Read Dii 2 NÁN TESALONÍI VɄ 3 Bible Online

2 NÁN TESALONÍI VɄ 3 - Dii bible

2 NÁN TESALONÍI VɄ 3

¹I ɓá' Tayɨɨ yúú vóólı̵́ á̧ḿ, dan kirtȩ́n vu̵, moo moo Tayɨɨ a kiy laa tíŋ́ tíŋ́, nán u̵u̵ na"o̧ kɔ́ ı̵́ víílí yȩ wɔgɔ á̧ḿ.

²I ɓá' Tayɨɨ a səd vɔ́ nán ɓı̵́d yȩ voolı̵́, kan nán disa̧n yȩ voolı̵́ á̧ḿ, moo nán 'waapád vu̵u̵ 'yɛ́n zó̧ó̧ voo Tayɨɨ woolı̵́ né.

³A̧máa ı̵́ 'yɛ́lı̵́ ka ta ya̧g tée, duu buun woo né. Wú̵ń zigid ví zó̧ó̧, wú̵ń səd ví nag Seeɗán woolı̵́ á̧ḿ.

⁴Ɨ́ 'yɛ́lı̵́ zigid vɔ́ zó̧ó̧ yúú víílí á̧ḿ sú̵'ú̵, moo vɔ́ gaa hȩn kóó tú'ud ví yȩ, ba víń kɔ́ hȩn woo, ba víń kɔ́ laan tíŋ́ tíŋ́ á̧ḿ.

⁵Ɨ́ 'yɛ́lı̵́ a kɔ́ zó̧ó̧ víí u̵u̵ tii la, i hí̧í̧ Tayɨɨ laa tíŋ́, i ma' zó̧ó̧ kɔ́ ı̵́ Yesu ka tú'ud ví yȩ wɔgɔ á̧ḿ.

⁶Dan kirtȩ́n vu̵, vɔ́ o̧d ví kan yɛ́g ı̵́ 'yɛ́lı̵́ baa ví Yesu Krístu woo nɔ, i dii nán 'waapád ı̵́ ku̵u̵ kɔ́n ba'ad né, ku̵u̵ duun moo tú"í vóó yȩ né máa vu̵ ho̧ la zulí!

⁷Aga ví gaa hȩn i kɔ́, ma i mbaa mbaalı̵́ vóó máa á̧ḿ. Sey kóó mbaa víílí máa, vɔ́ kɔ́n zu̵b né.

⁸Vɔ́ lán hȩn nán tóó woo té' né; a̧máa vɔ́ kɔ́ ba'ad vid kan zá̧ga̧ á̧ḿ vɔ́ ta̧a̧, vɔ́ ndɔg moo ka vɔ́ń há'an nán tóó víílí sa̧a̧mé vu̵ hȩn ganée.

⁹Ka vɔ́ń lá ú̵! A̧máa vɔ́ lán né á̧ḿ, moo vɔ́ hí̧í̧ i 'yɛ́ nɔ́ɔ́ wu̵lı̵́, tée i kɔ́ duu wu̵lı̵́ á̧ḿ.

¹⁰Ma sey kóó mbaa víílí máa, vɔ́ o̧d ví: “Nán ka sɛ́n ba'ad kɔ́lı̵́ né tée, a lá hȩn sá á̧ḿ.”

¹¹Vɔ́ o̧ ı̵́ yo̧go̧, moo vɔ́ ki nán tóó vu̵ sa̧a̧m víílí vu̵n sɛ́n ba'ad kɔ́lı̵́ né; vu̵ kɔ́ voo séý ya̧g dɔnné yúú moo daga voolı̵́ɨ.

¹²A̧máa vɔ́ o̧d nán yȩ vu̵, vɔ́ duu o̧d vu̵ kan yɛ́g ı̵́ 'yɛ́lı̵́ baa ví Yesu Krístu woo nɔ, u̵u̵ mbaa dȩ"ȩ́ na'a, aga u̵u̵ kɔ́ ba'ad dáń voo tée, vú̵ń lá wu̵lı̵́.

¹³Dan kirtȩ́n vu̵, ı̵́ víí máa, i gbɔ hȩn du̵u̵ kɔ́lı̵́ sá.

¹⁴Tow nán tóó a kin tɔ́g yúú ɗerwəl vóó kóó ba'an ví yɛlı̵́ né tée, i səggu̵ 'yɛ́, i mbaa kannɔ sá á̧ḿ, moo sȩ́ḿ a kɔ́gɔ ú̵.

¹⁵A̧máa i kɔ́ddu̵ hȩn maag sá, a̧máa i gagadu̵ moo ka kirtȩ́nne má nɔ.

¹⁶Ɨ́ 'yɛ́lı̵́, ı̵́ ká̧'a̧d pú̵lı̵́ a bag ví hȩn kan nag woo bá' 'waapád yúú hȩn 'waapáddı̵́. A mbaa kan ví 'waapád.

¹⁷Mí Póllu̵. Aga míi bíńda hȩn vá"ı̵́ yɛ kan nag míí. Víń gaan kan hȩn bindigo míí yɛ vu̵ ɗerwəl míí vu̵lı̵́ 'waapád; míi bíńda ı̵́ yo̧go̧.

¹⁸Zó̧ó̧ nán ı̵́ 'yɛ́lı̵́ baa ví Yesu Krístu woo a mbaa kan ví 'waapád.