Read Dii NÁN EEBƏRӘ́Ə VɄ 10 Bible Online

NÁN EEBƏRӘ́Ə VɄ 10 - Dii bible

NÁN EEBƏRӘ́Ə VɄ 10

¹Debtere Múúsa woo vu̵ tú'un voo hȩn zu̵u̵ tə́g, moo yȩ́ńná né, man woo kan hȩn ka dɨ yaalı̵́ yȩ mannée. Hȩn ha"ı̵́ ku̵u̵ dɨ ha"ı̵́ ve' kan ve', ku̵u̵ sí̧'i̧ ní yȩ, vu̵ kan néélȩ́ u̵u̵ mbɔ́g nán ı̵́ ku̵u̵ hí̧í̧ bi séé la Tayɨɨ woolı̵́ du̵u̵lı̵́ na'a máa pɛ́lı̵́.

²Tow nán máa ku̵u̵ na' Tayɨɨ ı̵́ yo̧go̧ yȩ, hȩn ɓı̵́d voo kan ná'ád 'waa sı̵́ kəddú̵ tée, ka vu̵n duu taan sı̵́ bin nán hȩn ɓı̵́ddɨ né, ka vu̵n gbɔ hȩn ha"ı̵́ vu̵ 'waapád.

³Moo yȩ́ńne, hȩn ha"ı̵́ yȩ vu̵ kɔ́ moo nán u̵u̵ duu taa hȩn ɓı̵́d kɔ́lı̵́ voo vu̵ wu̵lı̵́ ve' kan ve',

⁴moo mɛm ndaa kan mɛm ɓee vú̵ń na'an hȩn ɓı̵́d né sá̧ḿ.

⁵Moo woo nɔ, sey Krístu ka dɨ yaalı̵́ hágá yɛlı̵́ máa, o̧d Tayɨɨ: “Mɔ́ sɛ́n móó hȩn ha"ı̵́ ı̵́ ku̵u̵ sə̧', kan ı̵́ ku̵u̵ pú̵ té' má nɔ né. A̧máa mɔ́ mbɔ́gɔn fó̧ó̧ sú̵'ú̵.

⁶Hȩn ha"ı̵́ ku̵u̵ sə̧' a̧n ya hȩn ha"ı̵́lı̵́, ku̵u̵ sə̧' moo hȩn ɓı̵́d voo vu̵ yu̵ máa vu̵ á̧ḿ, vu̵ to̧o̧n mɔ́ né.

⁷Ma mí o̧: ‘Tayɨɨ káń yɛlá! Vu̵ bíńda yúú míílí̧ debtere moo Tayɨɨlı̵́: Mí yaa bi kɔ́ hȩn hí̧í̧lí̧ móó nɔ.’ ”

⁸Dəŋ o̧: “Mɔ́ sȩ́n móó hȩn ha"ı̵́ ı̵́ ku̵u̵ sə̧', kan ı̵́ ku̵u̵ pú̵ té', kan hȩn ı̵́ ku̵u̵ sə̧' a̧n ya hȩn ha"ı̵́lı̵́, kan ı̵́ ku̵u̵ sə̧' moo hȩn ɓı̵́d vu̵ yu̵ má nɔ né. Vu̵u̵ to̧o̧n mɔ́ né,” kóó ká u̵u̵ ha' hȩn yȩ vu̵ kɔ́ ı̵́ debtere Múúsa woo ka o̧ wɔgɔ si̧'.

⁹Duu ha' moo tóó, o̧: “Káń yɛlá, Tayɨɨ! Mí yaa bi kɔ́ hȩn hí̧í̧lí̧ móó nɔ.” Tayɨɨ mbigid hȩn ha"ı̵́ see vu̵ 'waapád ı̵́ yo̧go̧, ma duu pí vu̵ kan hȩn ha"ı̵́ Ɨ́ Krístu woo.

¹⁰Yesu Krístu ka kɔ́ hȩn hí̧í̧lí̧ Tayɨɨ woo si̧' la gbug sú̵'ú̵ máa, ba ví sı̵́ nán Tayɨɨ woo vu̵ yu̵. Ha' fó̧ó̧ woo do' dágá 'nɛ́ŋ́, moo hȩn ɓı̵́d baa vi vu̵ yu̵.

¹¹Nán hȩn ha"ı̵́ vu̵ 'waapád vu̵ dii zá̧ga̧ 'waapád, moo u̵u̵ kɔ́ ba'ad hȩn ha"ı̵́ voo vu̵ yu̵. Hȩn ha"ı̵́ voo vu̵ 'waapád vu̵ man 'má', a̧máa vu̵ na'an hȩn ɓı̵́d kɔ́lı̵́ vu̵ né sá̧ḿ.

