Read Dii 2 TIMƆTÉE 1 Bible Online

2 TIMƆTÉE 1 - Dii bible

2 TIMƆTÉE 1

¹Mí Póllu̵, waa ba'ad Yesu Krístu woo nɔ, moo Tayɨɨ hí̧í̧ bi 'yɛ́n ı̵́ yo̧go̧. Tayɨɨ gbɔn moo palı̵́ nagá yúú vágád káákáá Tayɨɨ woolı̵́, ka ta ya̧g wu̵lı̵́ yȩ, hí̧í̧ aa nuŋŋɔ ví yúú Yesu Krístu woolı̵́.

²Timɔtée, waa hí̧í̧lí̧ míí, míi ba'am ɗerwəl yɛ. Ba'á Tayɨɨ, vu̵ kan Yesu Krístu ı̵́ 'yɛ́lı̵́ baa ví u̵u̵ kɔ́m zó̧ó̧ nán, u̵u̵ ho̧ gíḿ gaam, u̵u̵ 'yɛ́m a̧m mbaa ká̧'a̧dɨ.

³Mí dȩn Tayɨɨ nag yúú móólȩ́, mí baa taam bə́' bə́' vid kan zá̧ga̧ á̧ḿ, sey káń dɨd Tayɨɨ moo o̧lȩ́ tɛ́ nɔ. Mí dɨddu̵ ba'ad kɔ́lı̵́ kɔ́ ı̵́ an yée kú̵u̵ kɔ́ máa wɔgɔ; mí mbaa pá̧á̧ tíŋ́ Tayɨɨ woolı̵́.

⁴Káń taa ká̧ń móó[1] yȩ tée, mí hí̧í̧ bi ho̧m nɔ́lȩ́, zó̧ó̧ a ka̧'a̧nɔ́.

⁵Mí duu taa zó̧ó̧ 'yɛ́lı̵́ yȩ́ń máa ka dɨ móólȩ́ yȩ, zó̧ó̧ 'yɛ́lı̵́ yȩ a' móó Lowís ká dɨ kannɔ á̧ḿ, kan na' móó Ewnís á̧ḿ. Mí gaa zó̧ó̧ 'yɛ́lı̵́ yȩ wu̵ dɨ zó̧ó̧ móólȩ́ 'ya̧'a̧ yɛ á̧ḿ.

⁶Moo woo nɔ ma, mí duu ta'ad o̧m, a̧m tíd hȩn yigid Tayɨɨ woo káń ha'am nag ma, ka pú̵m wu̵lı̵́ yȩ du̵u̵lı̵́ na'a,

⁷moo yigid Tayɨɨ ka pú̵ ba ví yȩ tiin ba ví nán ya' né. A̧máa pú̵ ba ví néélȩ́, kan zó̧ó̧ nán, kan zó̧ó̧ to̧o̧ á̧ḿ.

⁸Moo woo nɔ, sȩ́ḿ a kɔ́m moo ı̵́ 'yɛ́lı̵́ baa ví woo tú"í sá. Kóó ku̵u̵ dɔn púúsinalȩ́ moo woo yɛ nɔ si̧', sȩ́ḿ a duu kɔ́m yúú míílí̧ sá á̧ḿ, a̧máa a̧m fȩȩ hȩn ndɔ́gɔné yúú moo to̧o̧ 'maŋŋı̵́; Tayɨɨ wú̵ń pú̵m néélȩ́ hȩn yȩ kɔ́lı̵́ á̧ḿ.

⁹Wu̵ səd ba ví, wu̵ bee ba ví moo aa mbaa ví zig bii nu, a̧máa moo ba'ad baa ví nu pɛ́lı̵́, séý yúú moo mbɔ́ggı̵́ woo, kan zó̧ó̧ nán woo yɛ nɔ. Ká dəŋ kɔ́d ba ví sı̵́ zó̧ó̧ nán yȩ yúú Yesu Krístu woolı̵́, sey ka yɨm ná hág né máalȩ́.

¹⁰Tú'ud ba ví sı̵́ hȩn woo 'ya̧'a̧ yɛ yúú nímní Yesu Krístu ı̵́ sənné baa ví woo nɔmmé yȩlȩ́ ó̧. Yesu wu̵ 'waa néélȩ́ nɔm woo; yúú moo to̧o̧ 'maŋ ka pa̧ŋ yaan yȩlȩ́, tú'ud ba ví mbaalı̵́ ı̵́ nɔm a dɔ́n wu̵lı̵́ né máa á̧ḿ.

¹¹Tayɨɨ gbɔn ba'ad moo to̧o̧ 'maŋ palı̵́ yɛ nagá, moo mbaalı̵́ waa ba'ad, kan moo Tayɨɨ tú"í á̧ḿ.

¹²Moo woo nɔ ma, mí nuŋ hȩn ndɔ́gɔné yɛ, a̧máa sȩ́ḿ tóó kɔ́n mí ní, moo mí gaa ı̵́ káń 'yɛ́ zó̧ó̧ míí woolı̵́ yȩ ó̧. Mí gaa wú̵ń dɨ kan néélȩ́ tu̵ hȩn ka gbɔn nagá yɛ ú̵, há̧á̧ zá̧ga̧ woo wú̵ń ya̧.

¹³A̧m duu moo yȩ́ń káḿ ki míílí̧ yɛ vu̵; a̧m nda doo zó̧ó̧ 'yɛ́lı̵́lı̵́ kan zó̧ó̧ nán kaa nuŋ ví Yesu Krístu woolı̵́ yɛ nɔ.

¹⁴A̧m tu̵ moo tú"í du̵u̵ ku̵u̵ gbɔm nagá yɛ, kan néélȩ́ yigid Tayɨɨ woo ka dɨ baa vílí yɛ nɔ.

¹⁵Mɔ́ gaa nán hág Aazíilí 'waapád vu̵ kéé gbɔn sú̵'ú̵. Sa̧a̧m voolı̵́ máa, Fizɛ́l vu̵ kan Heemozɛ́n vu̵ yu̵.

¹⁶Ɨ́ 'yɛ́lı̵́ a ho̧ gíḿ gaad nán Onesifóo woo vu̵, moo baa ka̧'a̧n zó̧ó̧ sey tóólı̵́ ɓu̵u̵lı̵́ na'a. Sȩ́ḿ kɔ́nnɔ moo ɗág míí lig púúsinalȩ́ yɛlı̵́ né á̧ḿ,

¹⁷a̧máa sey ka ya̧ kaa Rómalȩ́ máa, pi zó̧ó̧ soon há̧á̧ ya nugun.

¹⁸Ɨ́ 'yɛ́lı̵́ a ho̧ gíḿ gaadu̵ zá̧ga̧ fíiní woolı̵́ ú̵. Mɔ́ gaa du̵u̵lı̵́ na'a ba'ad máa ka kɔ́n kaa Ɛfɛ́ɛzlı̵́ na'a yȩ ó̧.