Read Dii 2 TIMƆTÉE 2 Bible Online

2 TIMƆTÉE 2 - Dii bible

2 TIMƆTÉE 2

¹Moo woo nɔ, waa míí, a̧m zigin zó̧ó̧ yúú zó̧ó̧ nán kaa nuŋ ví yúú Yesu Krístu woolı̵́ yȩlȩ́!

²Hȩn káḿ ki, káń pa la dúú zo"ı̵́ yȩ, a̧m duu tú'ud nán yȩ́ń tóó vu̵ moo u̵u̵ duu tú'ud nán tóó vu̵ á̧ḿ.

³A̧m fȩȩ hȩn ndɔ́gɔné ka' ı̵́ móó yȩlȩ́ kɔ́ ı̵́ só̧ó̧ze ta ya̧g buu sá tóó Yesu Krístu woolı̵́ máa wɔgɔ.

⁴Nán ka dɔ́ ba'ad só̧ó̧ze tée, dɔn woo ya̧g yúú mbaalı̵́ nán kaa voolı̵́ né, moo a to̧o̧d ı̵́ nii bii nu.

⁵Nán tóó a kɛ ɗug duun dooká ɗug kɛlı̵́ né tée, wú̵ń nugun hȩn sú̵ú̵lı̵́ né.

⁶Nán ka baa hȩn máa, maa ba dəŋ nuŋ hȩn bab ka' ı̵́ woo tíŋ́ pȩ́ń.

⁷A̧m taa moo máa káń o̧m yɛ vu̵ ú̵, moo ı̵́ 'yɛ́lı̵́ wú̵ń kɔ́ mɔ́ń ki gaa 'waapád.

⁸A̧m taa Daavíd aa yée, Yesu Krístu ka níḿ nɔmmé, káń pa moo to̧o̧ 'maŋ woo yɛ nɔ.

⁹Moo woo nɔ ma, káń nuŋ hȩn ndɔ́gɔné, ku̵u̵ ga'an kan ɗág kɔ́ ı̵́ nán hȩn ɓı̵́d kɔ́lı̵́ tóó wɔgɔ yɛ nɔ. A̧máa vu̵ ga'an moo Tayɨɨ woo nɔ né.

¹⁰Moo woo nɔ, mí ma' zó̧ó̧ yúú hȩn 'waapáddı̵́, moo nán ı̵́ Tayɨɨ ka yee vu̵ máa voo nɔ, moo u̵u̵ sə́d yúú Yesu Krístu woolı̵́, u̵u̵ nuŋ mbaalı̵́ káákáá na"ȩ́ na'a á̧ḿ.

¹¹Moo yɛ vu̵ moo yȩ́ńne: “Aa sú̵g nɔɔ ví kannɔ á̧ḿ tée, báń duu nuŋ ví vágád kannɔ á̧ḿ;

¹²aa ma' ví zó̧ó̧ tée, báń sú̵g waa ví gbaŋ kannɔ á̧ḿ; aa su̵u̵wu̵ ví tée, wú̵ń su̵u̵ ba ví á̧ḿ;

¹³tow aa buu ví ya̧g talı̵́ baa ví tée, aga ta ya̧g buun woo né, moo wú̵ń su̵u̵n fó̧ó̧ woo né.”

¹⁴A̧m duu ta'ad o̧d nán vu̵ tíŋ́ Tayɨɨ woolı̵́, u̵u̵ fá̧ŋ́ moo yúú moo moolȩ́ tóó vu̵lı̵́ sá. Moo fá̧né yȩ vu̵ kɔ́n hȩn du̵u̵ tóó né, a̧máa vu̵ á̧ nán ku̵u̵ ki máa vu̵ yu̵.

¹⁵A̧m sȩn fó̧ó̧ kɔ́ ba'ad du̵u̵ ka to̧o̧d Tayɨɨ má nɔ. A̧m kɔ́ ba'ad moo sȩ́ḿ a kɔ́m wu̵lı̵́ sá, a̧máa a̧m tú' moo ı̵́ yȩ́ńne kəd.

