Read Dii TÍD 2 Bible Online

TÍD 2 - Dii bible

TÍD 2

¹Ɨ́ móó máa, a̧m tú' hȩn ka man kan moo yȩ́ń Tayɨɨ woo má nɔ.

²A̧m o̧d ı̵́ gbo̧o̧naa vu̵ u̵u̵ taa moo du̵u̵lı̵́ na'a, u̵u̵ mbaa du̵u̵lı̵́ na'a, u̵u̵ gaa moo taalı̵́, u̵u̵ mbaa kan zó̧ó̧ 'yɛ́lı̵́ yȩ́ń, u̵u̵ kɔ́ zó̧ó̧ nán, u̵u̵ ma' zó̧ó̧ á̧ḿ.

³A̧m o̧d wakȩ́ȩ́ gbo̧o̧naa vu̵ u̵u̵ mbaa kɔ́ ı̵́ Tayɨɨ ka hí̧í̧ máa wɔgɔ. Ʉu̵ dáb moo kə̧́ə̧́ daa kan mɔm sá, doo a buu vu̵ gba'a sá á̧ḿ. Ʉu̵ tú'ud nán vu̵ hȩn du̵u̵ kɔ́lı̵́,

⁴u̵u̵ tú'ud náá wa̧a̧ u̵u̵ hí̧í̧ wə̧ə̧ vu̵, kan waa vu̵ á̧ḿ,

⁵u̵u̵ taa moo du̵u̵ vu̵, u̵u̵ mbaa du̵u̵lı̵́ na'a, u̵u̵ kɔ́ ba'ad kíi voolı̵́ du̵u̵lı̵́ na'a, kan zó̧ó̧ to̧o̧, u̵u̵ kid wə̧ə̧ voo vu̵ tɔ́g, moo nán tóó a moo moo ɓı̵́d yúú moo Tayɨɨ woolı̵́ sá.

⁶Tée a̧m o̧d náásaa vu̵ á̧ḿ, u̵u̵ taa moo du̵u̵lı̵́ na'a.

⁷Mɔ́ á̧ḿ, a̧mmɔ tú'ud vu̵ mbaalı̵́ du̵u̵ kan ba'ad móó yȩ. A̧m tú' moo Tayɨɨ woo yȩ́ńná, dȩ"ȩ́ na'a.

⁸A̧m moo moo to̧o̧ vu̵ ya̧g móólȩ́, moo nán tóó a séem wu̵lı̵́ sá. Tée sȩ́ḿ wú̵ń kɔ́ nán maag baa ví vu̵, moo ku̵u̵ ho̧n hȩn ɓı̵́d u̵u̵ o̧n yúú baa vílí ní yȩ nɔ.

⁹Gba'a u̵u̵ kid ı̵́ buulí voo vu̵ tɔ́g, u̵u̵ kɔ́ hȩn ka to̧o̧d vu̵ máa 'waapád. Ʉu̵ fan moo kan vu̵ sá,

¹⁰u̵u̵ ɓɛ vu̵ hȩn líw sá á̧ḿ. A̧máa u̵u̵ kɔ́d vu̵ hȩn du̵u̵ laan tíŋ́ tíŋ́, u̵u̵ kɔ́d ı̵́ buulí voo vu̵ ba'ad dȩ"ȩ́ na'a, moo nán u̵u̵ na' hȩn tú"í yúú Tayɨɨ ı̵́ sənné baa ví woolı̵́.

¹¹Tayɨɨ tú' zó̧ó̧ nán woo yúú nán voolı̵́ 'waapád, moo u̵u̵ sə́ddú̵.

¹²Zó̧ó̧ nán yȩ tú'ud ba ví aa ma ví mbaalı̵́ ɓı̵́d baa ví, kan hí̧í̧lí̧ hȩn hágá baa ví yɛ, moo aa mbaa ví kan moo taalı̵́ du̵u̵, aa kɔ́ ví hȩn hí̧í̧lí̧ Tayɨɨ woo, aa duu ví Tayɨɨ du̵u̵lı̵́ na'a hágá yɛlı̵́.

¹³Moo woo nɔ ba mbaa laa ví zá̧ga̧ kaa 'yɛ́ ví zó̧ó̧ wu̵lı̵́ yȩlȩ́. Tayɨɨ gbo̧o̧ baa ví, kan ı̵́ sənné baa ví Yesu Krístu vú̵ń gbɔ vúd maa ba ví wu̵lı̵́ kan na"ȩ́ máa yȩ nɔ.

¹⁴Pú̵ fó̧ó̧ woo moo baa ví, moo bi səd ba ví ya hȩn ɓı̵́ddı̵́ 'waapád, moo bi mbɔ́g ba ví zig dáń woo nɔ, aa kɔ́ ví hȩn ví̧i̧g tóó sá, aa pi ví zó̧ó̧, moo aa kɔ́ ví ba'ad du̵u̵ɨ má nɔ.

¹⁵Hȩn a̧m tú'ud vu̵ kan néélȩ́ móó 'waapád máa wu̵ yȩ nɔ. A̧m zigid nán ı̵́ tóó ku̵u̵ ki moo móó máa vu̵ zó̧ó̧ wu̵lı̵́, a̧m sée ı̵́ tóó vu̵ wu̵lı̵́ á̧ḿ. A̧m gbɔ nán tóó a ɓéem sá.