Read Dii 1 TIMƆTÉE 1 Bible Online

1 TIMƆTÉE 1 - Dii bible

1 TIMƆTÉE 1

¹Mí Póllu̵, waa ba'ad Yesu Krístu woo nɔ, moo Tayɨɨ ı̵́ sənné baa ví, kan Yesu Krístu kaa 'yɛ́ ví zó̧ó̧ woolı̵́ yɛ, vu̵u̵ hí̧í̧ bi 'yɛ́n ı̵́ yo̧go̧.

²Timɔtée, waa yȩ́ń míí káń ha̧a̧m kan zó̧ó̧ 'yɛ́lı̵́ yȩ, míi ba'am ɗerwəl yɛ. Ba'á Tayɨɨ, vu̵ kan Yesu Krístu ı̵́ 'yɛ́lı̵́ baa ví u̵u̵ kɔ́m zó̧ó̧ nán, u̵u̵ ho̧ gíḿ gaam, u̵u̵ 'yɛ́m a̧m mbaa ká̧'a̧dɨ.

³Mí duu ta'ad o̧m kɔ́ ı̵́ káń o̧m, ma káń lúú laa hág Masedo̧wá̧nné máa wɔgɔ. Mí 'yɛ́m kaa Ɛfɛ́ɛzlı̵́, moo a̧m o̧d nán vu̵ u̵u̵ tú' moo vbád wu̵lı̵́ sá.

⁴A̧m o̧d vu̵ u̵u̵ gbɔ moo pa'ané vbád vu̵, kan yéé aa yée voo vu̵ wá"ı̵́ ka 'wáan vaŋ né yȩ á̧ḿ. Hȩn woo vu̵ pú̵ séý moo fanné mɛ́ń; vu̵ kɔ́n ba'ad Tayɨɨ woo né, vu̵ pú̵n zó̧ó̧ 'yɛ́lı̵́ né á̧ḿ.

⁵Mí pa moo yɛ moo i hí̧í̧n yȩ́ńná, i yu̵g hȩn ɓı̵́d kɔ́lı̵́ víí vu̵ sá, i mbaa kan zó̧ó̧ 'yɛ́lı̵́ yȩ́ń á̧ḿ.

⁶Nán tóó vu̵ kɔ́n hȩn yȩ né, vu̵ bá̧a̧ la moo lee vu̵ móólȩ́ té'.

⁷Vu̵ taa ba bin nán moo Tayɨɨ tú"í gbo̧o̧ vu̵ yu̵, a̧máa vu̵ kin moo voo aga ku̵u̵ pan yȩ né, vu̵ gaan do̧do̧o̧ moo voo ku̵u̵ o̧n néélȩ́ na'a yȩ né á̧ḿ.

⁸Ba gaa ví nán u̵u̵ tú' dooká Tayɨɨ woo vu̵ kɔ́ ı̵́ Tayɨɨ ka hí̧í̧ máa wɔgɔ tée, dooká sú̵u̵ vu̵u̵ kɔ́ ba'ad du̵u̵.

⁹Ba gaa ví, vu̵ baa pú̵n dooká moo nán ku̵u̵ kɔ́ hȩn hí̧í̧lí̧ Tayɨɨ woo máa voo nɔ né, a̧máa moo nán ku̵u̵ duun dooká vu̵ né máa voo nɔ, kan nán ki tɔ́g sá vu̵, kan nán ku̵u̵ duun Tayɨɨ né máa vu̵, kan nán hȩn ɓı̵́d kɔ́lı̵́ vu̵, kan nán ku̵u̵ ɓéé Tayɨɨ kan hȩn woo máa vu̵ á̧ḿ, kan nán ku̵u̵ nɔɔ ba' voo vu̵, tóó tée na' voo vu̵, kan nán nɔm nɔɔné tóó vu̵ á̧ḿ máa voo nɔ,

¹⁰kan moo nán ɓáa kɔ́lı̵́ voo, kan wayée ku̵u̵ ud kan daga vu̵, kan nán ku̵u̵ gí daga vu̵, kan nán vbád kɔ́lı̵́ vu̵, kan nán ku̵u̵ sa̧a̧ hȩn vbádná máa vu̵, kan hȩn kɔ́lı̵́ tóó ku̵u̵ duun moo tú"í yȩ́ń yȩ né máa vu̵ á̧ḿ.

