Read Dii 1 TIMƆTÉE 2 Bible Online

1 TIMƆTÉE 2 - Dii bible

1 TIMƆTÉE 2

¹Hȩn káń hí̧í̧ bi dəŋ o̧d ví máa, i ɓá' Tayɨɨ hȩn; i o̧ddu̵ moo; i ká̧nnɔ hȩn; i dȩnnɔ nag yúú nán 'waapád voolı̵́.

²I dȩnnɔ nag moo gbanaa voolı̵́ kan nán gbo̧o̧ vu̵ 'waapád, moo ba mbaa ví pá̧á̧ du̵u̵lı̵́ na'a; ba duu ví də́ń Tayɨɨ kɔ́ ı̵́ ka hí̧í̧ máa wɔgɔ, ba kɔ́ ví hȩn tóó sá.

³Hȩn ka du̵u̵, ka to̧o̧d Tayɨɨ ı̵́ sənné baa ví máa wu̵ yɛ nɔ.

⁴Hí̧í̧ nán 'waapád u̵u̵ nuŋ sə́nné, u̵u̵ kúgú moo gaa yȩ́ńná,

⁵moo Tayɨɨ dɨ dágá, ı̵́ ka mbɔ́g moo sa̧a̧m nánán voolı̵́ kan Tayɨɨ máa dɨ dágá á̧ḿ, wu̵ Yesu Krístu wu̵. Wu̵ nánán á̧ḿ,

⁶wu̵ pú̵ fó̧ó̧ woo moo nán 'waapád u̵u̵ sə́ddú̵. Sey Tayɨɨ ka hí̧í̧ máa, ya tú' bin hí̧í̧ bi səd nán vu̵ 'waapád.

⁷Moo woo nɔ ma, Yesu 'yɛ́n waa ba'ad woo kan nán moo palı̵́ woo. Mí o̧ moo yȩ́ńne, vbáddɨ pɛ́lı̵́; Krístu 'yɛ́n moo a̧n tú'ud nán gaa Tayɨɨ sá vu̵ zó̧ó̧ 'yɛ́lı̵́ kan moo yȩ́ń yɛ nɔ.

⁸Moo woo nɔ, mí hí̧í̧ nánán u̵u̵ o̧d Tayɨɨ moo ya 'waapád, u̵u̵ ȩ́ȩ́ nag dɔg be"ı̵́ moo Tayɨɨ ɓá"ı̵́ kan zó̧ó̧ voo 'waapád, u̵u̵ kɔ́ zó̧ó̧ yȩ́ȩ́ sá, moo fá̧né a sá á̧ḿ.

⁹Mí hí̧í̧ wakȩ́ȩ́ ku̵u̵ mbɔ́g fó̧ó̧ tée, u̵u̵ dɔ́ sa̧a̧m ku̵u̵ maa dɔ́lı̵́ máa la ú̵; u̵u̵ kɔ́ hȩn sȩ́ḿ vu̵ sá; u̵u̵ mbaa du̵u̵lı̵́ na'a; u̵u̵ zaŋ yúú ka təən zané né má nɔ; u̵u̵ dɔd va̧ga̧ do̧' vu̵ sá, kóó zaŋ vəg gáálı̵́ vu̵, kan sa̧a̧m wílig vu̵;

¹⁰a̧máa wakȩ́ȩ́ ı̵́ ku̵u̵ o̧ ba bin duu Tayɨɨɨ yȩ, u̵u̵ kɔ́ voo ba'ad du̵u̵ɨ.

¹¹Wakȩ́ȩ́ ı̵́ ku̵u̵ kúgú moo Tayɨɨ woo máa, u̵u̵ ki tɔ́g, u̵u̵ mbaa simná.

¹²Mí gbɔn wakȩ́ȩ́ vu̵ hi̧naa moo tú"í ní, u̵u̵ diid wayée vu̵ ba'ad sá á̧ḿ. A̧máa u̵u̵ mbaa voo simná,

¹³moo Tayɨɨ dəŋ yɨb Adamú wu̵ tíŋ́, ma ya yɨb Hawwá pigim.

¹⁴A̧máa Seeɗán ká zo'on Adamú wu̵ tíŋ́ ní, a̧máa zo' Hawwá wu̵ tíŋ́. Wu̵ dəŋ ɓéé moo Tayɨɨ woo.

¹⁵A̧máa moo waa ha̧a̧lȩ́ wú̵ńnɔ səd wakȩ́ȩ́ vu̵, tow u̵u̵ 'yɛ́ zó̧ó̧ voo Tayɨɨ woolı̵́, u̵u̵ kɔ́ zó̧ó̧ nán, u̵u̵ kɔ́ hȩn hí̧í̧lí̧ Tayɨɨ woo, u̵u̵ mbaa kan zó̧ó̧ to̧o̧ ó̧ tɛ́ nɔ.