Read Dii 1 TIMƆTÉE 5 Bible Online

1 TIMƆTÉE 5 - Dii bible

1 TIMƆTÉE 5

¹A̧m sée ı̵́ gbo̧o̧naa vu̵ sá, a̧máa a̧m ho̧ vu̵ kɔ́ ı̵́ ba' móó vu̵ wɔgɔ. A̧m 'yɛ́ náásaa vu̵ kɔ́ ı̵́ dag sá̧ŋ́ vu̵ wɔgɔ.

²A̧m ho̧ wakȩ́ȩ́ gbo̧o̧naa vu̵ kɔ́ ı̵́ na' móó vu̵ wɔgɔ á̧ḿ. A̧m ho̧ náá gíb vu̵ kɔ́ ı̵́ dam kȩ́ȩ́ vu̵ wɔgɔ, a̧m gág kan mbaalı̵́ móó ó̧!

³A̧m ho̧ wakȩ́ȩ́ yɛd yȩ́ń vu̵ kɔ́ ı̵́ wakȩ́ȩ́ yɛd vu̵ wɔgɔ.

⁴A̧máa tow wakȩ́ȩ́ yɛd tóó ka dɨ kan waa vu̵, tóó tée, ka dɨ kan a' woo vu̵ tée, a̧m tú'ud ı̵́ yȩ vu̵ u̵u̵ na' nán voo vu̵, u̵u̵ vȩ' hȩn du̵u̵ kɔ́d ı̵́ ha̧a̧lȩ́ voo vu̵, kan a' voo vu̵, kan aa yée vu̵ á̧ḿ, moo hȩn ka to̧o̧d Tayɨɨ máa, wu̵ yȩ nɔ.

⁵Wakȩ́ȩ́ ı̵́ yɛd yȩ́ń, nán gba̧"ȩ́ woo ka pɛ́lı̵́ máa, 'yɛ́ sı̵́ də́ń zó̧ó̧ woo Tayɨɨ woolı̵́ ú̵, o̧d Tayɨɨ moo mbaan wu̵lı̵́ vid kan zá̧ga̧ á̧ḿ.

⁶A̧máa wakȩ́ȩ́ yɛd, ı̵́ ka mbaa woo hȩn hí̧í̧lí̧ hágá yȩ vu̵lı̵́ máa, kóó a mbaa zá̧a̧dı̵́ si̧', nɔɔ zó̧ó̧ woolı̵́ sú̵'ú̵.

⁷Hȩn a̧m o̧d vu̵ máa, wu̵ yȩ nɔ, moo u̵u̵ kɔ́ hȩn nán tóó a sée vu̵ wu̵lı̵́ máa sá.

⁸Tow nán tóó a taan nán woo vu̵ né, kan nán kíi woolı̵́ vu̵ á̧ḿ né tée, nán woo zó̧ó̧ 'yɛ́lı̵́ woo 'wáawu̵ sú̵'ú̵, tée duu kɔ́ hȩn ɓı̵́d mba sı̵́ nán gaa Tayɨɨ sá vu̵ ú̵ á̧ḿ.

⁹Tow wakȩ́ȩ́ yɛd ka dɨ kan ve' vo' gúú, ká a éé wə̧ə̧ dɨ dágá tée, a̧m bíńda yéé woo sa̧a̧m wakȩ́ȩ́ yɛd voolı̵́.

¹⁰Tée u̵u̵ gaa ba wakȩ́ȩ́ ba'ad du̵u̵ kɔ́lı̵́ɨ, ba ka tu̵ waa woo vu̵ du̵u̵lı̵́ na'a, ba ka fȩȩ gáá vu̵ du̵u̵lı̵́ na'a máa á̧ḿ, ba ka tɛ nán Tayɨɨ woo vu̵ doo, ba ka maa daga ku̵u̵ duun vu̵ kan moo, ba ka kɔ́ də́ń ba'ad du̵u̵ vu̵ má nɔ.

¹¹A̧máa a̧m ɓɛ wakȩ́ȩ́ yɛd náá gíb vu̵ sá, moo sey tóólı̵́ ka vu̵n kéé Krístu gbɔ moo hȩn hí̧í̧lí̧ voo, ka vu̵n duu éé wə̧ə̧ tóó á̧ḿ.

¹²Tée kan tiid vu̵ hȩn ya̧g talı̵́ buuní voo yȩlȩ́.