¹²Yesu woo máa, ha' woo hȩn ha"ı̵́ dágá 'nɛ́ŋ́, moo hȩn ɓı̵́d kɔ́lı̵́ vu̵ yu̵. Hȩn ha"ı̵́ woo yȩ mbaa há̧á̧ káákáá; pig woo máa, la mbaa ka' nag nán Tayɨɨ woolı̵́.

¹³'Ya̧'a̧ yɛ máa, mbaa laa Tayɨɨ a 'yɛ́ ı̵́ maag woo vu̵ u̵u̵ mbaa hȩn doo 'ná'ané woo vu̵ pȩ́ń.

¹⁴Kan hȩn ha"ı̵́ dágá 'nɛ́ŋ́ yȩ, Yesu kɔ́ nán ı̵́ ku̵u̵ dɨ zó̧ó̧ mbɔ́ggı̵́ máa vu̵ mbaa də́ń káákáá kɔ́ ı̵́ Tayɨɨ ka hí̧í̧ wɔgɔ.

¹⁵Yigid Tayɨɨ woo o̧d ba ví ı̵́ yo̧go̧ á̧ḿ, dəŋ vud o̧ pȩ́ń, o̧:

¹⁶“Ɨ́ 'yɛ́lı̵́ o̧: ‘Ya̧g a̧n tad vu̵ pig bá' yȩlȩ́ máa, wu̵ yɛ nɔ. Míń 'yɛ́d vu̵ dooká míí vu̵ zó̧ó̧ voolı̵́. Míń bíńda 'yɛ́d vu̵ zó̧ó̧ voolı̵́.’ ”

¹⁷Pig woolı̵́ máa, duu ha' moo yɛ: “Hȩn ɓı̵́d kɔ́lı̵́ voo yȩ vu̵, kan hȩn kɔ́lı̵́ sɔnné voo yȩ vu̵, míń duu taan vu̵ sı̵́ né.”

¹⁸Ma Tayɨɨ ka kéé hȩn ɓı̵́d kɔ́lı̵́ nán voo vu̵ gbɔ sú̵'ú̵ yȩ, maan ban duu ha'an ví sı̵́ Tayɨɨ hȩn yúú voolı̵́ né.

¹⁹Dɨ ı̵́ yo̧go̧, dan kirtȩ́n vu̵, moo nɔm Yesu woolı̵́ ma, ba dɔ́ ví la ya gbo̧o̧ mba hȩnné; dú̵ú̵ kɔ́n ba ví ní á̧ḿ.

²⁰Tú̵'u̵d ba ví hi̧naa 'maŋ, wu̵ hi̧naa zá̧a̧d. Wu̵ pa̧ŋ ba ví laan kii sa̧a̧m ku̵u̵ yȩȩ du̵n zu̵u̵ lig hȩn ha"ı̵́lı̵́ yȩlȩ́; hi̧naa yȩ fó̧ó̧ Yesu woo nɔ.

²¹Ma ba dɨ ví kan ı̵́ nii hȩn ha"ı̵́ gbo̧o̧ ba'a lig Tayɨɨlı̵́.

²²Moo woo nɔ, ba séé ví la tíŋ́ Tayɨɨ woolı̵́ kan zó̧ó̧ moo yȩ́ń; ba 'yɛ́ ví zó̧ó̧ baa ví woolı̵́ du̵u̵lı̵́ na'a. Tayɨɨ wú̵ń vud hȩn ɓı̵́d 'waapád baa vílí zó̧ó̧lȩ́ dȩ"ȩ́ na'a pȩ́ń. Wú̵ń tɛ fó̧ó̧ baa ví kan mam ı̵́ ka dȩ' mba hȩn máa á̧ḿ.

²³Ba tú'ud ví nán tóó vu̵ moo zó̧ó̧ 'yɛ́lı̵́ baa ví yɛ du̵u̵ na'a, moo ba gaa ví Tayɨɨ wú̵ń tíd ya̧g talı̵́ woo yȩ ó̧.

²⁴Ba nə ví sá. Ba zígín ví zó̧ó̧ du̵u̵ na'a, ba hí̧í̧n ví, ba kɔ́ ví séý ba'ad du̵u̵ɨ.

²⁵Ba gbɔ ví sú̵ggı̵́ baa ví kɔ́ ı̵́ nán tóó ku̵u̵ baa kɔ́ máa wɔgɔ sá. A̧máa ba zigid ví da ba ví vu̵ zó̧ó̧ȩ. Tée i kɔ́ a du̵u̵ mba ú̵, moo ví gaa zá̧ga̧ ı̵́ 'yɛ́lı̵́ woo ba dɨ bə́'.

²⁶Sey kaa gaa ví sı̵́ moo yȩ́ńná ó̧ yɛ, tow aa ká̧ŋ́ ví laané tíŋ́ kan hȩn ɓı̵́d kɔ́lı̵́ tée, hȩn ha"ı̵́ tóó a duu na'ad hȩn ɓı̵́d baa ví yɛ máa, sı̵́ pɛ́lı̵́.

