Read Dii 1 TIMƆTÉE 4 Bible Online

1 TIMƆTÉE 4 - Dii bible

1 TIMƆTÉE 4

¹A̧máa yigid Tayɨɨ woo o̧ la had, bá' sí̧'í̧d vu̵lı̵́ tée nán zó̧ó̧ 'yɛ́lı̵́ tóó ba vú̵ń kéé zó̧ó̧ 'yɛ́lı̵́ voo gbɔ, ba vú̵ń ȩ́ȩ́ tɔ́g yúú moo vbád tú"ílí, kan hȩn tú"í yigid ɓı̵́d voo vu̵,

²ba vú̵ń dɔd yúú voo ya hȩn tú"í nán zó̧ó̧ ví̧i̧g voolı̵́ kan nán vbád voolı̵́ á̧ḿ; ba vú̵ń gaa ba bin kɔ́ hȩn ɓı̵́ddɨ, a̧máa vú̵ń ká̧ŋ́ kɔ́lı̵́ɨ.

³Nán yȩ vu̵ o̧ kȩ́ȩ́ éélı̵́ ba du̵u̵ né, ba maa hȩn lálı̵́ tóó vu̵ kȩȩlȩ́ȩ á̧ḿ. A̧máa Tayɨɨ yɨb hȩn yȩ vu̵, moo nán zó̧ó̧ 'yɛ́lı̵́ ku̵u̵ gaa moo yȩ́ń Tayɨɨ woo máa, u̵u̵ dȩn Tayɨɨ nag wu̵lı̵́ tée, u̵u̵ lá.

⁴Hȩn Tayɨɨ ka yɨb 'waapád máa maa hȩn du̵u̵ mɛ́ń. Hȩn tóó maan kȩȩlȩ́ wu̵lı̵́ né, a̧máa nán ka dɨ lálı̵́ tée, a dȩn Tayɨɨ nag á̧ḿ,

⁵moo moo Tayɨɨ woo, kan moo kaa o̧d Tayɨɨ máa, tiiwu̵ sı̵́ hȩn du̵u̵ ú̵.

⁶A̧m tú'ud da ba ví kirtȩ́n vu̵ hȩn yȩ vu̵ tée, mɔ́ń mbaa nán ba'ad du̵u̵ Yesu Krístu woo, tée mɔ́ń tú' ba bin nuŋ hȩn lálı̵́ du̵u̵ yúú zó̧ó̧ 'yɛ́lı̵́lı̵́, kan moo yȩ́ń tú"í káḿ duuwu̵ yɛlı̵́ yɛ sú̵'ú̵.

⁷A̧máa a̧m há' moo pa'ané ya̧ŋ voo ku̵u̵ há' zó̧ó̧ 'yɛ́lı̵́ Yesu woolı̵́ yȩ la ú̵; a̧m sȩn fó̧ó̧ kɔ́ hȩn i to̧n kan Tayɨɨ wu̵lı̵́,

⁸moo ɛspóor kɔ́lı̵́ máa, gu̵g du̵u̵ waaná"ó̧, a̧máa hȩn to̧o̧g kɔ́lı̵́ kan Tayɨɨ máa, wu̵ du̵u̵ mba hȩn 'waapád. Wú̵ń pú̵ ba ví vágád du̵u̵ hágá yɛlı̵́, kan vágád ı̵́ káákáá Tayɨɨ woolı̵́ tíŋ́ á̧ḿ.

⁹Moo yȩ́ń wu̵ yȩ nɔ, wu̵ moo fȩȩlȩ́ kan zó̧ó̧ baa ví 'waapád.

¹⁰Moo woo nɔ ba kɔ́ ví ba'ad kan néélȩ́ baa ví yɔ, moo ba 'yɛ́ ví zó̧ó̧ baa ví dɨ Tayɨɨ ı̵́ zá̧a̧d yȩ woolı̵́. Wu̵ ı̵́ sənné nán voo 'waapád, a̧máa səd nán zó̧ó̧ 'yɛ́lı̵́ vu̵u̵ mba.

¹¹Tée a̧m gagad nán vu̵ moo yȩ ó̧, mɔ́ tú'ud vu̵ ú̵!

¹²Kóó káḿ náásá̧ŋ́ yȩ nɔ si̧', a̧m gbɔ nán tóó a ɓéem sá. A̧m kɔ́ hȩn nán zó̧ó̧ 'yɛ́lı̵́ u̵u̵ kɔ́ duu má nɔ. A̧m tú'ud vu̵ moo móólȩ́ ya̧gá̧, kan mbaalı̵́ móó, kan zó̧ó̧ nán kɔ́lı̵́, kan zó̧ó̧ 'yɛ́lı̵́, kan mbaalı̵́ du̵u̵ móó á̧ḿ.

¹³A̧m baa záŋ́ga debtere Tayɨɨ woo ya zo"ı̵́, mɔ́ ta'ad o̧d nán vu̵, mɔ́ tú' moo Tayɨɨ woo á̧ḿ, mí laa dɨlı̵́.

¹⁴A̧m ɓéé hȩn pú̵lı̵́ yigid Tayɨɨ woo ka pú̵m yȩ sá. Pú̵m hȩn yȩ vu̵ kɔ́ ı̵́ anábi ku̵u̵ o̧ wɔgɔ, sey ı̵́ nii sú̵ggı̵́ ku̵u̵ ha'am nag yȩlȩ́.

¹⁵A̧m sȩn fó̧ó̧ kɔ́ hȩn yȩ vu̵, moo há̧á̧ nán u̵u̵ ho̧ ba'ad káḿ dɨ kɔ́lı̵́ laan tíŋ́ tíŋ́ yȩ ó̧.

¹⁶Tée a̧m gág fó̧ó̧ móó, kan hȩn tú"í móó á̧ḿ; a̧m nda doo wu̵lı̵́ du̵u̵lı̵́ na'a. Tow a̧m kɔ́ ı̵́ yo̧go̧ tée, aga mɔ́ń səd fó̧ó̧ móó, kan nán ku̵u̵ ki moo móó yȩ vu̵ á̧ḿ.