Read Dii 2 TIMƆTÉE 3 Bible Online

2 TIMƆTÉE 3 - Dii bible

2 TIMƆTÉE 3

¹A̧m gaa du̵u̵lı̵́ na'a, bá' sí̧'í̧d vu̵lı̵́ tée, mbaalı̵́ vú̵ń təə ú̵,

²moo nán vú̵ń hí̧í̧ də́ń fó̧ó̧ voo nɔ, vú̵ń hí̧í̧ sɨɨde vu̵, vú̵ń dáb moo yúú fó̧ó̧ voolı̵́, vú̵ń na' yúú, vú̵ń haa Tayɨɨ, vú̵ń ɓéé ı̵́ ha̧a̧lȩ́ voo vu̵, vú̵ń gaan nag dȩné né, vú̵ń ɓéé hȩn Tayɨɨ woo vu̵,

³vú̵ń lı̵́n mba hȩn, vú̵ń ho̧ gíḿ gaan daga vu̵ né, vú̵ń lı̵́d daga vu̵ yɛ́g, vú̵ń tu̵n fó̧ó̧ voo né, vú̵ń kɔ́ zó̧ó̧ ɓı̵́d, vú̵ń máń hȩn du̵u̵ kɔ́lı̵́,

⁴vú̵ń dɔn hȩn, vú̵ń taan moo né, vú̵ń na' yúú mba kɛb, vú̵ń hí̧í̧ hȩn hí̧í̧lí̧ voo vu̵ mba Tayɨɨ.

⁵Ba ho̧ vu̵ la nán Tayɨɨ ndɔggı̵́ɨ, a̧máa vu̵ ma néélȩ́ woo. A̧m dɔ́ń kan vu̵ sá.

⁶Sa̧a̧m nán yȩ voolı̵́ máa, tóó vu̵ dɔ́ duu ligí ligí, vu̵ baa zo' wakȩ́ȩ́ ku̵u̵ née né, ku̵u̵ kɔ́ hȩn ɓı̵́d na'a, ku̵u̵ duu hȩn hí̧í̧lí̧ voo,

⁷ku̵u̵ baa kúgú moo Tayɨɨ mbaan wu̵lı̵́, a̧máa ku̵u̵ gaan moo yȩ́ń woo né sá̧ḿ máa vu̵.

⁸Nán yȩ vu̵ lúú moo kan moo yȩ́ń kɔ́ ı̵́ Zanɛ́s vu̵ kan Zambɛrɛ́ɛ ku̵u̵ lúú moo kan Múúsa máa wɔgɔ. Moo taalı̵́ voo lı̵́d sú̵'ú̵; zó̧ó̧ 'yɛ́lı̵́ voo yȩ hȩn lee tóó nɔ á̧ḿ.

⁹A̧máa vú̵ń laan sı̵́ tíŋ́ né, moo nán 'waapád vú̵ń gaa vu̵, ba vu̵n kɔ́ hȩn ya̧ŋ kɔ́ ı̵́ Zanɛ́s vu̵ kan Zambɛrɛ́ɛ yȩ wɔgɔ.

¹⁰Aga ı̵́ móó, mɔ́ gaa sı̵́ moo tú"í míí, kan mbaalı̵́ míí, kan moo taalı̵́ míí, kan zó̧ó̧ 'yɛ́lı̵́ míí, kan zó̧ó̧ zi̧i̧lí̧ míí, kan zó̧ó̧ nán míí, kan zó̧ó̧ néélȩ́ míí,

¹¹kan moo ku̵u̵ duun mí máa vu̵, kan hȩn ndɔ́gɔné míí vu̵ á̧ḿmɔ́. Mɔ́ gaa hȩn ku̵u̵ kɔ́n na'a kaa Aŋtiósdı̵́, kan Ikónné, kan Lístalı̵́ máa vu̵ á̧ḿ. Hȩn yȩ vu̵, mí ma' zó̧ó̧ wu̵lı̵́, ma ı̵́ 'yɛ́lı̵́ sən wu̵lı̵́ 'waapád.

¹²Dɨ ı̵́ yo̧go̧; nán 'waapád ku̵u̵ bi duu Tayɨɨ kan zó̧ó̧ voo 'waapád, kan yɛ́g Yesu Krístu woo máa, vú̵ń duun vu̵ kan moo ı̵́ yo̧go̧ á̧ḿ.

¹³A̧máa nán ɓı̵́d vu̵ kan nán vbád vu̵, vú̵ń laa tíŋ́ tíŋ́ kan ba'ad ɓı̵́d voo yȩ vu̵. Vú̵ń zo' nán vu̵ ba̧a̧, vú̵ń sú̵g bá̧a̧ á̧ḿ.

¹⁴A̧máa ı̵́ móó máa, a̧m nda móó doo hȩn káḿ kúgú, káḿ 'yɛ́ zó̧ó̧ wu̵lı̵́ 'waapád yȩlȩ́, moo mɔ́ gaa nán ka tú'um hȩn yȩ á̧ḿ.

¹⁵Mɔ́ gaa debtere Tayɨɨ woo diga náásá̧ŋ́ móólȩ́ sú̵'ú̵. Wú̵ńnɔ tú'um hȩn, ma mɔ́ń gaa hi̧naa sə́nné yúú zó̧ó̧ 'yɛ́lı̵́ Yesu Krístu woolı̵́ máa.

¹⁶Debtere Tayɨɨ woo 'waapád, moo woo yaa Tayɨɨ woolı̵́. Wu̵ tú' moo yȩ́ń, wu̵ há' moo vbád vu̵, wu̵ sə̧' hȩn kə̧ə̧g nán voo vu̵, wu̵ tú'ud vu̵ u̵u̵ mbaa kɔ́ ı̵́ Tayɨɨ ka hí̧í̧ máa wɔgɔ,

¹⁷moo nán Tayɨɨ woo u̵u̵ nuŋ néélȩ́, u̵u̵ mbɔ́g zó̧ó̧ voo moo ba'ad du̵u̵ vu̵ kɔ́lı̵́ 'waapád.