Read Dii 1 TIMƆTÉE 6 Bible Online

1 TIMƆTÉE 6 - Dii bible

1 TIMƆTÉE 6

¹Gba'a u̵u̵ na' ı̵́ buulí voo vu̵ du̵u̵lı̵́ na'a ó̧, moo nán tóó a haa Tayɨɨ, u̵u̵ haa du̵g yúú moo tú"í baa vílí á̧ḿ sá!

²Ɨ́ buulí gba'a voo u̵u̵ nán zó̧ó̧ 'yɛ́lı̵́ vu̵ yu̵ tée, gba'a u̵u̵ ɓéé vu̵ moo ba vu̵n da bi nii vu̵ yu̵ sá. A̧máa maa ba vu̵n duu kɔ́d vu̵ ba'ad du̵u̵lı̵́ na'a á̧ḿ, moo nán ku̵u̵ kɔ́d vu̵ ba'ad yȩ, vu̵ nán zó̧ó̧ 'yɛ́lı̵́ vu̵ yu̵, vu̵ hí̧í̧n á̧ḿ. A̧m tú' moo yúú moo yɛlı̵́, mɔ́ gagad nán vu̵ á̧ḿ.

³Tow nán tóó a tú' moo ı̵́ woo kə́d, a duun moo tú"í yȩ́ń ı̵́ 'yɛ́lı̵́ baa ví Yesu Krístu woo, kan moo tú"í yúú hi̧naa Tayɨɨ duulí baa ví yȩlȩ́ né tée,

⁴na' yúúi, gaan hȩn tóó né á̧ḿ, dɨ kan zó̧ó̧ moo fá̧né kan hánnée. Zó̧ó̧ yȩ wu̵ baa kɔ́, ma nán vu̵ sú̵ zó̧ó̧ hȩn daga voolı̵́, vu̵ mɔ́ń moo, vu̵ haa du̵g, vu̵ taa moo ɓı̵́d.

⁵Moo fá̧né sí̧'i̧n voolı̵́ ya̧gá̧ né, vu̵ dɨ kan moo taalı̵́ ɓı̵́d ku̵u̵ gbɔ moo yȩ́ń yȩ. Vu̵ taa Tayɨɨ duulí máa, ba hȩn naa nuníi.

⁶Moo yȩ́ńne, moo Tayɨɨ duulí máa, hȩn naa gbo̧o̧ tóó nɔ, tow zó̧ó̧ a dȩ' ba kan hȩn ı̵́ kaa nuŋ vu̵ ú̵ tɛ́ nɔ.

⁷Ba yaan ví kan hȩn waaná' aga hágá yɛlı̵́ né. Báń duu pa̧ŋ ví hȩn tóó laan pig nɔmmé né á̧ḿ.

⁸Moo woo nɔ, tow aa nuŋ ví hȩn lálı̵́ kan sa̧a̧m tée, ba dȩ' ví zó̧ó̧ wu̵lı̵́ 'wáa yȩ.

⁹A̧máa ı̵́ ku̵u̵ hí̧í̧ voo naa kɔ́lı̵́ máa, vu̵ dɔd voo yúú hȩn zo"ı̵́lı̵́ kɔ́ ı̵́ nán ka dɔd yúú sə́g vəgə́lı̵́ máa wɔgɔ. Ma vu̵ soo hȩn ya̧ŋ vu̵, vu̵ hí̧í̧ hȩn ɓı̵́d vu̵ kɔ́lı̵́, kan hȩn ɓı̵́d ka pin nán vu̵ laan ya lı̵́nnélȩ́, kan ya tunnílí̧ yȩ.

¹⁰Sɨɨde hí̧í̧lí̧ wu̵ pa̧ŋ hȩn ɓı̵́d vu̵ 'waapád kə́dkə́d! Nán tóó ku̵u̵ 'yɛ́ zó̧ó̧ voo wu̵lı̵́ máa, vu̵ ti la, vu̵ duu 'yɛ́n sı̵́ zó̧ó̧ voo Tayɨɨ woolı̵́ né, ma vu̵ dɔd yúú voo ya hȩn ndɔ́gɔné vu̵lı̵́ ɓu̵u̵lı̵́ na'a.

¹¹A̧máa ı̵́ móó, nán Tayɨɨ woo, a̧m ndɔg hȩn yȩ vu̵ la ú̵! A̧m sȩn fó̧ó̧ kɔ́ hȩn hí̧í̧lí̧ Tayɨɨ woo nɔ, a̧m duuwu̵ du̵u̵lı̵́ na'a, a̧m 'yɛ́ zó̧ó̧ móó woolı̵́, a̧m kɔ́ zó̧ó̧ nán, a̧m ma' zó̧ó̧, a̧m mbaa kan zó̧ó̧ ká̧'a̧dɨ.