¹¹Moo to̧o̧ 'maŋ yúú na"ȩ́ Tayɨɨ woolı̵́, Tayɨɨ ka gbɔnnɔ nagá yɛ, wu̵ tú' ı̵́ yo̧go̧. Tayɨɨ mbaa woo kan zó̧ó̧ dȩ"ȩ́ȩ.

¹²Mí dȩn ı̵́ 'yɛ́lı̵́ baa ví Yesu Krístu nag, wu̵ pú̵n néélȩ́, moo ká wu̵ ho̧n kɔ́ ı̵́ nán yȩ́ń wɔgɔ, ma ka 'yɛ́n ba'adı̵́ yɛ nɔ.

¹³Kóó ká a̧n haawu̵, a̧n duun nán woo vu̵ kan hȩn ɓı̵́d, a̧n ɓéé moo woo vu̵ ú̵ si̧', kɔ́n sı̵́ zó̧ó̧ nánnɔ́, moo ká mí 'yɛ́n ná zó̧ó̧ míí woolı̵́ né; mí kɔ́ hȩn yȩ vu̵, moo ká káń gaa né má nɔ.

¹⁴A̧máa zó̧ó̧ nán ı̵́ 'yɛ́lı̵́ baa ví woo wu̵ mba kɛb. Pú̵n zó̧ó̧ 'yɛ́lı̵́ ɓu̵u̵lı̵́ na'a, kan hí̧nní kaa hí̧ń ví yúú Yesu Krístu woolı̵́ yɛ nɔ.

¹⁵Moo yȩ́ń ka maa duulí, kaa fȩȩwo̧ ví máa wu̵ yɛ nɔ kəd: Yesu yaa hágá yɛlı̵́ moo bi səd nán hȩn ɓı̵́d kɔ́lı̵́ vu̵ yu̵. Míi kɔ́ hȩn ɓı̵́d sú̵u̵ mba nán tóó vu̵ 'waapád á̧ḿ.

¹⁶A̧máa moo woo nɔ Tayɨɨ ho̧ gíḿ gaan, moo Yesu Krístu a tú' zó̧ó̧ ma"ȩ́ woo yúú nán hȩn ɓı̵́d kɔ́lı̵́ yɛ míílí̧ 'waapád, moo nán u̵u̵ ho̧ gaa míílí̧, u̵u̵ 'yɛ́ zó̧ó̧ voo Yesu woolı̵́ moo u̵u̵ nuŋ vágád káákáá Tayɨɨ woolı̵́.

¹⁷A̧máa gbanii ı̵́ káákáá, ı̵́ ka nɔɔ né, ı̵́ nán ku̵u̵ ho̧nnɔ kan nɔ́ɔ́ né á̧ḿ máa wu̵ Tayɨɨɨ dágá. Ba na"o̧ ví, ba dəmmɔ ví há̧á̧ káákáá. Aamɛ́n.

¹⁸Waa míí Timɔtée, mí gbɔm moo yȩ vu̵ nagá kɔ́ ı̵́ anábi kú̵u̵ moo yúú móólȩ́ ɗiilí na'a máa wɔgɔ, moo a̧m sȩn fó̧ó̧ kɔ́ ba'ad Yesu woo du̵u̵lı̵́ na'a.

¹⁹Mɔ́ dɨ kan zó̧ó̧ 'yɛ́lı̵́, mɔ́ yu̵gu̵n hȩn ɓı̵́d tóó zó̧ó̧lȩ́ né á̧ḿ. Nán tóó vu̵ ma yɛ́g tóó ka o̧d vu̵ moo zó̧ó̧ voolı̵́ yȩ gbɔ, ma vu̵ tid zó̧ó̧ 'yɛ́lı̵́ voo gbɔ sú̵'ú̵.

²⁰Nán sú̵u̵ sa̧a̧m voolı̵́ máa, tóó wu̵ Himenée vu̵ kan Alegzá̧ŋndərə, káń gbɔ vu̵ Seeɗán woolı̵́ nagá, moo u̵u̵ kúgú, u̵u̵ moo moo ɓı̵́d yúú Tayɨɨ woolı̵́ sá yȩ nɔ.