́d vu̵.

⁷A̧máa ı̵́ víí máa, wú̵ń nəə ví daa hȩn píím yȩlȩ́ kan vɔ́ á̧ḿ, sey ı̵́ 'yɛ́lı̵́ baa ví Yesu a vúd fíí ya kan maleeka gbo̧o̧ woo vu̵ be"ı̵́ tɛ́ nɔ.

⁸Wú̵ń yaa kan vee gbo̧o̧ ba'a, wú̵ń si̧'i̧d nán ku̵u̵ gaan Tayɨɨ né máa vu̵, kan nán ku̵u̵ sɛ́n moo to̧o̧ 'maŋ ı̵́ 'yɛ́lı̵́ baa ví Yesu woo né máa vu̵ á̧ḿ.

⁹Tayɨɨ wú̵ń si̧'i̧d vu̵ si̧'i̧ní ı̵́ káákááɨ. Vú̵ń lúú laa sı̵́ voo kəd nɔ́ɔ́ ı̵́ 'yɛ́lı̵́ woolı̵́, kan néélȩ́ na"ȩ́ woo yȩlȩ́ á̧ḿ.

¹⁰Sey a fíí ya tée, nán woo vú̵ń na"o̧; nán zó̧ó̧ 'yɛ́lı̵́ vu̵ 'waapád vú̵ń dəmmɔ ó̧. Víń dɔ́ woolı̵́ á̧ḿ, moo kíí 'yɛ́ zó̧ó̧ víí yúú moo kóó tú'ud ví yȩ woolı̵́ ú̵.

¹¹Moo woo nɔ ma, vɔ́ o̧d Tayɨɨ baa ví moo gən yúú víílí ní. Vɔ́ vigi a mbɔ́g ví, moo i mbaa mbaalı̵́ ı̵́ ka bee ví wu̵lı̵́ yȩ nɔ. Vɔ́ ká̧nnɔ a kɔ́ kan néélȩ́ woo, hí̧í̧lí̧ hȩn du̵u̵ kɔ́lı̵́ víí a kɔ́y, zó̧ó̧ 'yɛ́lı̵́ víí a kɔ́ ba'ad kɔ́ ı̵́ kíí hí̧í̧ yȩ wɔgɔ.

¹²Tée nán vú̵ń na' yɛ́g ı̵́ 'yɛ́lı̵́ baa ví Yesu woo moo víílí, tée wú̵ń na' ví wu̵lı̵́ á̧ḿ. Hȩn yȩ vú̵ń kɔ́y, moo víń nuŋ zó̧ó̧ nán Tayɨɨ baa ví woo, kan ı̵́ 'yɛ́lı̵́ Yesu Krístu woo á̧ḿ.