¹²A̧m nda doo zó̧ó̧ 'yɛ́lı̵́ móólȩ́ du̵u̵lı̵́ na'a, a̧m ɓɛ vágád káákáá Tayɨɨ woolı̵́, moo Tayɨɨ ká beem a̧m nuŋ vágád yȩ kan bi, sey ká káḿ tú' zó̧ó̧ 'yɛ́lı̵́ móó tíŋ́ nánán ɓu̵u̵lı̵́ na'a voolı̵́ yȩlȩ́.

¹³Mí o̧m tíŋ́ Tayɨɨ ka 'yɛ́ hȩn vu̵ zá̧a̧dná máa woolı̵́, kan tíŋ́ Yesu Krístu ka du̵ ya̧g du̵u̵lı̵́ na'a yúú zó̧ó̧ 'yɛ́lı̵́ woolı̵́ tíŋ́ Pilád woolı̵́ yȩlȩ́, mí o̧m

¹⁴a̧m duu dooká míí yɛ, a̧m kɔ́ hȩn ví̧i̧g tóó sá, a̧m kɔ́ hȩn tóó nán tóó a séem wu̵lı̵́ sá há̧á̧ a ya̧ bá' ı̵́ 'yɛ́lı̵́ baa ví Yesu Krístu woo a fíí ya wu̵lı̵́.

¹⁵Wú̵ń yaa sey Tayɨɨ ka mbɔ́g máalȩ́, Tayɨɨ ı̵́ zó̧ó̧ dȩ"ȩ́, wu̵ gbanii gbo̧o̧ kəd. Tayɨɨ wu̵ mbaa gbanii yúú gbanii voolı̵́, wu̵ ı̵́ 'yɛ́lı̵́ ı̵́ 'yɛ́lı̵́ voo á̧ḿ,

¹⁶wu̵ dágá wu̵u̵ nɔɔ né. Wu̵ mbaa ya túlí tóólı̵́; nán tóó wú̵ń séen la wu̵lı̵́ né. Nán tóó ho̧nnɔ lá kan nɔ́ɔ́ né, wú̵ń dɨ kan néélȩ́ ho̧nnɔ né á̧ḿ. Ba na' ví Tayɨɨ, wu̵ mba hȩn 'waapád há̧á̧ káákáá. Aamɛ́n.

¹⁷A̧m o̧d nán naa hágá yɛlı̵́ vu̵ u̵u̵ na' yúú voo yúú hȩn naa voo vu̵lı̵́ sá. Ʉu̵ 'yɛ́ zó̧ó̧ voo wu̵lı̵́ sá á̧ḿ, moo wú̵ń dɨ 'wáanée. A̧máa u̵u̵ 'yɛ́ zó̧ó̧ voo Tayɨɨ woolı̵́ dágá, wu̵ pú̵ ba ví hȩn 'waapád ɓu̵u̵lı̵́ na'a moo aa kɔ́n ví ba'ad wu̵lı̵́.

¹⁸A̧m o̧d vu̵ u̵u̵ kɔ́ hȩn du̵u̵ɨ, u̵u̵ kɔ́ ba'ad du̵u̵ za̧a̧ná, u̵u̵ kɔ́ sɨg ka̧a̧m sá, u̵u̵ pú̵ daga vu̵ hȩn á̧ḿ.

¹⁹Tée vú̵ń su̵g hȩn naa du̵u̵ tóó ı̵́ a mbaa káákáá moo u̵u̵ nuŋ vágád káákáá ı̵́ də́ń kəd máa wu̵lı̵́.

²⁰Timɔtée, a̧m tu̵ moo tú"í ku̵u̵ gbɔm nagá du̵u̵lı̵́ na'a yȩ ó̧. A̧m ki moo dámné lee vu̵ sá, kan moo faalı̵́ vbád nán ku̵u̵ o̧ bin nán hȩn gaalı̵́ɨ yȩ voo sá á̧ḿ.

²¹Nán ı̵́ tóó ku̵u̵ duu moo yȩ vu̵ máa, vu̵ kéé zó̧ó̧ 'yɛ́lı̵́ yȩ́ń voo gbɔ sú̵'ú̵. Tayɨɨ a kɔ́d ví zó̧ó̧ nánne.