Read Dii 2 TIMƆTÉE 4 Bible Online

2 TIMƆTÉE 4 - Dii bible

2 TIMƆTÉE 4

¹Mí o̧m dȩ"ȩ́ na'a tíŋ́ Tayɨɨ woolı̵́, kan tíŋ́ Yesu Krístu ı̵́ a dɨ moo sə̧"ȩ́ yúú nán zá̧a̧d voolı̵́, kan ı̵́ nɔm vu̵ yȩ woolı̵́, mí o̧m kan fíiní Yesu woo, kan gbaŋ waalı̵́ woolı̵́ á̧ḿ, mí o̧m

²a̧m pa moo Tayɨɨ, a̧m nda doo wu̵lı̵́ zá̧ga̧ du̵u̵lı̵́, kan zá̧ga̧ ɓı̵́ddı̵́ á̧ḿ. A̧m gagad nán vu̵, mɔ́ sée vu̵, mɔ́ zigid vu̵ zó̧ó̧, mɔ́ tú'ud vu̵ kan zó̧ó̧ ká̧'a̧d ı̵́ də́ń kəd má nɔ.

³Sey tóólı̵́ tée nán vú̵ń ma'an zó̧ó̧ moo moo yȩ́ń tú"í kilí ní, a̧máa vú̵ń duu hȩn hí̧í̧lí̧ dáń voo nɔ, vú̵ń su̵g dúú nán hȩn tú"í voo vu̵, moo u̵u̵ tú'ud bi hȩn ku̵u̵ hí̧í̧ kilí má nɔ.

⁴Vú̵ń duu kin sı̵́ moo yȩ́ń né, vú̵ń vȩ́' la 'yɛ́ tɔ́g moo pa'ané vbád vu̵lı̵́.

⁵A̧máa ı̵́ móó, a̧m pı̵́ı̵́ fó̧ó̧ móó yúú hȩn 'waapáddı̵́. A̧m ma' zó̧ó̧ yúú hȩn ndɔ́gɔné vu̵lı̵́, mɔ́ kɔ́ ba'ad moo to̧o̧ 'maŋ palı̵́, mɔ́ kɔ́ ba'ad móó si̧' la gbug.

⁶Ɨ́ míí máa, zaa vú̵ń ha' sı̵́ fó̧ó̧ míí kɔ́ ı̵́ hȩn ha"ı̵́ wɔgɔ ú̵. Bá' nɔm míí ya̧ sú̵'ú̵.

⁷Mí kɔ́ ba'ad néélȩ́ na'a kɔ́ ı̵́ sɨɨ wɔgɔ sú̵'ú̵. Mí kɛ ɗug ya̧ sı̵́ ya sí̧'í̧dí ú. Zó̧ó̧ 'yɛ́lı̵́ míí 'wáa né á̧ḿ.

⁸'Ya̧'a̧ yɛ máa, hȩn sú̵ú̵lı̵́ míí wu̵ dɨn laalı̵́; wu̵ mɛɛtawəl to̧o̧g. Ɨ́ 'yɛ́lı̵́, ı̵́ moo yȩ́ń sə̧"ȩ́, wú̵ńnɔ pú̵n zá̧ga̧ woolı̵́. Wú̵ń pú̵n míw dágá né, a̧máa wú̵ń pú̵ nán ı̵́ u̵u̵ laa zá̧ga̧ fíiní woo kan zó̧ó̧ dȩ"ȩ́ máa vu̵ á̧ḿ.

⁹A̧m ha fó̧ó̧ yaa vaŋná,

¹⁰moo Demás kéé gbɔn sú̵'ú̵; hí̧í̧ də́ń hȩn hágá yɛ vu̵ yu̵, laa dɨ kaa Tesaloníilí̧. Keresɛ́n laa dɨ woo hág Galáddı̵́; Tíd laa dɨ woo hág Dalmáadı̵́.

¹¹Lúg wu̵ kéé kan mí yɛlı̵́ dágá. A̧m pa̧ŋ Márkus nagá, ví yaa á̧ḿ, moo mí hí̧í̧ a maan ba'ad kɔ́lı̵́ yɛlı̵́.

¹²Mí ba' Tisíg la dɨ kaa Ɛfɛ́ɛzlı̵́.

¹³A̧m yaa tée, mɔ́ ɓɛ sa̧a̧m ho̧o̧m míí káń gbɔ kaa Trowáddı̵́ yȩ pa̧n ya nagá, dɨ Karpús woolı̵́. A̧m pa̧n debtere vu̵ á̧ḿ, a̧m záń debtere ı̵́ kó̧ó̧ yȩ vu̵ sá á̧ḿ.

¹⁴Naŋ Alegzá̧ŋndərə duun mí kan moo du̵u̵n də́ń né, a̧máa ı̵́ 'yɛ́lı̵́ wú̵ń sú̵ú̵wu̵ yúú ba'ad woo yȩlȩ́ ó̧.

¹⁵A̧m gággu̵ ú̵. Há' moo tú"í baa ví yȩ du̵u̵n də́ń né.

¹⁶Sey káń dəŋ kpad ya̧g míí máa, nán baa ví tóó maan mí dágá aga né, a̧máa ya voo 'waapád vu̵ kéé gbɔn. Máa Tayɨɨ a 'yɛ́d vu̵ moo woo zó̧ó̧lȩ́ sá!

¹⁷A̧máa aga ı̵́ 'yɛ́lı̵́ wu̵ maan, wu̵ pú̵n néélȩ́ á̧ḿ, moo a̧n pa moo ya̧g ba'ad yɛ dȩ"ȩ́ na'a, há̧á̧ nán gaa Tayɨɨ sá vu̵ 'waapád u̵u̵ ki ú. Mí sɔ́d ya̧g kəə voolı̵́ á̧ḿ.

¹⁸Ɨ́ 'yɛ́lı̵́ wú̵ń sən ba'ad ɓı̵́d vu̵lı̵́ 'waapád, wú̵ń dɔn gbaŋ waalı̵́ woolı̵́ be"ı̵́. Ba na"o̧ ví há̧á̧ káákáá, aamɛ́n.

¹⁹A̧m vá' Prisíl wu̵lı̵́, kan Akíla, kan Onesifóo kan nán kíi woolı̵́ vu̵ á̧ḿ.

²⁰Ɛrás ká mbaa dɨ kaa Koríńtilí. Ká mí gbɔ Trofím ud ho̧o̧ dɨ kaa Miléelı̵́.

²¹A̧m ha fó̧ó̧ yaa vaŋná ma zó̧'o̧d a kɔ́. Ebulúu, kan Pudɛ́n, kan Linúd, kan Kolodía kan da ba ví kirtȩ́n tóó vu̵ 'waapád vu̵ vá'am wu̵lı̵́.

²²Ɨ́ 'yɛ́lı̵́ baa ví a mbaa kan mɔ́ ó̧. Tayɨɨ a kɔ́d ví zó̧ó̧ nánne.