Read Dii TÍD 1 Bible Online

TÍD 1 - Dii bible

TÍD 1

¹Mí Póllu̵, nán ba'ad Tayɨɨ woo, kan waa ba'ad Yesu Krístu woo nɔ. Tayɨɨ 'yɛ́n moo a̧n pa̧ŋ nán ka yee vu̵ máa vu̵ laan zó̧ó̧ 'yɛ́lı̵́lı̵́, a̧n tú'ud vu̵ moo yȩ́ń, moo Tayɨɨ baa ví ka tú' yɛ nɔ.

²Tée u̵u̵ 'yɛ́ zó̧ó̧ voo ba bíń nuŋ vágád káákáá Tayɨɨ woolı̵́. Tayɨɨ kɔ́n vbád né, ká wu̵ dəŋ tad ba ví ya̧g wu̵lı̵́ tíŋ́, ma yɨb hȩn vu̵ pigim.

³Zá̧ga̧ ka hí̧í̧ wu̵lı̵́ máa, vud hȩn woo tú' wu̵lı̵́ sú̵'ú̵, ma mí vud tú' kan moo ka 'yɛ́n ya̧gá̧ kɔ́ ı̵́ Tayɨɨ ı̵́ sənné baa ví ka mbɔ́g yɛ wɔgɔ.

⁴Tíd, waa míí káń ha̧a̧m kan zó̧ó̧ 'yɛ́lı̵́ baa ví yɛ, míi ba'am ɗerwəl yɛ. Ba'á Tayɨɨ, vu̵ kan Yesu Krístu ı̵́ sənné baa ví, u̵u̵ kɔ́m zó̧ó̧ nán, u̵u̵ 'yɛ́m a̧m mbaa ká̧'a̧dɨ.

⁵Mí gbɔm hág Kerɛ́ddı̵́, moo a̧m mbɔ́g hȩn ı̵́ ku̵u̵ kéé wu̵lı̵́ máa vu̵ yu̵, moo a̧m mbɔ́g ı̵́ nii sú̵ggı̵́ vu̵ duu kaalı̵́ kaalı̵́ kɔ́ ı̵́ káń o̧m yȩ wɔgɔ.

⁶Ɨ́ nii sú̵ggı̵́ máa, a kɔ́ hȩn tóó nán u̵u̵ séewu̵ wu̵lı̵́ sá, a éé kȩ́ȩ́ dágá, waa woo u̵u̵ mbaa nán zó̧ó̧ 'yɛ́lı̵́, u̵u̵ kɔ́ hȩn táŋ́taŋ sá, u̵u̵ ŋgó̧ó̧ tɔ́g sá.

⁷Ɨ́ nii ba'ad diilí a kɔ́d də́ń Tayɨɨ wu̵ ba'ad. Moo woo nɔ, a kɔ́ hȩn tóó nán u̵u̵ séewu̵ wu̵lı̵́ máa sá. A na' yúú sá, a kɔ́ zó̧ó̧ yȩ́ȩ́ vaŋná sá. A kíí doo sá, a kɔ́ ya̧g sá, a tá kan sɨɨde sá.

⁸A̧máa a fȩȩ gáá vu̵ du̵u̵lı̵́ na'a, a hí̧í̧ hȩn du̵u̵ wu̵ kɔ́lı̵́, a taa moo du̵u̵lı̵́ na'a, a kɔ́ hȩn hí̧í̧lí̧ Tayɨɨ woo, a 'yɛ́ zó̧ó̧ woolı̵́ 'waapád, a pı̵́ı̵́ fó̧ó̧ woo á̧ḿ.

⁹A nda doo yúú moo tú"í yȩ́ń yúú moo Tayɨɨ woolı̵́. Tée wú̵ń nuŋ néélȩ́ zigid daga vu̵ zó̧ó̧ yúú moo tú"í yȩ́ń yȩlȩ́, tée wú̵ń gaad nán moo faalı̵́ vu̵ ya̧g hí̧í̧lí̧ yúú hȩn kə̧ə̧g kɔ́lı̵́ voo yȩlȩ́ á̧ḿ.

¹⁰Nán Yúúda vu̵ ɓu̵u̵lı̵́ na'a, kan nán tóó ku̵u̵ tii zó̧ó̧ voo, ma ku̵u̵ duu ŋgó̧ó̧ tɔ́g máa, vu̵ woo daga vu̵ ba̧a̧ kan moo ya̧ŋ voo vu̵.

¹¹A̧m gbɔd vu̵ hi̧naa u̵u̵ laan tíŋ́ kan moo o̧lȩ́ sá. Vu̵ kɔ́ nán zó̧ó̧ 'yɛ́lı̵́ tóó vu̵, vu̵ duu vu̵ kan kíi voo á̧ḿ. Vu̵ tú' hȩn ka maan tú"í ní má nɔ, moo bi nuŋ sɨɨde wu̵lı̵́ ɗɔmɗɔm.

¹²Nán Kerɛ́d tóó, anábi voolı̵́ sa̧a̧mé aga o̧ kan fó̧ó̧ woo: “Nán Kerɛ́d vu̵ nán vbád vu̵ yu̵ sey 'waapád; vu̵ lı̵́n 'yɛ́nné; vu̵ kɔ́ zu̵b, vu̵ taa voo hȩn lálı̵́ mɛ́ń.”

¹³A̧máa hȩn ka o̧ yȩ moo yȩ́ńne. Moo woo nɔ a̧m sée vu̵ ú̵, moo u̵u̵ mbaa kan zó̧ó̧ 'yɛ́lı̵́ ı̵́ yȩ́ńne.

¹⁴Ʉu̵ sȩgȩ moo pa'ané vbád nán Yúúda voo vu̵, kan dooká nánán ku̵u̵ kéé moo yȩ́ń gbɔ la pigim yȩ voo sá.

¹⁵Nán zó̧ó̧ 'yɛ́lı̵́ u̵u̵ gaa hȩn kı̵́b[1] tóó ban sı̵́ pɛ́lı̵́; a̧máa nánán gaa Tayɨɨ sá, kan nán ku̵u̵ 'yɛ́n zó̧ó̧ voo Tayɨɨ woolı̵́ né máa, hȩn 'waapád mbaad vu̵ hȩn ví̧i̧gi, moo moo taalı̵́ voo, kan yɛ́g zó̧ó̧ voolı̵́ máa, hȩn ví̧i̧gi.

¹⁶Vu̵ o̧ ba bin gaa Tayɨɨ ú̵, a̧máa ba'ad voo tú' woo hȩn tóó kə́d. Vu̵ maa séenée, vu̵ ŋgó̧ó̧ tɔ́g mba kɛb, vu̵ dɨ kan néélȩ́ kɔ́n ba'ad du̵u̵ tóó né.