²⁷Hȩn ka kéé máa, séý ba ndɔg ví hȩn a dɨ yaalı̵́ yȩ nɔ. Wu̵ moo sə̧"ȩ́ kan vee píím gbo̧o̧ a dɨ ı̵́ maag Tayɨɨ woo vu̵ tunní yȩ nɔ.

²⁸Nán ı̵́ ka ɓéé dooká Múúsa woo vu̵ ma, fó̧ó̧ idú, tóó tée ta̧a̧nɔ́ ku̵u̵ du̵ ya̧g yúú woolı̵́ tée, vu̵ nɔɔwo̧ sú̵'ú̵, zó̧ó̧ nán pɛ́lı̵́ á̧ḿ.

²⁹Ma dan tóó nán ı̵́ a ɓéé Waa Tayɨɨ woo má naa! A 'yɛ́n mɛm ya̧g talı̵́ ka to̧n ba ví kan Tayɨɨ yȩ kɔ́ ı̵́ hȩn za̧a̧ tóó wɔgɔ né, a haa yigid zó̧ó̧ nán yȩ tée, wú̵ń mbaa nɛ́nná? Tée víń taa du̵u̵lı̵́ na'a, hȩn si̧'i̧ní woo a nuŋ máa, ban zi̧i̧ mban kɛbbú̵ náa!

³⁰Moo ba gaa ví ı̵́ ka vud o̧: “Míńnɔ vȩ' hȩn ɓı̵́d nán voo sú̵u̵n vu̵; míńnɔ vȩ' sú̵ú̵ vu̵;” ka duu o̧: “Ɨ́ 'yɛ́lı̵́ wú̵ńnɔ sə̧'ə̧d zig woo vu̵ moo.”

³¹Tayɨɨ ı̵́ zá̧a̧d ka si̧'i̧d ba tée, maa kaa ki dú̵ú̵ wu̵lı̵́ ú̵ náa!

³²I taa lá ví mbaalı̵́ víí ká tíŋ́ má nɔ. Sey ká kíí nuŋ ya túlí Tayɨɨ woo máa, ví nuŋ hȩn ndɔ́gɔné za̧a̧ná, a̧máa ví nda doo wu̵lı̵́ du̵u̵lı̵́ na'a.

³³Sey tóó tée, vu̵ haa ví, vu̵ kɔ́d ví la hȩn ɓı̵́d sȩgȩgȩ nɔ́ɔ́ nánán voolı̵́; sey tóó tée, ví gbɔ́ dam yúú nán ı̵́ ku̵u̵ nuŋ hȩn si̧'i̧ní ı̵́ yo̧go̧ máa voolı̵́ á̧ḿ.

³⁴Ví maa nán ku̵u̵ dɔd vu̵ púúsinalȩ́ máa vu̵. Ku̵u̵ vbid hȩn naa víí vu̵ tée, ví gbɔd vu̵ kan zó̧ó̧ dȩ"ȩ́, moo ví gaa ba bíń dɨ kan hȩn naa tóó ka mba hȩn 'waapád, ban mbaa sey 'waapád máa á̧ḿ.

³⁵Moo woo nɔ, i mbi nɔ́ɔ́ zó̧ó̧ 'yɛ́lı̵́ víílí yȩ́ńná, ví mbaan wu̵lı̵́. Tée víń nuŋ hȩn sú̵ú̵lı̵́ gbo̧o̧ ba'a.

³⁶Maa i ma' zó̧ó̧, moo i kɔ́ hȩn Tayɨɨ ka hí̧í̧ yȩ tée, víń nuŋ hȩn Tayɨɨ ka ta ya̧g wu̵lı̵́ yȩ,

³⁷kɔ́ ı̵́ debtere ka o̧ wɔgɔ, o̧: “Sey dɨ lálı̵́ waaná', ı̵́ a dɨ yaalı̵́ máa, wú̵ń dɨ yaalı̵́ɨ; wú̵ń di̧'i̧ ní.

³⁸A̧máa nán a 'yɛ́ zó̧ó̧ woo míílí̧, a to̧n kan mí tée, wú̵ń nuŋ vágád yȩ́ńná. A̧máa a duu vȩ́' la pigim tée, míń duu hí̧i̧nɔ sı̵́ né.”

³⁹Ba ví baa nán ı̵́ ku̵u̵ vȩ́' pigim, ku̵u̵ ti máa vu̵ yu̵ pɛ́lı̵́. A̧máa aa 'yɛ́ ví zó̧ó̧ baa ví Tayɨɨ woolı̵́ tée; ba dɨ ví hi̧naa vágád káákáálı̵́.