¹⁶A̧m tii tɔ́g ki la moo pa'ané lee ku̵u̵ duun zó̧ó̧ 'yɛ́lı̵́ baa ví ní yȩ vu̵ sá, moo nán ı̵́ ku̵u̵ baa moo moo yȩ, vu̵ hı̵́'ı̵́n kan Tayɨɨ laa tíŋ́ tíŋ́.

¹⁷Moo moolȩ́ nán yȩ voo mbaa kɔ́ ı̵́ hȩn hú̵"ı̵́ ka lá nán fó̧ó̧ woo máa wɔgɔ. Sa̧a̧m voolı̵́ máa, Himenée vu̵ kan Filɛ́ddu̵.

¹⁸Vu̵ ma moo yȩ́ń gbɔ sú̵'ú̵, vu̵ o̧ nímní nɔmmé baa ví ba ya̧ sú̵'ú̵, vu̵ zo' nán vu̵ ɓu̵u̵lı̵́ na'a.

¹⁹A̧máa lig do̧o̧ Tayɨɨ woo ka pɛd yȩ dii mbaa woo néélȩ́ na'a. Moo ku̵u̵ bíńda yúú lig do̧o̧ woolı̵́ máa wu̵ yɛ nɔ: “Ɨ́ 'yɛ́lı̵́ Tayɨɨ gaa nán woo vu̵ ú̵;” ma vu̵ duu bíńda wu̵lı̵́ á̧ḿ: “Nán ı̵́ ku̵u̵ o̧ bin nán ı̵́ 'yɛ́lı̵́ woo vu̵ yu̵ máa, u̵u̵ gbɔ hȩn ɓı̵́d kɔ́lı̵́ la ú̵.”

²⁰Kíi nán naa voolı̵́ máa, vu̵ 'yéen də́ń tasaw do̧' vu̵, kan tasaw nú' bal vu̵ yu̵ dágá né, a̧máa vu̵ 'yée ɗag vu̵, kan gbág vu̵ á̧ḿ. Ɨ́ tóó vu̵ moo nán gbo̧o̧ voo vu̵ yu̵, a̧máa ı̵́ tóó vu̵ moo nán lee voo nɔ.

²¹Tow nán tóó a gbɔ hȩn ɓı̵́d yȩ vu̵ kɔ́lı̵́ tée, wú̵ń mbaa kɔ́ ı̵́ tasaw gáálı̵́ yȩ wɔgɔ, wú̵ń mbaad də́ń ı̵́ hȩn aga, wú̵ń mbaa bə́' moo ba'ad du̵u̵ 'waapád wu̵ kɔ́lı̵́.

²²A̧m ndɔg hȩn hí̧í̧lí̧ náásaa voo la ú̵, a̧máa a̧m soo hȩn Tayɨɨ ka hí̧í̧ máa, kan zó̧ó̧ 'yɛ́lı̵́ kan zó̧ó̧ nán, kan to̧nné kan nán ı̵́ ku̵u̵ o̧ ba bin nán ı̵́ 'yɛ́lı̵́ woo vu̵ yu̵ kan zó̧ó̧ 'waapád máa vu̵.

²³A̧m kéé moo ya̧ŋ fanné máa gbɔ la woo zulí, moo mɔ́ gaa hȩn ı̵́ yȩ ba woo hȩn ya̧g soolı̵́ɨ.

²⁴A̧máa nán ba'ad ı̵́ 'yɛ́lı̵́ woo a kɔ́ ya̧g sá, a̧máa a mbaa kan zó̧ó̧ ká̧'a̧d sa̧a̧m nán 'waapád voolı̵́. A baa tú'ud vu̵ moo, a ma' zó̧ó̧.

²⁵A tú'ud nán moo faalı̵́ vu̵ moo kan zó̧ó̧ to̧o̧. Tóó tée Tayɨɨ wú̵ń tii zó̧ó̧ voo, vú̵ń gaa moo yȩ́ń á̧ḿ.

²⁶Tée vú̵ń sə́d nag Seeɗán woolı̵́ kɔ́ ı̵́ ku̵u̵ ka to̧'o̧y ndowwı̵́ wɔgɔ, moo Seeɗán buu vu̵, u̵u̵ kɔ́ hȩn hí̧í̧lí̧ bii nu.