Read Dii NÁN EEBƏRӘ́Ə VɄ 1 Bible Online

NÁN EEBƏRӘ́Ə VɄ 1 - Dii bible

NÁN EEBƏRӘ́Ə VɄ 1

¹Tayɨɨ ká o̧d a ba ví yée vu̵ moo do' ɓu̵u̵lı̵́ na'a, kan hi̧naa kə́dkə́d anábi voolı̵́ ya̧gá̧.

²A̧máa bá' sí̧'í̧d woolı̵́ yɛ, o̧d ba ví moo ya̧g Waa woo woolı̵́. Tayɨɨ yɨb hȩn 'waapád kan wu̵ yu̵. Tayɨɨ 'yɛ́d wu̵ yu̵ hȩn 'waapád nagá.

³Na"ȩ́ woo man kan ı̵́ Tayɨɨ woo kííd, mbaa kɔ́ ı̵́ Tayɨɨ ka mbaa máa wɔgɔ. Moo woolı̵́ ya̧gá̧ ka mba hȩn 'waapád yȩ, wu̵ kɔ́ ma, hȩn 'waapád mbaa kɔ́ ı̵́ ka yɨb vu̵ wɔgɔ. Ka tɛ hȩn ɓı̵́d nán voo vu̵ 'waa sú̵'ú̵ máa, dɔgga waa gbaŋ be"ı̵́, mbaa dɨ nag nán Tayɨɨ ka mba hȩn 'waapád máa woolı̵́.

⁴Waa Tayɨɨ woo yȩ wu̵ mba maleeka vu̵. Tayɨɨ 'yɛ́ddu̵ yéé gbo̧o̧ mba ı̵́ voo á̧ḿ,

⁵moo Tayɨɨ o̧ddu̵: “Mɔ́ Waa míí nu; mí ha̧a̧m sı̵́ ɓəə ú̵.” Tayɨɨ o̧n moo yȩ yúú maleeka tóó woolı̵́ né, o̧ yúú Waa woo woolı̵́. Duu o̧: “Míń mbaa Ba' woo, wú̵ń mbaa Waa míí.”

⁶A̧máa sey Tayɨɨ ka dɨ Waa nii woo ba"ı̵́ zu̵u̵ hágá yɛlı̵́ máa, o̧: “Maleeka 'waapád u̵u̵ nə'əy tíŋ́ woolı̵́.”

⁷Hȩn Tayɨɨ ka o̧ yúú maleeka voolı̵́ máa, wu̵ yɛ nɔ: “Tayɨɨ wu̵ kɔ́ ma, maleeka woo vu̵ tii sápéém. Wu̵ kɔ́ nán ba'ad woo vu̵ mbaa kɔ́ ı̵́ vee nɔ́ɔ́ wɔgɔ.”

⁸A̧máa Tayɨɨ vud o̧ yúú Waa woo woolı̵́: “Tayɨɨ, láan gbaŋ móó mbɔ́gɔy sı̵́ woo káákáá ú̵. Mɔ́ waa gbaŋ ya gbaŋ waalı̵́ móólȩ́ kan hȩn kɔ́lı̵́ tə́g tə́g.

⁹Ká mɔ́ hí̧í̧ móó hȩn hí̧í̧lí̧ Tayɨɨ woo nɔ; mɔ́ máń hȩn Tayɨɨ ka sɛ́n né má nɔ. Moo woo nɔ, Tayɨɨ móó pú̵m ya mbaalı̵́ sú̵'ú̵, dȩ'ȩm zó̧ó̧ gbo̧o̧ ba'a, o̧ nán u̵u̵ na'am wu̵lı̵́. Ya mbaalı̵́ móó mba ı̵́ dam voo ú̵.”

¹⁰Tayɨɨ duu o̧: “Ɨ́ 'yɛ́lı̵́ vóó, ká mɔ́ dəŋ yɨb hág; mɔ́ mbɔ́g be' kan nag móó á̧ḿ.

¹¹Vú̵ń tɛ́gɛ́d 'waapád, a̧máa mɔ́ń dɨ móó mbaalı̵́ɨ; vú̵ń zɛ́gɛ́d 'waapád kɔ́ ı̵́ sa̧a̧m see vu̵ wɔgɔ.

¹²Mɔ́ń ka vu̵ kɔ́ ı̵́ sa̧a̧m wáálı̵́ wɔgɔ; mɔ́ń pí vu̵ kɔ́ ı̵́ sa̧a̧m dɔ́lı̵́ vu̵ wɔgɔ. A̧máa ı̵́ móó, mɔ́ píń ní, mɔ́ń gbo̧o̧ né á̧ḿ.”

¹³Tayɨɨ ká o̧: “A̧m ya mbaa nag nán míílí̧, há̧á̧ mí 'yɛ́ ı̵́ maag móó vu̵ u̵u̵ mbaa hȩn doo 'ná'ané móó vu̵ pȩ́ń.” O̧n moo yȩ yúú maleeka woo tóó woolı̵́ né.

¹⁴Maleeka sú̵u̵ vu̵ voo ȩná? Ya voo 'waapád, vu̵ yigid ı̵́ ku̵u̵ kɔ́d Tayɨɨ ba'ad máa vu̵ yu̵. Wu̵ ba' vu̵ ya, moo u̵u̵ ya maa nán ı̵́ u̵u̵ sə́d máa vu̵ yu̵.