Read Dii FILMÓŊ 1 Bible Online

FILMÓŊ 1 - Dii bible

FILMÓŊ 1

¹Mí Póllu̵, vu̵ dɔn púúsinalȩ́ moo káń duu Yesu Krístu yɛ nɔ. Ɨ́ hí̧í̧lí̧ vóó Filmóŋ, da vɔ́ ba'ad kɔ́lı̵́, kan nán sú̵ggı̵́ kíi móólȩ́ vu̵ á̧ḿ, vɔ́ sú̵g kan da ba ví kirtȩ́n Timɔtée, vóo bíńda ɗerwəl yɛ ba'ad ví. Vɔ́ ba'ad ví da ba ví kirtȩ́n Apía á̧ḿ, kan Aasíb, ka kɔ́d Yesu ba'ad néélȩ́ na'a yȩ nɔ.

³Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

⁴Sey káń dɨd Tayɨɨ míí moo o̧lȩ́ tée, mí taam, mí dȩnnɔ nag,

⁵moo mí ki moo hí̧í̧lí̧ káḿ hí̧í̧ nán Tayɨɨ woo vu̵ yȩ, kan zó̧ó̧ 'yɛ́lı̵́ móó yúú ı̵́ 'yɛ́lı̵́ baa ví Yesu woolı̵́ yȩ nɔ.

⁶Mí ɓá' Tayɨɨ yúú to̧nné zó̧ó̧ 'yɛ́lı̵́ baa vílí a pú̵m néélȩ́, a̧m gaa hȩn du̵u̵ 'waapád ka mbaad ba ví Krístu woolı̵́ yɛ nɔ.

⁷Dan gboo, hí̧í̧lí̧ móó yȩ dȩ'ȩn zó̧ó̧, zigin kan zó̧ó̧ á̧ḿ, moo káḿ zigid nán Tayɨɨ woo vu̵ zó̧ó̧ na'a yȩ nɔ.

⁸Moo woo nɔ, kóó káń nuŋ néélȩ́ 'waapád Krístu woolı̵́ moo a̧n o̧m hȩn a̧m kɔ́ yɛ nɔ si̧',

⁹mí hí̧í̧ bi vim hȩn tóó yúú hí̧nní baa vílí. Ɨ́ míí Pól, ku̵u̵ dɔn púúsina gbo̧o̧naalȩ́ moo Yesu Krístu woolı̵́ yɛ,

¹⁰mí vim moo yúú Onezím woolı̵́, waa míí káń ha̧a̧wo̧ kan yɛ́g Yesu Krístu woo lig púúsinalȩ́ yɛlı̵́ yɛ nɔ.

¹¹Sey tóólı̵́ máa, Onezím ká mbaam hȩn leená,[1] a̧máa 'ya̧'a̧ yɛ máa, tiid ba sı̵́ hȩn du̵u̵ ú̵.

¹²Mí ba'amɔ la yȩ, mbaa sı̵́ kɔ́ ı̵́ nɔ́ɔ́ míí wɔgɔ.

¹³Káń dɨ la mbaalı̵́ lig púúsinalȩ́ moo moo to̧o̧ 'maŋ yɛ, ká mí hí̧í̧ kan kɔ́n ba'ad doo móólȩ́.

¹⁴A̧máa mí hí̧i̧n kɔ́lı̵́ ı̵́ yo̧go̧ né, tow a̧m sɛ́n né tɛ́ nɔ. Mí hí̧í̧ a̧m kɔ́n hȩn du̵u̵ yȩ kɔɔgná sá, a̧máa a̧m kɔ́ kan hí̧í̧lí̧ móó nɔ.

¹⁵Tóó tée, hȩn woo ká kɔ́y ba i hı̵́'ı̵́n kan Onezím bá' waaná' ma, ba mɔ́n duu nuŋŋɔ də́ń kəd,

¹⁶moo 'ya̧'a̧ yɛ Onezím duu sı̵́ gba'aɨ dágá pɛ́lı̵́, mba sı̵́ gba'a ú̵. Sı̵́ dam kirtȩ́nne. Mí hí̧í̧wo̧ míí 'yɛ́nné, a̧máa mɔ́ á̧ḿ mɔ́ńnɔ hí̧í̧wo̧ mba. Wu̵ gba'a móó, kan dam sá̧ŋ́ ı̵́ 'yɛ́lı̵́ baa ví woolı̵́ á̧ḿ.

¹⁷Tow a̧m ho̧n kɔ́ ı̵́ dam gboo wɔgɔ tée, a̧m fȩȩwo̧ kɔ́ ı̵́ káḿ baa fȩȩn máa wɔgɔ.

¹⁸Tow a kɔ́m hȩn kə̧ə̧g tóó, tóó tée a ɓɛm ɓooɨ tée, a̧m wá' gbɔd ya míw.

¹⁹Aga míi bíńda hȩn yɛ kan nag míí: Mí Póllu̵, míńnɔ sú̵u̵m ɓoo woo vu̵. (Mí o̧n mɔ́ ba mɔ́n duun bi ɓoo moo vágád móó nɔ né á̧ḿ.)

²⁰Ee, dan sá̧ŋ́, mí dȩm nag a̧m kɔ́n hȩn yȩ kan yɛ́g ı̵́ 'yɛ́lı̵́ woo nɔ. A̧m zigin zó̧ó̧ yúú Krístu woolı̵́ ú̵.

²¹Káń bíńda moo yɛ máa, mí gaa mɔ́ń kɔ́n hȩn woo ú̵. Mí gaa mɔ́ń duu kɔ́ mba á̧ḿ.

²²Tée a̧m mbɔ́gɔn lig dágá á̧ḿ, moo mí la ud wu̵lı̵́, moo mí taa Tayɨɨ wú̵ń hí̧i̧d ví moo yúú hȩn kíí ɓá"u̵ yúú míílí̧ yȩlȩ́ ó̧. Wú̵ńnɔ kɔ́ ma, vú̵ń gbɔn té', tée míń laa víílí dɨlı̵́.

²³Epafára ı̵́ kóó sú̵g mbaa kannɔ lig púúsinalȩ́ yɛlı̵́ moo Yesu Krístu woo yɛ, vá'am wu̵lı̵́.

²⁴Márkus kan Aristáar, kan Demás, kan Lúg, dan ba'ad kɔ́lı̵́ yȩ vu̵, vu̵ 'waapád, vu̵ vá'am wu̵lı̵́ á̧ḿ.

²⁵Ɨ́ 'yɛ́lı̵́ baa ví Yesu Krístu a kɔ́d ví zó̧ó̧ nánne.