¹³Tée ka vu̵n baa kúgú də́ń mbaalı̵́ té', ka vu̵n baa 'yȩ́ḿ daa yúba yúba kíi vu̵lı̵́, a̧máa 'yȩ́mnée té"ɨ pɛ́lı̵́ á̧ḿ, a̧máa ka vu̵n laan kan moo vu̵ ɓéené o̧lȩ́, ka vu̵n kɔ́ hȩn ka maan kɔ́lı̵́ né, ka vu̵n moo moo ı̵́ ka maan o̧lȩ́ né máa vu̵ á̧ḿ.

¹⁴Moo woo nɔ, mí hí̧í̧ wakȩ́ȩ́ yɛd ı̵́ náá gíb u̵u̵ duu éé wə̧ə̧, u̵u̵ ha̧a̧ waa, u̵u̵ tu̵ kíi voo, tée nán maag baa ví vú̵ń nugun hi̧naa moo ɓı̵́d moolȩ́ yúú baa vílí ní.

¹⁵Ma wakȩ́ȩ́ yɛd tóó vu̵ hɨ' duu sı̵́ Seeɗánnɔ́.

¹⁶A̧máa tow wakȩ́ȩ́ zó̧ó̧ 'yɛ́lı̵́ tóó ka dɨ kan wakȩ́ȩ́ yɛd ka mɛm woo nɔ tée, a maawo̧ ó̧, moo ba'ad yúú woolı̵́ a təə nán sú̵ggı̵́ vu̵ sá. Tée nán sú̵ggı̵́ vú̵ń nuŋ néélȩ́ tu̵ wakȩ́ȩ́ yɛd yȩ́ń ku̵u̵ kan nán pɛ́lı̵́ máa vu̵.

¹⁷Ɨ́ nii sú̵ggı̵́ ku̵u̵ dii ba'ad du̵u̵lı̵́ na'a máa, u̵u̵ sú̵ú̵ vu̵ hȩn ha'an do' idú, a̧máa nán ı̵́ ku̵u̵ pa moo Tayɨɨ, ku̵u̵ tú' moo á̧ḿ máa ı̵́ voo a wu̵ mba.

¹⁸Moo Tayɨɨ o̧: “Káḿ ɓɛ ndaa kɔ́n ba'ad kɔɔgı̵́ tée, a̧m gbo'odu̵ kə́ə saa ya̧gá̧ sá.” Duu o̧: “Maa nán ba'ad ba nuŋ hȩn sú̵ú̵lı̵́ woo ú̵.”

¹⁹Nán ku̵u̵ doo ı̵́ nii sú̵ggı̵́ tóó tée, a̧m fȩȩ moo woo há̧ná sá. Séý nán idú, tóó tée ta̧a̧nɔ́ u̵u̵ o̧ ba moo yȩ́ńne pȩ́ń.

²⁰Ɨ́ ku̵u̵ kɔ́ hȩn ɓı̵́d laa tíŋ́ tée, a̧m sée vu̵ zu̵u̵ sa̧a̧m nán sú̵ggı̵́ voolı̵́ zo"ı̵́, moo nán tóó u̵u̵ ho̧ tée, vú̵ń ndɔg hȩn ɓı̵́d kɔ́lı̵́.

²¹Mí o̧m dȩ"ȩ́ na'a tíŋ́ Tayɨɨ woolı̵́, kan tíŋ́ Yesu Krístu woolı̵́, kan tíŋ́ maleeka Tayɨɨ woo voolı̵́ á̧ḿ, a̧m duu moo tú"í míí yɛ vu̵, a̧m sə̧' moo kan ka̧a̧lȩ́ sá, tóó tée moo dag gbooɨ sá á̧ḿ.

²²A̧m ha'ad nán tóó nag moo ba'ad ı̵́ nii kɔ́lı̵́ vaŋná sá. A̧m yu̵g hȩn ɓı̵́d kɔ́lı̵́ nán tóó woo sá. A̧m mbaa móó du̵u̵lı̵́ na'a.

²³A̧m baa zɔ də́ń mamme kəd sá, a̧máa a̧m zɔ doo waaná'ná', moo búú móó a kɔ́ ba'ad du̵u̵ á̧ḿ, moo káḿ mbaan kan ho̧o̧ bə́' bə́' yȩ nɔ.

²⁴Hȩn ɓı̵́d kɔ́lı̵́ nán tóó voo ba ho̧ gaa la vaŋná, ma vu̵ laa ná ya moo sə̧"ȩ́lȩ́ né, a̧máa ı̵́ nán tóó voo, ba sə̧' vu̵ moo ma, ba gaa pigim.

²⁵Ba'ad du̵u̵ kɔ́lı̵́ á̧ḿ, ba ho̧ gaa vu̵ la. Kóó aa ho̧n tóó vu̵ zu̵u̵ pə́lə́lə́ né si̧', vú̵ń yú̵gu̵ né á̧ḿ.