Read Dii TÍD 3 Bible Online

TÍD 3 - Dii bible

TÍD 3

¹A̧m duu ta'ad o̧d nán kirtȩ́n vu̵ u̵u̵ kid nán gbo̧o̧ vu̵ tɔ́g, kan ı̵́ nii hág vu̵ á̧ḿ. Ʉu̵ kid vu̵ tɔ́g, u̵u̵ mbaa bə́' moo ba'ad du̵u̵ vu̵ kɔ́lı̵́ 'waapád.

²Ʉu̵ háá nán tóó vu̵ sá, u̵u̵ ɓaa ya̧g sá, u̵u̵ mbaa kan zó̧ó̧ to̧o̧, u̵u̵ tú' zó̧ó̧ ká̧'a̧d mbaan wu̵lı̵́ yúú nánán voolı̵́ 'waapád.

³Ká ba mbaa ví ya̧ŋná, ba kin ví tɔ́g né, ba kɔ́ ví hȩn kə̧ə̧g vu̵ á̧ḿ. Ba mbaa ví gba'aná moo hȩn hágá yɛ vu̵ hí̧í̧lí̧, kan hȩn ku̵u̵ to̧o̧d ba ví yɛ vu̵lı̵́. Ba lı̵́n ví, ba sú̵ ví zó̧ó̧ hȩn da ba ví voolı̵́, ba máń ví da ba ví vu̵, vu̵ máń ba ví á̧ḿ.

⁴A̧máa sey Tayɨɨ ı̵́ sənné baa ví ka tú' zó̧ó̧ to̧o̧ woo, kan zó̧ó̧ nán woo moo nánán voo máa,

⁵sən ba ví moo ba'ad du̵u̵ baa ví nu ní, a̧máa moo ka ho̧ gíḿ gaad ba ví má nɔ. Səd ba ví mam woolı̵́ Tayɨɨ woolı̵́; yigid Tayɨɨ woo ha̧a̧ ba ví 'waapád 'maŋná wu̵lı̵́, pú̵ ba ví zó̧ó̧ 'maŋ á̧ḿ.

⁶Tayɨɨ pú̵ ba ví yigid woo ɓu̵u̵lı̵́ na'a kan yɛ́g Yesu Krístu ı̵́ sənné baa ví woo nɔ.

⁷Yúú zó̧ó̧ nán woolı̵́ ba tii to̧o̧d ví Tayɨɨ sú̵'ú̵, moo aa nuŋ ví vágád káákáá kaa 'yɛ́ ví zó̧ó̧ woolı̵́ yȩlȩ́.

⁸Ɨ́ yȩ moo yȩ́ńne. Mí hí̧í̧ a̧m nda doo wu̵lı̵́, moo nán ı̵́ ku̵u̵ 'yɛ́ zó̧ó̧ voo Tayɨɨ woolı̵́ máa, u̵u̵ 'yɛ́ zó̧ó̧ voo moo ba'ad du̵u̵ kɔ́lı̵́ á̧ḿ. Hȩn yȩ wu̵ du̵u̵, du̵u̵d nánán vu̵ á̧ḿ.

⁹A̧máa a̧m ndɔg moo fanné kan ya̧g vu̵ ú̵. A̧m há' moo fanné lee vu̵; a̧m há' yéé aa yée voo vu̵ wá"ı̵́ lú̵ggı̵́ na'a yȩ, kan moo fá̧né yúú dookálı̵́ yȩ á̧ḿ. Vu̵ voo hȩn lee vu̵ yu̵; hȩn yȩ́ń tóó vu̵ wu̵lı̵́ pɛ́lı̵́.

¹⁰Nán ı̵́ ka yaan kan hȩn hɨ'ɨné yȩ, a̧m vud moo o̧ddu̵ la do' dágá, do' idú woo tée, mɔ́ vuddu̵ la gɔ́ŋ́.

¹¹Mɔ́ gaa nán ı̵́ yo̧go̧ yȩ ba kéé hi̧naa Tayɨɨ woo gbɔ sú̵'ú̵, hȩn ɓı̵́d kɔ́lı̵́ woo wu̵ tú' ba ka dɨgɨ daa bá̧a̧né yȩ nɔ.

¹²Sey a̧n ba'am la Aatemáa, tóó tée Tisíg tée, a̧m ha fó̧ó̧ yaa ba kan kaa Nikopolíilí, moo mí hí̧í̧ bi ya̧a̧ mbaa wu̵lı̵́ sey ho̧o̧mé.

¹³A̧m pú̵ Zenás nán debtere gaalı̵́ yȩ hȩn, kan Apolóo á̧ḿ, moo hȩn tóó a gee vu̵ ya 'yȩ́ȩm voolı̵́ sá. Tée a̧m pú̵ vu̵ kan zó̧ó̧ dȩ"ȩ́ȩ.

¹⁴Nán baa ví u̵u̵ kúgú ba'ad du̵u̵ kɔ́lı̵́ mbaan wu̵lı̵́, u̵u̵ kɔ́ hȩn ka maa kɔ́lı̵́ má nɔ. Ʉu̵ mbaa nag lee sá.

¹⁵Nán 'waapád ku̵u̵ mbaa kan mí yɛ, vu̵ vá'am wu̵lı̵́. A̧m vá' da ba ví gboo ı̵́ zó̧ó̧ 'yɛ́lı̵́ yȩ vu̵ wu̵lı̵́ á̧ḿ. Tayɨɨ a kɔ́d ví zó̧ó̧ nán 'waapád.